IGIHE.com > Amakuru > U Rwanda
Amadini amwe abangamiwe n’icyemezo bafatiwe n’Umujyi wa Kigali

Amadini amwe abangamiwe n’icyemezo bafatiwe n’Umujyi wa Kigali


Yanditswe kuya 20-02-2013 - Saa 16:59' na Umurerwa Emma-Marie

Ibyemezo byafashwe n’Umujyi wa Kigali ku rusaku rw’abanyamadini, hari bamwe mu banyamadini bavuga ko babona bibabangamira, kuko ijambo ry’Imana bagenderaho (Bibiliya) ribasaba kuyihimbaza bakoresheje amajwi arenga (Zaburi 150 : 5).

Nyuma yaho Komite y’Umutekano yaguye y’Umujyi wa Kigali iyobowe n’Umuyobozi w’Umujyi wa Kigali Ndayisaba Fidèle yateranye tariki ya 04 Gashyantare 2013, igasuzumira hamwe ikibazo cy’abasakuriza abandi bakoresheje indangururamajwi cyangwa ibindi bikoresho by’umuziki, hafashwe ibyemezo biherekejwe n’ibihano biteganwa n’amategeko.

Bishop Nzeyimana Innocent uhagarariye Ihuriro ry’amadini n’amatorero yo mu Karere ka Nyarugenge, yagize icyo atangariza IGIHE ku byemezo byabafatiwe.

Yavuze ko ibyo Umujyi wa Kigali uvuga na bo babyumva kandi babishyigikiye, ko abashaka gukoresha uburyo burangurura amajwi y’abantu cyangwa y’ibikoresho bya muzika byaba ibya gakondo nk’ingoma cyangwa ibindi mu ruhame, bagomba kubikorera ahitaruye abantu ku buryo bitagira uwo baturanye bibangamira.

Akomeza avuga ko Umujyi wa Kigali, udakwiye kwirengagiza ko nsengero nyinshi n’amadini bikorera mu mazu y’amakodeshanyo, kubera ko igishushanyo mbonera cy’Umujyi wa Kigali kitaranononsorwa ngo bamenye aho bakwiye kubaka insengero zabo.

Bishop Innocent yagize ati ’’Dufite impungenge ko abantu babihirwa n’ijambo ry’Imana ndetse n’indirimbo bashobora kuzuririra kuri aya mabwiriza, bakajya babeshya ko babangamiwe n’urusaku rwo mu rusengero runaka kandi Atari ukuri, Leta idufashe mu bushishozi isanganwe hatazagira urengana.’’

Bamwe mu bayobozi b’amadini, batashatse ko amazina yabo atangazwa, bavuze ko babona hari ibyemezo bifatirwa amadini ya Gikristo, ntibifatirwe andi.

Bati ’’uhagarara mu Nyakabanda ukumva ibivugirwa ku musigiti wo kwa Kaddafi mu museso, ubwo se urwo si urusaku ? Ko ntawe urababuza, cyagwa ngo ajye kumanura indangururamajwi zabo ? Ariko ibikoresho by’abaririmbyi bacu, muzabisanga muri polisi no ku biro by’umurenge.”

Sheikh Habimana Saleh umuyobozi mu Kigo cy’Igihugu cy’imiyoborere (RGB) ufite amadini mu nshingano ze, yatangarije IGIHE ko nta dini na rimwe ryemerewe gusakuriza abaturage.

Yagize ati ’’Kiriya cyemezo kirareba insengero n’amadini yose, hatavuyemo n’umwe, kuko Leta y’u Rwanda nta muco wo gutonesha bamwe ngo abandi barenganywe igira ; iyo hatunzwe urutoki ruba rureba buri wese.”

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO