IGIHE.com > Amakuru > U Rwanda
Abafite ubumuga ntibakwiye guhabwa akato – Rusiha Gaston

Abafite ubumuga ntibakwiye guhabwa akato – Rusiha Gaston


Yanditswe kuya 29-12-2012 - Saa 08:54' na Olivier Rubibi

Abanyarwanda bakwiye kureka guha akato abafite ubumuga kuko na bo ari abantu nk’abandi kandi na bo bashoboye, ntaho bakwiye guhezwa.

Ibi Rusiha Gaston, Perezida w’Inama Nkuru y’abafite ubumuga, yabitangaje mu gikorwa cyo gusabana n’abana bafite ubumuga, babifuriza iminsi mikuru myiza ndetse no gutangira umwaka wa 2013 neza, ibirori byabereye kuri Sitade ntoya i Remera.

Rusiha aganira n’abanyamakuru yavuze ko abana bafite ubumuga ari abantu nk’abandi, kuko uretse kuba bafite ubumuga ibindi byose babishoboye. Akomeza avuga ko mu Rwanda hakiri ingeso mbi yo guha akato abafite ubumuga.

Rusiha yatanze ingero z’aho imiryango myinshi y’Abanyarwanda ikomeje kugumisha mu bikari abana bafite ubumuga, aho badashyirwa mu mashuri batabuze ubwenge, ahubwo ari ukubera ko ababyeyi baba bavuga ko ntacyo umwana azamumarira n’ibindi…. Ati “Aka ni ko kato kabi cyane.”

Cyuzuzo Francois Xavier waje aturutse mu karere ka Kamonyi ufite imyaka 18 yatangarije abanyamakuru ko na we ajya ahura n’akato, nk’aho ajya ku muhanda kubona imodoka ntibimworohere n’igihe ayiboneye abayirimo bakazajya bamuryanira inzara, bamwe ntibanatinye kubaza konvwayeri aho bamujyana n’igare rye.

Cyuzuzo yagize ati “Abantu bafite ubumuga bakwiye gushakirwa ubundi buryo bw’uko bazajya bagendamo, kandi n’abantu bakamenya ko natwe turi abantu nk’abandi.”

Gakwanzire Godeleva ufite abana batatu bafite ubumuga avuga ko ufite aba ari umuntu usanzwe. Ati “Ubumuga ntabwo ari indwara umuntu aba yaranduye nk’uko Abanyarwanda bamwe babitekereza.”

Gakwanzire yavuze ko abana be bataratangira gufashwa n’abagiraneza bibumbiye mu muryango CEFAPEC, abaturanyi bari baramuhaye akato. Ati “Ababyeyi babuza abana babo gusura abanjye, bakeka ko ari ibintu banduye. Batangiye kubegera igihe umushinga CEFAPEC utangiriye kudufashiriza."

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO