IGIHE.com > Amakuru > U Rwanda
Abanyeshuri ba kaminuza barinubira serivise bahabwa muri CHUK

Abanyeshuri ba kaminuza barinubira serivise bahabwa muri CHUK


Yanditswe kuya 1er-04-2013 - Saa 12:47' na IGIHE

Bamwe mu banyeshuri biga muri Kaminuza Nkuru y’u Rwanda (NUR) batangaza ko baravuga ko kwivuriza ku bitaro bikuru bya Kaminuza bya Kigali (CHUK) bibagora cyane, kuko ngo amakarita yabo yo kwivurizaho adakoreshwa ku bigo nderabuzima.

Aba banyeshuri baravuga ko amakarita y’ubwisungane mu kwivuza bafite, batayakoresha ku bigo nderabuzima, bityo abigira mu mujyi wa Kigali, rimwe na hari abagera kuri CHUK, bakababwira ko indwara yabo idakomeye, bagahabwa igihe cyo kuzagarukiraho kandi umurwayi we yarakeneye ubufasha.

Aba banyeshuri bavuga ko babwirwa kuzagaruka kenshi, ugasanga CHUK itabitaho nk’uko bita ku baba boherejwe n’andi mavuriro (transfer) ; abanyeshuri bakavuga ko babirenganiramo kandi ariho honyine bemererwa kwivuriza.

Umwe muri aba banyeshuri utarashatse kwivuga amazina ye, aganira na IGIHE yagize “Naje kwivuza ndwaye umutwe, bambwira ko ngomba kugaruka nyuma y’iminsi itatu, nahise mbura icyo nkora kuko numvaga meze nabi, nyamara umuganga we akambwira ko ntarembye, byatumye nibaza ukuntu umuntu aremba undi akamubwira ko adakeneye ubufasha bwihutirwa.”

Ubwo IGIHE yahamagaragaga ubuyobozi bushinzwe ubwisungane bwo kwivuza muri Kaminuza Nkuru y’u Rwanda, bwaba bukorana n’ubuyobozi bw’ibitaro mu gukemura ibi bibazo aba banyeshuri bahura nabyo, ntibifuje kugira icyo babitangazaho.

Umuyobozi mukuru w’ibitaro bya CHUK, Dr Hategikimana Theobald, we avuga ko iki kibazo abanyeshuri bahura atari akizi, ariko asaba abanyeshuri kujya babivuga mu gihe hari icyo bahuye nacyo, nko kubimenyesha ubuyobozi bw’ibitaro bigashakirwa ibisubizo.

Yagize ati “Sinumva impamvu aba banyeshuri babona ibibazo nk’ibi bakabyihererana, abantu baturuka kure mu gihugu bamaze kumenyera ko mu gihe havutse ikibazo nk’iki, bakoresha inomero ziba ziri aho, bagasaba ubufasha, ubwo aba nabo bakwiye kujya bakoresha uburyo bwose bushoboka tukabimenya kuko banajijutse.”

Nubwo ariko havugwa ibi, haracyari benshi batishimira igihe babwirwa kugaruka kwivurizaho, aho bavuga ko bahabwa igihe kirekire, ariko ubuyobozi bw’ibitaro bwo bukavuga ko biterwa n’abaganga bake baba bafite abarwayi benshi, bigatuma aba banyeshuri batubwira ko bahitamo kujya kwigurira imiti hanze, mu gihe baba baratanze amafaranga y’ubwisungane ibihumbi birindwi.

Ku bitaro bya CHUK(Ifoto/internet)
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO