IGIHE.com > Amakuru > U Rwanda
Abana basaga Miliyoni 1,6 bari munsi y’imyaka itanu barahabwa inzitiramibu ziteye umuti

Abana basaga Miliyoni 1,6 bari munsi y’imyaka itanu barahabwa inzitiramibu ziteye umuti


Yanditswe kuya 30-01-2013 - Saa 16:32' na IGIHE

Leta y’u Rwanda ikomeje gushyira imbaraga, mu kurinda indwara ya Malariya abaturarwanda bose. Ni muri urwo rwego Minisiteri y’Ubuzima yateguye igikorwa cyo gutanga inzitiramibu ku bana bose bari munsi y’imyaka itanu. Icyo gikorwa kirabera mu gihugu hose, ahantu (site) hasanzwe hakorerwa ibikorwa bya gahunda zidasanzwe z’ubuzima kuva ku itariki ya 29 kugeza kuya 30 Mutarama 2013.

Mbere y’uko itangwa ry’izo nzitiramibu ritangira, habanje igikorwa cyo kubarura abana bose bari munsi y’imyaka itanu, ku bufatanye bw’abajyanama b’ubuzima hamwe n’inzego z’ibanze. Ibarura ry’abo bana rifasha kumenya umubare nyakuri w’abana bari munsi y’imyaka itanu bagomba guhabwa inzitiramibu zikoranye umuti kugira ngo hatagira ucikanwa n’iyo gahunda y’ingirakamaro.

Iyi gahunda idasanzwe, yateguwe kugira ngo abana bose bari munsi y’imyaka itanu, bagezweho inzitiramibu ku buryo bwihuse mu gihe cy’iminsi ibiri gusa, kuko bari mu cyiciro cy’abantu bazahazwa cyane na Malariya kurusha abandi.

Gahunda yo gutanga inzitiramibu kuri buri muryango no gushishikariza abanyarwanda bose kuziryamamo buri joro, yagaragaje umusaruro ushimishije mu kugabanya indwara ya Malariya mu Rwanda, nk’uko ubushakashatsi bwagiye bukorwa burabigaragaza.

Kuva mu mpera z’umwaka wa 2009 kugeza ubu, hamaze gutangwa inzitiramibu zikoranye umuti zirenga miliyoni icyenda, zikaba zaragize uruhare runini mu kugabanya Malariya.

Gahunda y’igihugu yo kurwanya Malariya ikomatanya ikoreshwa ry’inzitiramubu, ubuvuzi bwihuse kandi bufite ireme hakoreshejwe umuti ufite ubushobozi bwizewe bwo guhangana n’agakoko gatera Malariya, ubukangurambaga buhoraho bugamije kwigisha abantu bose uburyo bwo kuyirinda cyane cyane bubakangurira kuryama mu nzitiramibu ikoranye umuti, gukora isuku aho batuye hagamije gusenya ahantu hose imibu itera udukoko twa Malariya ishobora kororokera, gukinga inzugi n’amadirishya bukigoroba no kwivuza neza kandi hakiri kare mu gihe bagize ibyago byo kurwara Malariya.

Biteganyijwe ko iyi gahunda isozwa abana bari mu nsi y’imyaka itanu bagera kuri Miliyoni imwe n’ibihumbi Magana atandatu na kimwe Magana atanu makumyabiri na bane (1,601,524).

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO