Urinda Besigye yarashwe n’abapolisi ba Uganda

Bakoresheje imyuka iryana mu maso, abapolisi ba Uganda barashe umukuru w’ishyaka FDC, Kiiza Besigye maze bakomeretsa ushinzwe kumurinda bakoresheje isasu rya pulasitiki (rubber bullet).

Nyuma yo kuraswa, ushinzwe kurinda Besigye ariwe Francis Mwijukye yakomeretse ku kaguru.

Besigye yari kumwe n’umudepite witwa Nabillah Nagai ndetse n’ukuriye ihuriro ry’abagore muri iri shyaka, Ingrid Turinawe ubwo bafataga ifunguro mu isoko rya Katwe mu mujyi wa Kampala mbere yo gucakirana na polisi.

Besigye ari gufata ifunguro na bamwe mu mayoboke b'ishyaka rye

Polisi yari ifite ibikoresho bihambaye yabashije kwirukana abashyigikiye Besigye.

Abari bayoboye polisi muri icyo gikorwa barimo Phillip Acaye, Chemusto n’umuyobozi wa Polisi mu karere (DPC) ka Katwe, Richard Ecega bategetse umupolisi w’umugore kwirukana Besigye n’abarwanashyaka be ubwo binjiraga mu kibuga cya Katwe.

The New Vision ivuga ko Acaye yahamagariye abapolisi anabasaba gutera imyuka iryana mu maso agira ati : “Nta muntu nshaka hano. Mushobora kuva aha”.

Turinawe yatewe urusenda mu maso ndetse n’ikirahure cy’imbere cy’imodoka ye barakimennye.

DPC Ecega yavuze ko yahawe uburenganzira n’umukuru wa Polisi ya Kampala, Andrew Kaweesi bwo kutabemerera guhurira muri iki kibuga.

Yagize ati : “Hano hagenewe isoko kandi ni hafi y’umuhanda ukoreshwa n’abategetsi benshi berekeza ku kibuga cy’indege. Bivuze rero ko nta huriro ryemerewe gukorwa hano”.

Yababwiye ko bari gukoresha ikibuga cya Luwafu kiri mu bilometero bibiri uvuye aho Katwe.

Kiiza Besigye ayobora ishyaka rya Forum for Democratic Change (FDC) ritavuga rumwe na Leta ya Museveni. Akunze kubuzwa guhura n’abayoboke be kuko ngo bivuga ko ari we uteza imvururu aho aba yabakoranyirije.

Besigye agerageza kwihisha imyuka iryana mu maso