IGIHE.com > Amakuru > U Rwanda
108 bari baracikirije amashuri barafashwa kwigarurira icyizere

108 bari baracikirije amashuri barafashwa kwigarurira icyizere


Yanditswe kuya 26-11-2012 - Saa 14:11' na Marie Chantal Nyirabera

Abana b’abakobwa 108 bari baracikirije amashuri, barahabwa inyigisho zibafasha kwigarurira icyizere kugira ngo bazakomeze amasomo batabashije gukurikirana.

Aba bana ni bamwe mu bandi 512 bahabwa amahugurwa n’umushinga Imbuto Foundation, watangije kuri uyu wa 26 Ugushyingo 2012 amahugurwa agamije guhugura urubyiruko Imbuto Foundation urihirira amafaranga y’ishuri.

Aba banyeshuri b’abakobwa 108 bari baravuye mu mashuri bamaze imyaka iri hagati y’ibiri n’itanu batajya kwiga kubera ibibazo bitandukanye. Bazahugurwa ibyumweru bibiri, mu gihe abandi bazamara iminsi ine gusa muri aya mahugurwa.

Imbuto Foundation ku bufatanye na Minsiteri y’Uburinganire n’Iterambere ry’Umuryango bavuga ko bahagurukiye gahunda yo gufasha abanyeshuri bari barataye amashuri kongera kuyasubiramo.

Umuyobozi wa Imbuto Foundation Radegond Ndejuru, avuga ko muri iki gikorwa bazibanda ku ndangagaciro z’Umunyarwanda, ubuzima bw’ imyororokere, ikinyabupfura, imyitwarire myiza, ubunyangamugayo, kurangwa n’ubufatanye n’indangagaciro zo gukunda Igihugu ndetse no kwiteza imbere bagatsinda mu masomo kuko ari bo ejo heza h’Igihugu.

Ashimira ibigo bibafasha mu kurihirira abanyeshuri birimo Banki ya KIgali, MTN, SONARWA, hamwe n’abafatanyabikorwa barimo MIJEPROF na Banki y’Isi.

Yvone Mubiligi, umwe mu bayobozi ba MTN, avuga ko MTN nk’umufatanyabikorwa izarihirira abanyeshuri basaga 100 ku bufatanye na Imbuto Foundation.

Yongeraho ko MTN Rwanda ifite gahunda zitandukanye mu burezi, zirimo gahunda ya Scholarship bafatanyamo na Imbuto Foundation bagafasha ibigo bitandukanye babaha mudasobwa zibafasha mu myigire, aho kuri ubu bamaze gutanga izisaga 400. MTN inateganya kuzafatanya na Minsiteri y’Uburezi mu kurihirira abana b’abakene aho MINEDUC izajya ibafasha kumenya abana bakennye bo kurihirirwa.

Umunyamabanga wa Uhoraho muri Minisiteri y’Urubyiruko n’Ikoranabuhanga watangije aya mahugurwa ku mugaragaro, mu Itumanaho n’Isakazabumenyi, Madamu Mbabazi Rosemary, yasabye uru rubyiruko guharanira kugira ubuzima buzira SIDA n’inda z’indaro. Yabasabye kurangwa n’imyumvire n’ ubumenyi bwiza, gukunda Igihugu, gutanga umusaruro no kugira ubumenyi mu guhanga udushya kuko bizabafasha mu kwiteza imbere no guteza Igihugu cyabo Imbere.

Insanganyamatsiko y’iri huriro ku nshuro ya gatanu, iragira iti “ Urungano rwuzuye ubushobozi.”

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO