IGIHE.com > Amakuru > U Rwanda
2012 usize uburezi bugeze kuri byinshi hanafashwe ingamba nshya mu kubuteza imbere

2012 usize uburezi bugeze kuri byinshi hanafashwe ingamba nshya mu kubuteza imbere


Yanditswe kuya 30-12-2012 - Saa 07:12' na Nsabimana Emile

Uburezi nk’imwe mu nkingi z’iterambere ry’igihugu, mu mwaka wa 2012 bwagaragayemo ibikorwa bitandukanye ahanini byabaga bigamije kurushaho kubunoza no kubukora mu buryo bujyanye n’igihe.

Twabakusanyirije zimwe mu nkuru zanyuze ku rubuga igihe.com, kugira ngo ubwo umwaka w’ibikorwa mu Rwanda ugeze muri 1/2 abarebwa n’ingamba zitandukanye bongere bibuke inshingano niba hari aho bagize intege nke mu minsi ishize umwaka wa 2013 bawutangirane gahunda nshya zo gushyira mu bikorwa neza ibyo bashinzwe.

Guhuza za Kaminuza za Leta bizanoza ireme ry’uburezi

Minisitiri w’Uburezi Dr. Vincent Biruta yatangaje iby’ihuzwa ry’amashuri makuru yo mu gihugu agahurizwa muri Kaminuza imwe y’igihugu, byagombaga gushyirwa mu bikorwa muri Nzeri 2012.

Minisitiri yasobanuye akamaro ko guhuza kaminuza z'u Rwanda

Muri Mutarama 2012, Dr. Biruta yavuze ko umushinga w’itegeko rihuza za kaminuza warangiye hasigaye ko wemezwa.

Yagaragaje ko iki gikorwa kizagabanya ingengo y’imari ku mashuri makuru, kuvugurura ireme ry’uburezi, guhererekanya abarimu, ibikoresho n’ibindi.

Inama y’Abaminisitiri yashyize abayobozi mu myanya ya Minisiteri y’Uburezi hagamijwe kuvugurura imikorere

Inama y’Abaminisitiri yo ku wa 10 Kanama 2012, iyobowe na Perezida Paul Kagame yafashe imyanzuro yo gushyira mu myanya muri abakozi muri MINEDUC mu buryo bukurikira :

1.Kayumba Théogène : Umuyobozi w’Ikoranabuhanga (ICT) ;
2.Mucangando Emmanuel : Umujyanama w’Umunyamabanga wa Leta muri MINEDUC ;
3.Uwimbabazi Sylvie : Umuyobozi ushinzwe Porogaramu (Crosscutting Programs) Zihuriweho ;

4.Abagize Inama y’Ubuyobozi ya Carnegie Mellon University mu Rwanda bagizwe :
Prof. Beda Mutagwaba Mutagashywa, Prof. Timothy Mwololo Waema - Prof. Hung Kook Park

Umunyamabanga Mukuru wa Commonwealth yahawe impamyabumenyi na Kaminuza Nkuru y’u Rwanda

Tariki 27 Mutarama, ni bwo Kaminuza Nkuru y’u Rwanda yageneye impamyabushobozi abanyeshuri bayirangijemo inagenera impamyabumenyi y’ikirenga Umunyamabanga Mukuru w’umuryango w’ibihugu bivuga ururimi rw’Icyongereza Commonwealth.

Itangwa ry'impamyabushobozi

Kamalesh Sharma yahawe impamyabumenyi y’ikirenga y’icyubahiro mu buvanganzo (Literature) kubera uburyo abinyujije mu bitekerezo bye bya politiki n’uburezi yaharaniye uburenganzira bw’ikiremwamuntu, arwanya ubukene n’ivangura.

Ibi kandi bigeretseho no kuba yarabaye inshuti ikomeye y’u Rwanda, nk’uko ubutumwa bw’Umuyobozi Mukuru wa Kaminuza nkuru y’u Rwanda Prof Silas Lwakabamba bwabishimangiye.

Urubyiruko rukwiye gukoreshwa mu guteza imbere ikoranabuhanga

Nyuma yo guhabwa inshingano nshya zo kuyobora Ministeri y’Urubyiruko n’Ikoranabuhanga, Minisitiri Nsengimana Jean Philbert yatangaje ko yiteguye guha imbaraga urubyiruko mu kuzamura ikoranabuhanga.

JPEG - 16.1 ko
Ikoranabuhanga ryahujwe na Minisiteri y’urubyiruko

Ibi yabitangaje ku wa 17 Mata, nyuma y’umuhango wo guherererakanya ububasha na Dr. Ignace Gatare wayoboraga iyi Minisiteri.

Minisitiri Nsengimana yavuze ko azibanda ku guteza imbere ikoranabuhanga, avuga ko azarushaho gufatanya n’abikorera, abashishikariza gukoresha ikoranabuhanga nk’igikoresho cy’iterambere mu kazi kabo ka buri munsi.

ISAE-Busogo yashyize ku isoko ry’umurimo 1601 bayirangijemo

Dr Harebamungu Mathias, Umunyamabanga wa Leta muri Minisiteri y’uburezi ushinzwe Amashuri Abanza n’Ayisumbuye yashimiye Ishuri rikuru ryigisha ubuhinzi n’ubworozi ISAE-Busogo, ku bw’uruhare rigira mu guteza imbere ubuhinzi n’ubworozi mu gace riherereyemo.

U Rwanda rwahawe igihembo kubera gahunda y’uburezi bw’ibanze

Muvunyi Emmanuel, Umuyobozi mukuru wungirije w’ikigo cy’u Rwanda gishinzwe uburezi (REB), yakiriye igihembo Umuryango Commonwealth wageneye u Rwanda kubera guteza imbere uburezi bw’ibanze bw’imyaka icyenda.

Hakirwa igihembo cyahawe REB

Ibyashimwe ni uko muri iyi gahunda yiswe 9 YBE (Nine Years Basic Education) abanyeshuri biga ku buntu, bakiga imyaka itandatu y’amashuri abanza n’imyaka itatu ya mbere y’amashuri yisumbuye.

Dr Ahmed Rashid Beebeejaun, Minisitiriri w’Intebe wungirije wa Mauritius ni we washyikirije Muvunyi iki gihembo, mu muhango wabaye tariki ya 29 Kanama 2012.

KIE yagaragaje ko urubyiruko rufite ikibazo cyo kumenya indimi binyuze mu bushakashatsi

Ishuri Rikuru Nderabarezi rya Kigali (KIE) ryashyize ahagaragara igitabo gikubiyemo ubushakashatsi ryakoze ku bijyana n’uburezi tariki ya 14 Nzeri 2012.

Ubu bushakashatsi bwari bugamije guteza imbere uburezi, cyane cyane mu Rwanda binyujijwe mu kwandika.

Aha ngo hibanzwe ku ikoreshwa ry’indimi mu Rwanda aho usanga muri iyi minsi umuntu adafite ururimi azi neza nibura rumwe, kandi bikagaragara cyane cyane mu rubyiruko.

Ibi ngo bigira ingaruka mbi ku burezi bw’u Rwanda, nk’uko byatangajwe na Dr Karangwa Evariste wagize uruhare mu gushyira ahagaragara iki gitabo.

Iki gitabo gikubiyemo ibintu byinshi, cyane ibijyanye n’uburyo uburezi bumeze muri iki gihe ndetse n’icyakorwa kugira ngo bukomeze gutera imbere.

Miliyoni 198 zatanzwe na Minisiteri y’Uburezi mu kigega AgDF

Umunyamabanga Uhoraho muri Minisiteri y’Imari n’Igenamigambi Sayinzoga Kampeta yakiriye inkunga ya miliyoni 198 Minisiteri y’Uburezi yashyize mu kigega Agaciro ku ya mbere Ukwakira 2012, anashima ko iyi Minisiteri n’ubusanzwe ikora igikorwa gikomeye cyo kubaka igihugu ibicishije mu gutanga uburezi ku bana b’Abanyarwanda.

MINEDUC yashyikiye Agaciro Development Fund

Aya ni amwe mu makuru yaranze uburezi mu mwaka wa 2012. Ari ibyiza byagezweho hamwe na gahunda zateguwe, bikwiye gushyirwamo imbaraga mu ikurikiranwa ryabyo kugira ngo umwaka wa 2013 uzatume uburezi bw’u Rwanda buva ku ntambwe buriho bukomeze bwerekeza imbere.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO