IGIHE.com > Amakuru > U Rwanda
U Rwanda rwabonye miliyoni 60 zo gukwirakwiza amashanyarazi mu Rwanda

U Rwanda rwabonye miliyoni 60 zo gukwirakwiza amashanyarazi mu Rwanda


Yanditswe kuya 20-02-2013 - Saa 11:51' na IGIHE

Inama y’ubutegetsi ya Banki y’Isi, ku wa 19 Gashyantare 2013 yemeje ko miliyoni 60 z’amadolari ya Amerika zihabwa u Rwanda zikongerwa mu bikorwa byo kugeza amashanyarazi ku Banyarwanda no kongera urumuri ahantu hahurira abantu benshi nko mu bigo by’amashuri, amavuriro n’ibitaro.

Itangazo dukesha intumwa y’u Rwanda muri Banko y’isi rigaragaza ko aya mafaranga y’inguzanyo azatangwa n’ishyirahamwe mpuzamahanga ry’iterambere (International Development Association-IDA), ikigega cya banki y’Isi gifasha ibihugu bikennye kurusha ibindi.

Porogaramu yo kugeza amashanyarazi ku baturage mu Rwanda yatumye kugeza mu Kuboza 2012 amashanyarazi yari amaze kugera ku ngo 332 000, zivuye ku 110 000 muri 2009. Aya mafaranga azafasha kongera umubare w’ababona amashanyarazi, hashyirwa mu bikorwa umurongo leta yihaye wo gukwirakwiza amashanyarazi mu gihugu hose.

Amashanyarazi afatwa nka kimwe mu bintu by’ingenzi byakwihutisha iterambere, icyakora haracyari inzira ndende ngo agere kuri benshi mu Rwanda nk’uko Carolyn Turk uhagarariye Banki y’Isi mu Rwanda abisobanura agira ati “Abatuye mu byaro bakeneye amashanyarazi mu ngo, mu mirimo y’ubukungu, mu mavuriro no mu bitaro.”

Turk akomeza avuga ko igihe cyose nta mashanyarazi azaba ari mu byaro by’u Rwanda gahunda z’igihugu z’iterambere zitazashoboka, kuko ibikorwa remezo nk’amashuri, amavuriro n’ibitaro bidashobora kuzatera imbere nta mashanyarazi ahari.

Imibare igaragaza ko gukwirakwiza amashanyarazi mu Rwanda byihuta. Urugero rukaba ni uko hagati ya 2009 na 2012 ingo zirimo amashanyarazi zavuye ku 110 000 zikagera ku 332 000, bivuze ko ziyongereyeho 222 000.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO