IGIHE.com > Amakuru > U Rwanda
Iburengerazuba : Buri karere kagiye kugira batayo y’Inkeragutabara

Iburengerazuba : Buri karere kagiye kugira batayo y’Inkeragutabara


Yanditswe kuya 20-02-2013 - Saa 18:11' na IGIHE

Bimaze kugaragara ko Inkeragutabara zifite uruhare runini mu gucunga umutekano cyane cyane mu gukora amarondo kandi bagahora biteguye gukora ubutumwa aho ari ho hose mu gihugu no mu mahanga, umuyobozi wazo mu Ntara y’Iburengerazuba Colonel John Tibesigwa ku ya 19 Gashyantare 2013 yarazisuye avuga ko muri buri murenge hagomba gutoranywamo abatarengeje imyaka 45 kandi bafite ubuzima bwiza bagakora batayo (bataillon) igizwe n’abasirikari 600 bazajya bafasha mu gucunga umutekano w’akarere bakanatabara igihe bibaye ngombwa.

Colonel John Tibesigwa Uyobora Inkeragutabara mu Ntara y'Iburengerazuba II mu kiganiro n'inkeragutabara mu Karere ka Nyamasheke

Izi nkeragutabara kandi zakanguriwe kwitabira gahunda zose za Leta kuko ari bo bigirira akamaro. Aha Umuyobozi wabo yababwiye ko nk’Abanyarwanda bose Inkeragutabara ikwiye kuba ifite umusanzu w’ubwisungane mu kwivuza.

Kugira ngo ibyo babigereho bagomba kwitabira amakoperative, kandi ubumenyi bahawe na Komisiyo y’Igihugu ishinzwe gusubiza abasirikare mu buzima busanzwe bakabukoresha mu kwiteza imbere kuko hari abize ubwubatsi, gukora amazi, gutwara ibinyabiziga n’ibindi byabagirira akamaro.

Bamwe mu Nkeragutabara bari muri iki kiganiro

Ibi kandi bijyana no kubungabunga ubuzima bwabo no kwipimisha ku bushake virusi itera SIDA nk’uko Colonel Tibesigwa yakomeje abibakangurira. Yababwiye ko batagomba guhungabanywa n’ibihuha by’umutekano muke uri mu gihugu cy’abaturanyi cya Congo, kuko mu Rwanda umutekano ari wose ahubwo igikenewe ari uko abaturage bakomeza gutera imbere no kuzamura imibereho yabo.

Ni inkuru dukesha Denys Basile Uwingabiye, umukozi w’Akarere ka Nyamasheke

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO