Kwamamaza

Abadepite baguye mu kantu ku bwa miliyoni 582 REB yakodesheje ahabikwa mudasobwa

Yanditswe kuya 12-10-2016 saa 18:26' na Ntakirutimana Deus


Umunsi wa Gatatu w’iki cyumweru ntiwaguye neza abayobozi b’Ikigo cy’Igihugu Gishinzwe Uburezi(REB) ku bw’amakosa atagira ingano,Umugenzuzi w’Imari n’Umutungo bya Leta yakivumbuyemo.

Kuri uyu wa Gatatu tariki ya 12 Ukwakira 2016, ni bwo abayobozi ba REB barangajwe imbere n’Umuyobozi Mukuru wayo, Gasana Janvier bitabye abadepite bagize PAC kugira ngo batange ibisobanuro kuri ayo makosa yagaragajwe muri raporo y’Umugenzuzi Mukuru w’Imari ya Leta y’umwaka wa 2014/2015.

Ayo makosa arimo kuba icyo kigo kimaze gutanga amafaranga asaga miliyoni 582 gikodesha ububiko bwa mudasobwa zaguzwe muri Gahunda ya Mudasobwa imwe ku Munyeshuri(OLPC), nyamara zagombye kuba zarahawe ibigo.

Umugenzuzi Mukuru w’Imari n’Umutungo bya Leta, Obadiah Biraro ndetse n’abagize PAC bibajije uburyo izo mudasobwa zimaze guhombya leta amafaranga angana.

Mu myaka itanu ishize kandi mudasobwa zisaga ibihumbi 18 zimaze kwibwa, izindi zagiye zibahwa amashuri adafite amashanyarazi ku buryo zidakoreshwa.

Mudasobwa zigera kuri 50% ni zo zidakoreshwa

Ikindi cyatunguranye ni uburyo mudasobwa zisaga ibihumbi 104 zidakoreshwa n’abanyeshuri zazaniwe ngo zibateze imbere mu by’ikoranabuhanga.

Mu mashuri amwe n’amwe ngo hatanzweho mudasobwa ziruta umubare w’abanyeshuri. Hari kandi mudasobwa zisaga ibihumbi 47, Umugenzuzi w’Imari ya leta yabonye zaguzwe na REB zidafite abo zizahabwa, ngo izo nizo zashakiwe aho zibikwa zitwara akayabo.

Haguzwe kandi ububiko bw’ikoranabuhanga(Serveurs) bwatwaye miliyoni zisaga 922 bwagombaga gukoreshwa ahagiye hatangwa mudasobwa, ariko ngo ntibwigeze bukoreshwa, uretse mu mashuri make cyane.

Depite Kankera Marie Josée yavuze ko ayo ari amafaranga ya leta yapfuye ubusa, dore ko ngo bumwe muri ubwo bubiko bwamaze no gupfa.

Andi makosa REB yagaragarijwe ni uko yatanze mudasobwa mu mashuri, ariko yategura ingengabihe y’amasoko ntiteguremo n’isaha n’imwe yagenewe kwigwamo mudasobwa, ku buryo bigora ibigo bishaka umwanya zigishwamo.

Mu bigo bisaga 370 byatanzweho izo mudasobwa, na ho ngo nta barimu bafite ubumenyi bwo kwigisha amasomo ya mudasobwa bahari kuko abahuguwe bagera ku 123 gusa.

Izo mudasobwa zimaze kugurwa asaga miliyari 35 z’amafaranga y’u Rwanda, kandi ziracyakomeza kongerwa. Ariko ngo nta nyandiko y’umushinga ushyiraho iyo gahunda yigeze igaragara, amakosa na yo yashinjwe REB.

Mu rwego rwo gushyigikira iyo gahunda ababyeyi batanze amadolari ya Amerika 443,602 yo kugura mudasobwa ariko ngo aracyabitse muri Banki Nkuru y’u Rwanda.

REB yisobanuye byanga kurangira no kwemerwa

Umuyobozi Mukuru wa REB, Gasana Janvier yavuze ko ayo madolari yahawe Minisiteri y’Uburezi yashyizwe kuri konti ya REB.

Kankera acyumva ibyo ati “ Ubwo mwishe itegeko rigenga ingengo y’imari ya leta.”

Ku bijyanye no gutanga mudasobwa ziruta ubwinshi abanyeshuri, Gasana yavuze ko byatewe n’uko zahawe ibyiciro bibiri by’abanyeshuri, icy’abiga mu gitondo n’icy’aba nimugoroba, ariko ngo zimwe REB yatangiye kuzisubirana.

Izimaze kugarurwa ni izo mu mujyi wa Kigali, ariko n’izo mu tundi turere zizagarurwa mu minsi iri imbere, nk’uko Gasana yakomeje abisobanura.

Umuyobozi w'Ikigo Gishinzwe guteza imbere Uburezi,(REB), Gasana Janvier

Ku bijyanye na mudasobwa zidakoreshwa, Nkusi yagize ati “ 50% zidakoreshwa, murumva ibyo bintu ari ibisanzwe... umuntu yakwihandagaza akabisobanura? Ntizikoreshwa zarazanywe mu Rwanda hari benshi bazikeneye, koko dukomeze ibisobanuro!”

Umugenzuzi Mukuru w’Imari ya Leta, Obadiah Biraro yavuze ko bagiye kuzigenzurira saa sita z’ijoro. Nkusi amubaza niba bataribeshye kubera ko hari nijoro.Biraro ati “Amaso yanjye akora cyane nijoro kurusha ku manywa.”

Gasana yakomeje gutanga ibisobanuro asoza asaba imbabazi ko mu gihe izo nzego zizabasurira zizasanga ibibazo byagaragajwe byarakemutse.

Gasana kandi yavuze ko n’umwanya wo kwisobanura aba ari muto, ariko ngo inzu y’ububiko bakodesha igenewe gusanirwamo izigira ibibazo, akaba yumva ari byiza ko REB yubaka inzu itayitwara akayabo nk’ako, byaba ngombwa n’izo mudasobwa zikazajya zisanirwa hirya no hino mu turere kuko ngo igize ikibazo yose isanirwa i Kigali.

REB kandi yisobanuye no ku yandi makosa atandukanye yagiye ayigaragaraho mu bijyanye no gucunga no gukoresha nabi ingengo y’imari ya leta 2014/2015.

Mudasobwa zo muri gahunda ya mudasobwa ku munyeshuri, buri imwe yagiye igurwa amadolari 20 ya Amerika, zose hamwe zitwara miliyari zisaga 35 z’amanyarwanda.

Abadepite bumijwe n'ukuntu mudasobwa zibikwa zigatwara leta akayabo kandi zagombye kuba zarahawe abanyeshuri

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved