Kwamamaza

Abadepite b’ i Burayi binjiye mu rugamba rwo gukumira jenoside no kurwanya ihakana ryayo

Yanditswe kuya 22-07-2016 saa 07:14' na Ezechiel Mbananabo


Abadepite 179 baturuka mu bihugu 31 ku mugabane w’u Burayi binjiye mu rugamba rwo gukumira jenoside, ibyaha bikomeye no kurwanya ihakana rya jenoside bashyira umukono ku nyandiko yateguwe n’urubyiruko rwibumbiye mu muryango w’u Burayi urwanya irondakoko EGAM (European Grassroots Antiracist Movement).

Iyi nyandiko ivuga ko ibyaha bikomeye bibera mu bihugu nk’u Burundi, Syria, Irak no mu gace ka Darfur muri Sudan y’Epfo biri ku rutonde rw’ibitakwihanganirwa bikorerwa mu maso yabo, ndetse bimwe bikaba bishobora kuganisha kuri jenoside.

Bahamya ko ihakana rya jenoside ryiyongera ku mugabane w’u Burayi binyuze mu mashyaka, mu muco runaka w’abantu no mu buryo butandukanye nk’ihakana, kunyuranya n’ ukuri, gutera urujijo, guhangana hagati y’abagizweho ingaruka n’ibikorwa runaka n’ibindi.

Banzura ko kwinjira muri gahunda yo gukumira jenoside, ibyaha bikomeye no kurwanya ihakana rya jenoside ari byo bya mbere iri huriro rigamije. Ngo kurengera indangagaciro y’ibanze, ubuzima no kugira umuhate wo gushyira ku ruhande ivangura rishingiye ku bwoko n’amacakubiri birabareba.

Bati “Abagize Inteko Ishinga Amategeko bafite ubushobozi bwo kugira icyo bakora, bivuze ko bafite inshingano idasanzwe. Inshingano yacu idutegeka kugira icyo dukora. Ubwo rero, kuba duturuka ahantu hatandukanye tukaba dufite n’imyumvire itandukanye tukabasha kurenga ibyo kutemeranya rimwe na rimwe biducamo ibice, turi umwe mu izina ry’ubumuntu dusangiye, mu gukumira jenoside n’ibyaha bikomeye ndetse no kurwanya ihakana rya jenoside.”

Bavuga ko binyuze mu buryo bwemeranywaho ku rwego mpuzamahanga, bazaharanira itsinzi ku bidafite umubaro, ukuri kuganza ikinyoma no gushyira hamwe batsinda kwikubira ndetse n’ubuzima aho gusenya.

Aba badepite bavuga bafatanya n’imiryango mpuzamahanga, iy’akarere n’iyo ku rwego rw’igihugu itandukanye yaba iya guverinoma n’itari iya Leta hagamijwe kumenya niba inshingano yo kurengera abantu ishyirwa mu bikorwa mu buryo nyakuri.

Bati “ Tuzagira uruhare mu kugenzura ukuri, by’umwihariko tujya aho ibintu bibera. Tuzamenyesha kandi tuburire abaturage muri rusange hamwe na za guverinoma zacu z’i Burayi, ibigo byo mu karere na mpuzamahanga n’izindi nteko zishinga amategeko zishobora guhura n’ ibibazo.”

Bavuga ko bazaharanira ko ibyo bigo na za guverinoma bishishikazwa no gushyira iherezo kuri jenoside aho ishobora kuba hose ku isi, ndetse no gushyiraho uburyo bwo gutabara no gukumira cyangwa guhagarika ibyaha bikomeye biri gukorwa.

Muri iyo nyandiko bashyizeho umukono, aba badepite bavuga ko umuhate wabo mu kurwanya ihakana rya jenoside uzagaragarizwa mu nzira zitandukanye zirimo ibiganiro n’abaturage no gushyiraho amategeko mu gihe cyaba ari cyo gikoresho cy’ingenzi cyane.

Bemeza ko gutanga ubumenyi bituma ihakana rya jenoside risubira inyuma,bityo bagomba kumenya niba abanyamateka bashobora gukora mu bwisanzure, by’umwihariko kugera ku nyandiko zose zibitswe no gushyigikira ubushakashatsi.

Uburezi no gutanga ubumenyi ngo nibyo nyamukuru mu rugamba basangiye.

Ubumenyi bw’amateka no kwibuka jenoside bizaha urungano rw’ubu n’uruzaza .

Aba badepite bavuga ko bazajya bagira uruhare mu kwibuka za jenoside aho zabaye hamwe n’abayobozi bahagarariye ababirenganiyemo, ndetse no gutanga ubufasha butandukanye.

Ngo bazakora ku buryo bamenya ko amateka ya jenoside ashyirwa mu nteganyanyigisho mu mashuri, ndetse batange n’ubufasha mu guteza imbere uburyo bwo kuyiga .

Abagize Inteko zishinga Amategeko i Burayi biyemeje kurwanya Jenoside

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved