Ababyeyi bagiye kujya bohererezwa “SMS” zibibutsa gukingiza abana

Yanditswe na Emma-Marie Umurerwa
Kuya 10 Gicurasi 2019 saa 07:24
Yasuwe :
0 0

Ministeri y’Ubuzima igiye kujya yibutsa ababyeyi kujya gukingiza abana hifashishijwe ikoranabuhanga, umubyeyi akazajya ahabwa ubutumwa bugufi “SMS” kuri telefoni bumwibutsa ko itariki yo kujya gukingiza umwana we yageze.

Hari ababyeyi bajya bibeshya cyangwa bakibagirwa itariki yo kujya gukingiza abana, abandi bakabajya ku munsi utandukanye nuwo bahawe na muganga, bikaba byatuma badahabwa serivisi uko byateganyijwe.

Minisiteri y’Ubuzima (Minisante) ivuga ko guhera mu mwaka wa 2020 umuti wa burundu w’iki kibazo uzaboneka hifashishijwe ikoranabuhanga.

Mu kiganiro aherutse kugirana na IGIHE, Dr Sibomana Hassan, umuyobozi wa gahunda y’Igihugu y’ikingira, avuga ko mu minsi iri imbere buri mwana w’umunyarwanda azajya akingirwa inkingo zose, kuko uburyo bwakorwaga bwo kwandika ku ifishi y’umwana itariki azasubirira gukingizwa bugiye guhindurwa bukanozwa.

Ati “Guhera mu mwaka wa 2020 tuzifashisha ikoranabuhanga, ababyeyi bafite abana bageze igihe cyo gukingizwa bazajya bahabwa ubutumwa kuri telefoni mbere y’uwo munsi bubibutsa.”

“Turasaba kandi ababyeyi kujya bitwaza irangamuntu igihe baje gukingiza kugira ngo nimero y’irangamuntu tujye tuyishyira mu mashini, ifishi y’umwana niramuka itakaye twandike numero y’irangamuntu y’umubyeyi duhite tubona amakuru yose y’umwana, inkingo yakingiwe n’izo asigaje.”

Ku babyeyi baba badafite telefoni zigendanwa, abajyanama b’ubuzima bazajya bababa hafi babibutse nk’uko basanzwe babigenza mu gukurikirana ubuzima bw’umwana n’umubyeyi.

Imibare itangwa na Minisiteri y’Ubuzima igaragaza ko u Rwanda ruhagaze neza mu bijyanye no gukingira abana, kuko hashize imyaka isaga 10 abana bakingiye barenga 95%. Abana b’abanyarwanda bakaba bakingirwa kuva bakivuka kugeza bagize amezi 15, indwara iseru, mugiga, imbasa, umusonga, impiswi, umwijima wo mu bwoko bwa B n’izindi.

Abatuye mu Mujyi wa Kigali bakaba bitabira gukingiza ku kigero cya 96,1% Intara y’Iburasirazuba biri kuri 95,1%, Intara y’Amajyaruguru biri kuri 94,8%, Intara y’Amajyepfo biri kuri 94,5%, Intara y’Uburengerazuba 89,8%.

U Rwanda ruhagaze neza mu gukingira abana

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza