Abasirikare 357 b’umutwe wihariye wa gisirikare batahutse

Abasirikare b’u Rwanda (RDF) b’umutwe udasanzwe (special forces) bari baragiye gufatanya n’ingabo za Congo Kinshasa FARDC guhashya FDLR, zatahutse.

Ahagana saa kumi z’umugoroba ni bwo ingabo 357 z’u Rwanda ziherekejwe na Brig. Gen. Licie Bauma Ambamba ndetse na Col. Yave bo muri FARDC, zari zisesekaye ku mupaka wa Kabahanga mu kagari ka Mutovu, Umurenge wa Bugeshi, Akarere ka Rubavu.

Izi ngabo zinjiye n’imizigo yazo mu bikapu ku migongo, bagenda ku murongo hagati y’umuntu n’undi harimo umwanya ubona ko ungana, bakiriwe n’abaturage benshi batuye uyu murenge n’amashyi n’impundu ndetse n’abayobozi bakuru mu gisirikare cy’u Rwanda bari bayobowe n’Umugaba Mukuru w’ingabo, Lt. General Kayonga Charles.

Ubwo izi ngabo zinjiraga zari zambaye umwambaro wa gisirikare w’ingabo za Congo Kinshasa (FARDC) zigeze ku butaka bw’u Rwanda zahabwa umwambaro mushya w’ingabo z’u Rwanda (RDF).

Umugaba mukuru w’ingabo z’u Rwanda Lt. Gen. Kayonga wari waje kwakira izi ngabo z’umutwe udasanzwe (special forces) wa gisirikare mu ngabo z’u Rwanda yabanje kubaririmbira indirimbo aho yagiraga ati “Ikaze mu gihugu cyanyu cyababyaye, u Rwanda mwasigiwe n’abasokuru.”

Yabashimiye uburyo bitwaye mu gikorwa cyo kugarura umutekano muri kariya gace ka Kivu y’Amajyaruguru.

Yagize ati “Tubashimiye uburyo mwitwaye mu mezi 9. Musoje amahoro ubutumwa mwatumwe n’Abanyarwanda, turabashimiye ndetse n’Abanyekongo barabashimira kubera ko ibyo mwakoraga ari bo byari bifitiye akamaro cyane. Bibaye ngombwa gutahuka, kubera ko aho mwakoreraga nta mutekano ugihari ; ingabo za Congo zatangiye gusubiranamo na M23. Ni yo mpamvu mutashye mu rwababyaye.”

Umuvugizi w’ingabo z’u Rwanda, Brig. Gen. Nzabamwita Joseph yatangarije abanyamakuru ko aba basirikare batahutse bari bamaze amezi agera kuri 9 muri Congo Kinshasa, bakaba bari mu gikorwa cyo kurwanya imitwe yitwaje intwaro muri kariya gace ko muri Kivu y’Amajyaruguru.
Ati “Kubera umutekano muke uri muri kariya gace bibaye ngombwa ko abasirikare bacu bagaruka.”

Nyuma y’urugendo n’amaguru ingabo z’u Rwanda zakoze, zageze mu Rwanda ubona ko bagifite imbaga nyuma yo kwakirwa n’abaturage b’Akarere ka Rubavu, baje gushyiraho morale nk’uko bisanzwe.

Sgt Innocent waganiriye na IGIHE yavuze ko bakoze urugendo rungana n’ibirometero 120 ati “Twebwe ntabwo tujya tunanirwa n’i Kigali twahataha mu kanya nk’ako guhumbya.”

Uko abaturage babyakiriye

Ayinkamiye Christine, umwe mu baturage bari baje kwakira ingabo z’u Rwanda, yatangaje ko yishimye kubona bavugaga ko ingabo z’u Rwanda zifasha inyeshyamba za M23, nyamara barabeshyaga ahubwo zifasha abasirikare ba Congo ati “Biratangaje cyane.”

Iki gikorwa ingabo z’u Rwanda 357 zari zihuriyeho n’izindi 357 za FARDC cyaturutse ku bwumvikane bw’ibihugu byombi mu mwaka wa 2009, gitangira gushyirwa mu bikorwa mu 2011.