IGIHE.com > Amakuru > U Rwanda
Abasigajwe inyuma n’amateka barasabwa kuyoboka ubuhinzi

Abasigajwe inyuma n’amateka barasabwa kuyoboka ubuhinzi


Yanditswe kuya 25-05-2012 - Saa 09:22'

Rusizi : Nyuma y’uko imiryango 91 y’abasigajwe inyuma n’amateka yo mu Karere ka Rusizi mu Murenge wa Nkungu ihawe n’ubuyobozi bw’uwo murenge hegitari 3 z’ubutaka bwo guhinga ; kuwa kane iyo miryango yashyikirijwe ibikoresho by’ubuhinzi birimo amasuka yo guhingisha.

Iki gikorwa cyo kubaha amasuka kiri mu rwego rwo kubafasha kuyoboka umwuga w’ubuhinzi kuko bari bakomeje kugaragaza ko uw’ububumbyi utagishoboye kubabeshaho mu buzima bwabo.

Ndagijimana Andereya na Consesa Mukarurangwa batangaje ko bari basanzwe bakora umurimo wo kubumba inkono ariko ko bari bageze aho babona ntacyo ubamariye kuko bawurengangaho bakajya gusabiriza, ariko nyuma yaho ubuyobozi bubagobokeye, bukabaha isambu, ndetse n’amasuka ngo barumva bafite icyizere cy’imibereho myiza y’ejo hazaza kuko inzara yatumaga n’abana batabasha kujya mu mashuri, ubundi se ugasanga badashobora kwikemurira n’utubazo duto duto.

Bavuga ko kuyoboka ubuhinzi bizabafasha kurwanya ubukene kimwe n’abandi banyarwanda kuko ntakigoranye, ngo ahubwo bazajya bareba n’uko abandi babikora, naho ubundi ngo ni igisubizo cyiyongera ku bumenyi bahawe bwo guhinga ibihumyo ndetse n’ubukorikori bwo gukora imitako mu ibumba.

Ndorimana Clement ushinzwe ubuhinzi muri Nkungu, avuga ko ubuyobozi bwahisemo kubakurikirana kuko mu gihe gishize byari bikomeje kugaragara ko imibereho yabo itari myiza, nta nicyo bo ubwabo bakora ngo batere imbere, bityo bahitamo kubashakira uburyo bakiteza imbere.

Agira ati : “Iyo warebaga uko bahugira mu mwuga wo kubumba inkono kandi ugasanga umusaruro uziturukaho utabasha kubarangiriza ibibazo, ubundi ugasanga bayoboka inzira yo gusabiriza, byatumye ubuyobozi bw’umurenge butewe inkunga n’ubw’akarere, dufata icyemezo cyo kubashakira imishinga yabafasha. Imwe muri iyo mishinga ni uw’ubuhinzi, bityo twabashakiye ubutaka bungana na hegitari 3, ari nayo mpamvu uyu munsi twabahaye amasuka yo kuzajya bahingisha kuko byatugaragariraga ko nta bushobozi bafite bwo kuyigurira.”

Yongeyeho ati : "Ibi byiyongera ku mushinga twabigiye w’ubworozi bw’inzuki, ku bufatanye na MIDIMAR, bashyikirijwe imizinga 60 ya kijyambere, tubaha inka ebyiri za kijyambere ndetse ubu zamaze kubyara zombi, ku buryo abandi babiri bagiye korozwa.”

Umurenge wa Nkungu ubarurwamo imiryango 91 y’abasigajwe inyuma n’amateka. Uretse ibikoresho by’ubuhinzi bahawe, banashyikirijwe imiziga 60 ya Kijyambere, n’isambu ya hegitari 3.

Koperative yabo yigishijwe gukora ubuhinzi bw’ibihumyo n’ubukorikori bushingiye ku bubumbyi bugezweho, banahawe inka 2 za kijyambere, ubwo Radio Rwanda yaganiraga nabo, bayitangarije ko izo nka zombi zamaze kubyara, zikazabafasha kwitabiri n’ibikorwa by’ubworozi kimwe n’abandi banyarwanda.

Jean Pierre NIYIBIZI/ Ushinzwe itangazamakuru mu Karere ka Rusizi

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO