IGIHE.com > Amakuru > U Rwanda
Abanyarwanda biga mu Buholandi mu kwibuka Jenoside yakorewe Abatutsi

Abanyarwanda biga mu Buholandi mu kwibuka Jenoside yakorewe Abatutsi


Yanditswe kuya 14-04-2013 - Saa 09:31' na IGIHE

Ku wa kane taliki ya 11 Mata 2013, abanyeshuri, abarimu n’abakozi bo mu ishuri ryigisha ibijyanye n’ubumenyi bw’amazi (UNESCO-IHE, Institute for Water Education), bibutse Jenoside yakorewe Abatutsi mu Rwanda mu 1994.

Iki gikorwa gitegurwa buri mwaka mu cyumweru cyahariwe kwibuka Jenoside yakorewe abatutsi mu Rwanda mu mwaka wa 1994, ku bufatanye hagati y’ishyirahamwe ry’abanyeshuri b’Abanyarwanda biga kuri iri shuri UNESCO-IHE, riherereye i Delft mu gihugu cy’u Buholandi n’ubuyobozi bw’iyi Kaminuza ndetse na Ambasade y’u Rwanda mu Buholandi.

Nk’uko tubikesha abanyarwanda bari Delft mu Buholandi, iki gikorwa kandi cyitabiriwe n’abantu b’ingeri zinyuranye, barimo abanyeshuri b’Abanyarwanda, bagenzi babo baturuka mu bindi bihugu, abayobozi n’abakozi b’iri shuri, ndetse hari n’abaturage b’Abaholandi bitabira iki gikorwa. Uko imyaka igenda ishira kandi ni na ko ubwitabire burushaho kwiyongera nk’uko byagaragaye ku wa kane ku wa 11 Mata 2013, aho umubare w’abitabiriye iki gikorwa warutaga u’wabari bacyitabiriye umwaka ushize wa 2012.

Iki gikorwa kandi cyaranzwe n’ubuhamya, amagambo y’abanyeshuri bahagarariye bagenzi babo, umuyobozi mukuru wa UNESCO-IHE ndetse n’intumwa yari yaserukiye Ambasade y’u Rwanda mu Buholandi.

Abitabiriye iki gikorwa bunamiye, mu gihe cy’umunota umwe, abazize Jenoside yakorewe Abatutsi, bacana urumuri ruhagarariwe na buji (bougies/candles) eshanu zigaragaza Jenoside 5 zabaye ku Isi, hanacanwa n’izindi 19 zishushanya imyaka 19 ishize habaye Jenoside yakorewe Abatutsi mu Rwanda. Urumuri rushushanya icyizere cy’ejo hazaza nyuma y’ibibazo by’inzitane igihugu cyanyuzemo.

Hanerekanwe sinema igaragaza amahano yabaye mu Rwanda muri 1994 ndetse n’aho u Rwanda rugeze ubu rwikura mu bibazo, runiteza imbere bijyanye n’insanganyamatsiko y’uyu mwaka "Twibuke Jenoside yakorewe Abatutsi duharanira kwigira".

Evariste Kabandana uhagarariye abanyeshuri b’Abanyarwanda biga mu Buholandi, yasobanuye ko impamvu yo kwibuka Jenoside yakorewe Abatutsi mu Rwanda ndetse n’izindi Jenoside zabaye ku Isi, ari ukwamagana ibyabaye no guharanira ko bitazongera ukundi.

Umuyobozi w’ishyirahamwe ry’abanyeshuri ba UNESCO-IHE yavuze ko bibabaje kubona ukuntu Abatutsi bishwe mu Rwanda bazira uko bavutse (identity). Yongeyeho ko abakoze amahano bagomba kubihanirwa ndetse n’abagizweho ingaruka na Jenoside bakabona ubutabera. Yarangije ashimangira akamaro k’ubumwe n’ubwiyunge mu banyarwanda anasaba abantu bose kwamagana Jenoside.

Mu buhamya bwe, Guy Beaujot ufite nyina warokotse Jenoside yakorewe Abayahudi akaba afite ubwenegihugu bw’u Bubiligi ndetse akaba n’umukozi wa UNESCO-IHE, yibanze ku byabereye i Murambi mu majyepfo y’u Rwanda, ashingiye ku mafoto n’amakuru yagiye akusanya, dore ko amaze no gusura u Rwanda inshuro eshatu. Yifashishije amashusho anyuranye, mu nyerekwaruhame (documentary) uyu mutangabuhamya yagaragaje ububi bwa Jenoside n’ingaruka zayo, anongeraho ko nta gishobora kumubuza gutanga ubuhamya igihe cyose akiri kuri iyi si.

Uhagarariye kaminuza UNESCO-IHE, Prof. András Szöllösi-Nagy, yagarutse ku buhamya yahawe na mushiki we wari mu Rwanda mbere gato y’uko Jenoside itangira. Aha yavuze ko uwo muvandimwe we yamwandikiye ibaruwa amugaragariza ko hari amahano yarimo ategurwa. Yasoje agaragaza ko nta gikwiye gutandukanya abantu icyo ari cyo cyose, ko ahubwo hakwiye kubaho ubwuzuzanye.

Guillaume Kavaruganda wari uhagarariye Ambasade y’u Rwanda mu Buholandi mu ijambo nyamukuru yagejeje ku bari aho, yasobanuye ko kwibuka bifite akamaro kanini mu kumenya ibyabaye no kubifataho isomo. Yanasabye kandi ko abagize uruhare muri Jenoside bahanwa cyane cyane ku bufatanye n’ibihugu byose byo ku Isi, ikibazo ni uko byinshi muri byo bikaba bigicumbikiye abakoze Jenoside.

Kavaruganda yanasobanuye aho u Rwanda rugeze rwiyubaka, aho yavuze ko ubu buri munyarwanda aho ari hose ku Isi ashimishwa no kwitwa umunyarwanda. Yasoje ashima ubufatanye bugagaragara muri iyi Kaminuza mu bikorwa byo kwibuka Jenoside anashimira abitabiriye iki gikorwa bose.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO