IGIHE.com > Amakuru > U Rwanda
Agaciro ka muntu iyo kubahirizwa Jenoside ntiyari kuba -Nirere Madeleine

Agaciro ka muntu iyo kubahirizwa Jenoside ntiyari kuba -Nirere Madeleine


Yanditswe kuya 14-04-2013 - Saa 08:30' na Deus Ntakirutimana

Iyo Abanyarwanda bakangurirwa kubahiriza uburenganzira bwabo n’ubwa bagenzi babo bakanabikurikiza, ntibaba barakoze Jenoside yakorewe Abatutsi. Ni muri urwo rwego Komisiyo ifite uburenganzira bwa muntu mu nshingano zayo, yiyemeje gukangurira buri munyarwanda wese kuzirikana iryo yubahirizwa, gukumira no kurwanya icyo ari cyo cyose gihutaza uburenganzira bwa muntu, cyane cyane Jenoside n’ingengabitekerezo yayo.

Mu muhango wo kwibuka Abatutsi bazize Jenoside yabakorewe mu 1994 wabereye ku cyicaro cya Komisiyo y’igihugu y’uburenganzira bwa muntu, ku wa Gatanu tariki ya 12 Mata 2013, Nirere Madeleine Perezida w’iyi Komisiyo yavuze ko igikorwa cyo kwibuka bakoze ari ukwifatanya n’abandi banyarwanda mu kwibuka Jenoside yakorewe Abatutsi, no gusubiza amaso inyuma kw’iyi Komisiyo, ikareba uburyo ishyira mu bikorwa inshingano zayo.

Nirere agira ati “Iyo Abanyarwanda batozwa kubaha uburenganzira bwabo n’ubwa bagenzi babo, kandi bakabishyira mu bikorwa, nta Jenoside yari kubaho, kuko uzi uburenganzira bwa mugenzi wawe ukanabwubahiriza utamwica.”

Nirere kandi avuga ko iyi Komisiyo idacecetse mu gukomeza kurwanya Jenoside n’ingengabitekerezo yayo, kuko ikomeje gukora ibikorwa biri mu nshingano zayo, birimo kwigisha amasezerano mpuzamahanga yerekeye kurwanya Jenoside no kuyihana, ikangurira Abanyarwanda kwirinda ibyo byaha kuko bihanwa n’amategeko. Inigisha itegeko rihana icyaha cy’ivangura n’amacakubiri n’irihana ingengabitekezo ya Jenoside. Ikindi kandi Komisiyo ibakangurira uburenganzira bwabo no kubahiriza ubw’anbandi, aho inigisha amasezerano mpuzamahanga ku cyaha cya Jenoside.

Senateri Antoine Mugesera yasobanuriye abari aho ko Jenoside yatewe n’urwango rwabibwe mu banyarwanda, aho Leta yariho yifashishije abaturage ngo ibone uko irimbura Abatutsi mu gihe gito. Kagira ati “Uroha abaturage muri ubu bwicanyi, ni kimwe mu bituma itandukanye n’izindi Jenoside zabaye mu bindi bihugu, kuko ho usanga abaturage batarashorwaga muri ubwo bwicanyi. Urugero ni uko iy’Abayahudi yakozwe ku buryo bugaragara na Leta, yifashishije abapolisi n’abasirikare.”

Mugesera yavuze ko abazungu bajya gutandukanya Abanyarwanda batanze ibuku (book) yari yanditsemo ubwoko bwanagaragaramo muri aka gatabo, ari bwo bwanditse mu Kinyarwanda gusa, mu gihe ibindi byari byanditse mu gifaransa.

Gusa ngo n’ubu bwoko bwari bwanditsemo si ubwo bazanye nyuma bw’Abatutsi, Abatwa n’Abahutu kuko mu ibuku Mugesera yerekanye hari handitsemo ko nyirayo yari Umubanda bitandukanye n’ubwigishijwe nyuma.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO