Umuryango wa Afurika Yunze Ubumwe wateye utwatsi perezida wa Centrafrique

Umuryango wa Afurika Yunze Ubumwe wateye utwatsi perezida wa Centrafrique


Yanditswe kuya 3-04-2013 - Saa 02:58' na Emmanuel Kanamugire

Nyuma y’aho umukuru w’inyeshyamba zo mu mutwe wa Seleka Michel Djotodia atangaje ko ari we perezida mushya wa Centrafrique nyuma yo guhunga kwa Francois Bozize, Umuryango wa Afurika Yunze ubumwe uratangaza ko utamwemera nk’umukuru w’iki gihugu.

Umuvugizi w’Akanama Gashinzwe Amahoro n’Umutekano muri uyu muryango El-Ghassim Wane, avuga ko Afurika Yunze Ubumwe, hamwe n’abafatanyabikorwa bawo ku rwego mpuzamahanga barimo bashaka uko ikibazo cya Centrafrique cyakemuka.

Wane yagize ati “Turamagana ibyakozwe n’Umutwe Seleka kimwe n’ibyemezo bitemewe n’amategeko byafashwe n’umuyobozi wawo yiyita ko ari we perezida, ntitwemera ko yaguma ku butegetsi ngo ayobore icyo yita inzibacyuho.”

Avuga ko hashakwa uburyo amasezerasno ya Libreville yakubahirizwa kimwe mu bishobora gukemura ibibazo bihari mu nzira y’amahoro.

Voanews dukesha iyi nkuru ivuga ko Afurika Yunze Ubumwe yatangiye gukomanyiriza Centrafrique, no guteganyiriza ibihano abayobozi ba Seleka harimo na Michel Djotodia.

Bamwe batekereza ko Akanama k’Amahoro n’Umutekano muri Afurika Yunze Ubumwe kazakoresha ingufu za gisirikare mu kuvana ku butegetsi Michel Djotodia.

Hateganyijwe inama y’abakuru b’ibihugu byo muri Afurika yo hagati yo kuganira ku bibazo bya Centrafrique, aho Umuryango wa Afurika Yunze Ubumwe uzaba usaba ko ibi bihugu byashyigikira amahame yawo yo kwanga bidasubirwaho ubutegetsi bw’Umuyobozi wa Seleka.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO