IGIHE.com > Amakuru > U Rwanda
Abakorera ahahurira abantu benshi batewe impungenge no kudasobanurirwa uko bakwitwara igihe habaye impanuka

Abakorera ahahurira abantu benshi batewe impungenge no kudasobanurirwa uko bakwitwara igihe habaye impanuka


Yanditswe kuya 5-02-2013 - Saa 15:49' na Christophe Hitayezu

N’ubwo impanuka ziba zitunguranye zigatwara ubuzima bw’abantu zikanangiza byinshi, hari abagana ahantu hahurira abantu benshi mu Mujyi wa Kigali batazi icyo bakora ngo bakize ubuzima bwabo igihe habaye impanuka cyangwa ibindi bibazo bishobora kubatwara ubuzima.

Nyuma y’uko inkongi y’umuriro yibasiye zimwe mu nzu zihuriramo abantu benshi nk’utubyiniro, isoko rya Bujumbura mu Burundi n’izindi, twasuye isoko rikuru rya Kigali riri mu Karere ka Nyarugenge rihuriramo abantu benshi ; ariko abo twaganiriye batubwiye ko nta buryo bazi babasha gukiza ubuzima bwabo igihe habaye impanuka muri iri soko.

Isoko rishya rya Nyarugenge kimwe n'izindi nzu ndende ni hamwe mu hahurira abantu benshi ariko abarikoreramo ntibanazi icyababwira ko hari ikintu kibi gitunguranye

Ikigaragara ni uko nta cyo bazi ku bwirinzi bw’ibanze, nk’uko Honore Jean Pierre ucururiza muri iri soko yabitubwiye. Avuga ko nta kintu na kimwe azi cyamuburira igihe habaye ikibazo cy’impanuka, ibi kandi akaba abihuriyeho na Hategekimana Bosco, umwe mu baguzi baganiriye na IGIHE na we uvuga ko nta kintu azi yakora ngo yirengere igihe habaye ikibazo.

N’ubwo Kanyamugenga Phenias, umuyobozi w’abashinzwe umutekano w’iri soko na Muyizere Louis ukora mu rwego rushinzwe iby’amazi n’umuriro muri iri soko bavuga ko ibikoresho byo kwitabara bihari bihagije, abaricururizamo n’abaguzi ntibabizi ndetse ntibanazi icyababurira ko hagiye kuba impanuka cyangwa hari ikibazo runaka ngo babashe kwirwanaho.

Ku ruhande rw’ubuyobozi bw’iri soko, twashatse kuvugana n’umuyobozi waryo ngo atubwire niba hari igiteganywa cyo kumenyesha abantu uko bakwitwara igihe habaye ikibazo ariko ntibyashoboka.

N’ubwo uyu muyobozi nta cyo yadutangarije ariko, mu nyubako zihuriramo abantu benshi hakwiye kujyaho uburyo bwigisha abantu uko bakwitwara mu bihe runaka by’umwihariko nk’igihe habaye impanuka.

Byaba byiza nk’uko abakorera mu Isoko rya Nyarugenge babivuga habayeho uburyo bwo gukoresha ‘écran’ zitangirwaho amasomo y’uko umuntu ugeze aho akwiye kwitwara, ni ukuvuga ibyo akwiye kwirinda gukubaganya, cyangwa uko akwiye kwitwara igihe habaye ikintu gitunguranye.

Ikindi gishoboka ni uguhugura abakorera aho hantu ku bintu bagomba kwitwararika, ku buryo niba ari umucuruzi yabasha kuburira abakiliya be igihe haje ikibazo gitunguranye.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO