IGIHE.com > Amakuru > U Rwanda
Kigali: Abacamanza  barahugurwa ku itegeko mpuzamahanga ry’uburenganzira bwa muntu

Kigali: Abacamanza barahugurwa ku itegeko mpuzamahanga ry’uburenganzira bwa muntu


Yanditswe kuya 28-01-2013 - Saa 18:54' na Emmanuel Kanamugire

Abacamanza bo mu nkiko z’ibanze bo mu Karere ka Muhanga, batangiye amahugurwa y’iminsi ibiri kuri uyu wa 28 Mutarama 2013 abera i Kigali ku gushyira mu bikorwa amasezerano mpuzamahanga agenga uburenganzira bwa muntu mu byemezo bafata ku kazi kabo ka buri munsi.

Aya mahugurwa yateguwe n’ikigo gikurikirana ishyirwa mu bikorwa ry’amategeko hagamijwe iterambere (ILPD ), ku bufatanye n’Ishami rya Loni rishinzwe iterambere (UNDP). Yitabiriwe n’abacamanza bagera kuri 30.

Ku munsi wa mbere w'amahugurwa

Umuyobozi w’Urukiko rw’Ikirenga Prof Rugege Sam, afungura aya mahugurwa yatangaje ko agamije guha abacamanza ubumenyi ku bijyanye n’uburenganzira bwa muntu; kugira ngo bumve neza uruhare rwabo mu kubwubahiriza mu byemezo bafata hagamijwe gutanga ubutabera bunoze ku babagana.

Bumwe muri ubu burenganzira harimo ubwo kwiregura, gufatwa nk’umwere kugeza igihe hagaragariye ko hari ibimenyetso biguhamya icyaha n’ibindi.

Kuba abacamanza bo mu nkiko z’ibanze zo mu Karere ka Muhanga ari bo bahereweho, Prof Rugege avuga ko atari uko ari ho hari ibibazo ko ahubwo ari gahunda izagera mu gihugu hose.

Yavuze ko amahugurwa nk’aya yahereye ku bacamanza bo mu Rukiko Rukuru, ubu abagezweho bakaba ari abo mu nkiko z’ibanze n’izisumbuye.

Umuyobozi uhagarariye Ishami rya Loni rishinzwe iterambere mu Rwanda Auke Lootsma, yavuze ko kubungabunga uburenganzira bwa muntu ari imwe mu nkingi eshatu Loni yubakiyeho nyuma y’amahoro, umutekano n’amajyambere.

Yavuze ko urubanza urwo ari rwo rwose rugomba kuburanishwa hitawe ku bwisanzure n’uburenganzira bwa muntu, kuko bitagenze gutyo nta butabera buba buhari.

Lootsma yavuze ko inkiko zo mu Rwanda zigomba kubahiriza amasezerano mpuzamahanga ku burenganzira bwa muntu u Rwanda rwashyizeho umukono nk’uko binateganywa n’ingingo y’190 y’tegekonshinga ry’u Rwanda. Aya masezerano yemerera buri muturage uburenganzira bwo kurenganurwa imbere y’inkiko zo mu gihugu.

Kuri ubu u Rwanda rurashimirwa intambwe rwateye, aho mu isuzuma ryo mu mwaka wa 2011 byagaragaye ko rwashyize mu bikorwa imyanzuro yatanzwe n’agashami ka Loni gashinzwe igenzura ry’ishyirwa mu bikorwa ry’amahame y’uburenganzira bwa muntu hejuru ya 90%.

Bimwe mu byo u Rwanda rwasabwaga harimo kuvugurura inzego z’ubutabera, no gushyigikira ubwisanzure bwazo. U Rwanda ibi byose rwabishyize mu bikorwa.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO