Umunyarwanda  agiye kwirukanwa muri Zimbabwe kubera gushaka gushinga idini rya Shitani

Umunyarwanda agiye kwirukanwa muri Zimbabwe kubera gushaka gushinga idini rya Shitani


Yanditswe kuya 13-09-2012 - Saa 23:39' na Umurerwa Emma-Marie

Leta ya Zimbabwe yafashe icyemezo cyo kwirukana Umunyarwanda witwa Bizimana Théoneste wari wayandikiye asaba uburenganzira bwo gutangiza idini ryemera kandi rigasenga Shitani.

Urubuga rwa seetheafrica.blogspot, dukesha iyi nkuru ruratangaza ko uyu Munyarwanda Bizimana Théoneste na bagenzi be babiri b’Abanyekongo, George Rene Lungange na Ngendo Brangsto bageze muri Zimbabwe ari impunzi, bajya gucumbikirwa mu nkambi yitwa Tongogara mu gace ka Chipinge.

Umunyekongo witwa Lungange ufatanyije n’uwo Munyarwanda agira ati “Nkigera muri Zimbabwe nasabye ko bareka tukamamaza ubutumwa bwiza bwa Shitani nk’uko iwacu muri Congo twabwamamazaga, kandi afite yo abayoboke nk’ab’ayandi madini”.

Lungange akomeza asobanura ko iryo dini ryabo rifite amashami henshi muri Afurika, nka Sandton muri Afurika y’Epfo yegeranye na Zimbabwe, ndetse n’ahandi henshi ku Isi wongeyeho n’icyicaro gikuru kiri i New York muri Leta Zunze Ubumwe z’Amerika.

Yakomeje agira ati “Nkeka ko icyabarakaje cyane ari uko nababwiye ko uwo bo bita umucunguzi wabo Yezu Kirisitu ari ikiremwa nk’ibindi, ndetse akaba atari n’Imana isubiza uko abayisenga bayiyambaje mu gihe twe Shitani atajya azuyaza kudukorera ibyo tumusabye tumwizeye”.

Bwana Lungange akomeza avuga ko mu myemerere ye Shitani ari ikiremwa cy’umwuka nk’Imana mu gihe Yezu we yari umuntu mu bandi ufite umubiri.

Ndetse ku bwa Lungange, ngo kuba Imana ari umwuka udafatika nka Shitani ikaba ari nayo yaremye byose na Shitani ni uko Imana nayo ikunda Shitani, ikaba yaranayiremeye umwuka nk’uwayo.

Aba bagabo bari muri iri dini baravuga ko n’ubwo babimye amatwi bakanabafunga, Shitani bemera itanga imigisha myinshi irimo ubukire bw’akataraboneka.

Bavuga ko bafite amategeko yo gukurikizwa arimo gutamba ibitambo by’amaraso, kurya inyama z’abantu n’ubupfumu bunyuranye.

Lungange ati “ Twiyemeje kujya twubahiriza amategeko ya Shatan,i ndetse tunabatirizwa mu maraso y’abantu menshi.”

Aganira n’abanyamakuru ba The Weekender, Lungange yashishikarije n’aba banyamakuru kuyoboka idini ryabo rya Shitani, avuga ko itanga amahirwe n’ibyiza byinshi, ahubwo akabuza abantu kujya bikoma Shitani igihe hari ibibi bibabayeho.

Lungange yemeza ko mbere y’uko ava iwabo muri Congo yari yaramaze kubona abayoboke b’idini rye basaga ibihumbi 10. Ku rindi shami ryabo riri i Sandton muri Afurika y’Epfo hari urusengero rwitwa Devil Angel (Malayika Mubi) rurimo kwinjiza abayoboke benshi cyane.

Aba bagabo bafungiwe muri gereza yitwa Mutare Remand Prison muri Zimbabwe, aho bategerejwe kuzavanwa muri icyi cyumweru bagasubizwa mu bihugu byabo, kuko Leta ya Zimbabwe yavuze ko idashobora kugumana ku butaka bwayo abantu biyemerera ko basenga Sekibi, kandi bashaka kumwamamaza no mu bandi benegihugu bose.

Umuyobozi wa gereza ya Mutare Remand Prison, Superintendant Reuben Zimondi yavuze ko abo bagabo batazajyanwa mu rukiko, ahubwo bazoherezwa iwabo aho bakomoka nihamara kuzuzwa ibiteganywa n’amategeko.

Babaye babafungiye mu kato, buri wese ukwe kugira ngo badakomeza gucengeza amatwara y’idini ya Shitani mu bandi bafungwa.

Idini risenga shitani ryashingiwe muri Leta Zunz’Ubumwe z’Amerika mu 1966, n’uwitwa Anton LaVey wari umwanditsi akaba n’umunyamuziki. Uyu ni nawe wanditse igitabo yise "Bibiliya ya Shitani" gikubiyemo amahame y’iri dini.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO