Abadepite bakemanze imigambi ihishe y’abadepite b’i Burayi bitwaje ikibazo cya Ingabire

Yanditswe na Philbert Girinema
Kuya 11 Ukwakira 2016 saa 09:59
Yasuwe :
0 0

Inteko Ishinga Amategeko y’u Rwanda yamaganye imyanzuro yasohowe n’Inteko Ishinga Amategeko y’Umuryango w’Ubumwe bw’u Burayi, yanenze urwego rw’Ubutabera bw’u Rwanda ishingiye ku kibazo cya Ingabire Victoire, kugeza aho basabye ko urubanza rwe rwasubirwamo.

Kuwa 5 Ukwakira nibwo iyi Nteko Ishinga Amategeko y’Umuryango w’Ubumwe bw’u Burayi (EU) yasohoye imyanzuro ku Rwanda no ku kibazo cya Ingabire Victoire, nyuma y’urugendo itsinda ry’abadepite umunani bayo bagiriye mu Rwanda hagati ya tariki 19-22 Nzeri.

Mbere gato y’uko iryo tsinda ry’Abadepite bagize Komisiyo y’Uburenganzira bw’Abagore n’Uburinganire mu Nteko Ishinga Amategeko y’Umuryango w’Ubumwe bw’u Burayi baza mu Rwanda, Ambasaderi w’Umuryango w’Ubumwe bw’i Burayi mu Rwanda, Michael Ryan, yabwiye itangazamakuru ko bazaganira n’ab’u Rwanda ku “buringanire, ndetse bakanigira ku Rwanda”.

Mu biganiro nyunguranabitekerezo byahuje abadepite n’abasenateri kuri uyu wa Mbere tariki 10 Ukwakira, kuri iyi myanzuro y’abadepite ba EU, bahurije ku kuvuga ko raporo y’aba badepite ntaho ihuriye n’ibyari byabazanye mu Rwanda, ahubwo ari imyanzuro baje bafite neza.

Perezida w’Inteko Ishinga Amategeko y’u Rwanda, Donatille Mukabalisa, yavuze ko umubano w’izi nteko zombi usanzwe ari mwiza, n’ubwo hari abifuza ko waba mubi.

Ati ‘‘Hari abashatse ko wazamo agatotsi, ariko ni byiza ko abantu baganira tukagira ibyo twibutsa, twibutsa ko ari uburenganzira bwacu kuko turi igihugu cyigenga, gifite ubusugire, nk’uko nabo ariko bimeze. Ubwo bwubahane rero bugomba kuturanga.’’

Imyanzuro y’iri tsinda yakomoje gusa ku bwisanzure bw’itangazamakuru, imiyoborere y’u Rwanda, imiterere y’amategeko, urubanza rwa Ingabire Victoire n’amatora ya Perezida ategerejwe mu 2017.

Depite Gatabazi ati ‘‘Mbona abayiteguye bari bafite ikindi bashaka bidahuye n’icyabazanye batekereza ibintu bidafite aho bihuriye n’urugendo bari bakoze, kuko urugendo rwagaragazaga ko baza kureba iterambere igihugu cyagezeho. Nkumva rero dukwiriye kwamagana ririya tsinda buri muntu umwe mu bari barigize, ndetse no gusaba ko iyi myanzuro bafashe yakongera igasuzumwa neza.’’

Visi Perezida w’Umutwe w’Abadepite, Abbas Mukama, yavuze ko hari ibihugu biri kwihisha inyuma y’abadepite babyo mu Muryango w’Ubumwe bw’u Burayi, mu zindi nyungu zihishe, ashingiye ku ho bavuze ko bakeneye amatora anyuze mu mucyo mu 2017.

Ati ‘‘Iyo ubihuje ukibuka ejo bundi Alain Juppé, umukandida ku buyobozi bukuru mu Bufaransa ejo bundi ari kuvuga ibijyanye na Kayumba, ibijyanye n’indege ya Falcon 50, uburyo bari gufata anketi yafashwe n’uriya mucamanza bagashaka kuyizana bundi bushya, wareba ukuntu bije bihuza, ni gahunda bari bafite ngo babihuze n’urugendo rw’aba badepite baje.’’

“Bagomba kutwubaha kuko turi igihugu cyigenga, ntabwo tukiri mu bucakara aho badutegeka ibyo bishakiye. Niba ari ibyo dushaka bifite aho bizageza Abanyarwanda, ntabwo aribo bagomba kutugeza aho bashaka. Ni intangiro y’amatora ya 2017 byo tugomba kubyitegura, ariko igihe cyose baza bashaka guteza ikibazo ku butabera bwo mu Rwanda, ibyo ndumva bidashobora kwemerwa.’’

Depite Bamporiki Edouard yavuze ko u Rwanda rwagize ‘‘ibyago no kugenderwa n’abashyitsi bameze batya.’’

Ati ‘‘Umushyitsi uteze indege akava i Burayi akaza kureba ibyo abagore b’Abanyarwandakazi bagezeho bamaze guhabwa uburenganzira bwabo na Nyakubahwa Perezida wa Repubulika, bakabisobanura neza ko aricyo kibagenza,’’

‘‘Hanyuma batari basura uruganda na rumwe rw’umugore w’Umunyarwandakazi, batari bahura n’umudamu w’umusirikare, w’umudepite cyangwa w’umuminisitiri aricyo cyabazinduye, bakaba bazinduwe n’abagore b’indashyikirwa, bati ariko turashaka kureba umugore wakoze ishyano. Mubanze mutekereze abo bantu. ’’

Depite Mukabagwiza yavuze ko bibabaje kubona imyanzuro ivuga ko ‘‘ubucamanza bwacu budakora neza, cyane cyane nk’Urukiko rw’Ikirenga, bakarengera bakavuga ko butagaragaje ubushobozi mu guca imanza z’abanyapolitiki bafite amazina akomeye, ahanini bigaragara ko bavuga urubanza rwa Ingabire Victoire.’’

Ati ‘‘Njye ndavuga ko Ingabire Victoire ndetse n’abandi banyapolitiki bari muri urwo rubanza ntabafata nk’abari ku rwego rwo hejuru, kuko abanyapolitiki bo kuri urwo rwego bafite uko bagaragara, ari mu myitwarire, ari mu mvugo, ari no mu mikorere ya Politiki.’’

Yavuze ko abo badepite banyuranije n’imyanzuro y’urukiko rw’ibihugu by’i Burayi rushinzwe uburenganzira bwa muntu, mu Ukwakira 2011 rwizeye ubucamanza bwo mu Rwanda rukemera ko Umunyarwnada Sylvere Ahorukomeye wari muri Suède, akurikiranyweho Jenoside, yoherezwa mu Rwanda.

Umwanzuro nk’uwo kandi ngo wafashwe kuri Emmanuel Mbarushimana wari muri Denmark ubu wagejejwe mu Rwanda uri kuburana no kuri Charles Bandora wakatiwe wari muri Suède.

Depite Ruku Rwabyoma ati ‘‘Aba bantu twabajyanye ku rwibutso rwa Jenoside rwa Kigali twizeye ko nibura bazahakura isomo, ariko uyu mwanzuro turi kuvugaho, twagakwiye kuba tuwurebaho kuri bo bacumbikiye abicanyi mu bihugu byabo, abakabashyikiriza ubutabera hano cyangwa mu nkiko zabo, ariko baburanishwe.’’

‘‘Baba baragerageje gusura uwarokotse Jenoside ? Ntabwo byumvikana aho bakuye impamvu yo gufata umunyabyaha umwe, urya neza gatatu ku munsi, uvuzwa, ibibazo bye bikitabwaho, bakirengagiza abarokotse Jenoside. Ariko ntabwo ntunguwe, reba abagize iryo tsinda, urebe aho bakomoka. Ntabwo bitunguranye, reba igihugu bakoreramo. Reka duhangane nabo, hari ikindi kibyihishe inyuma.’’

Depite Mukayuhi we yavuze ko yababajwe no kuba bagaragaza ko nk’abaturage batagira uruhare muri politiki y’igihugu cyabo ntibanagire n’uburenganzira bwo gutanga ibitekerezo mu buzima bw’igihugu, avuga ko Itegeko Nshinga risobanura neza uruhare rwa leta mu guteza imbere imibereho y’Abanyarwanda, rikanagaragaza uruhare rw’abaturage mu guteza imbere imibereho yabo bwite.

Depite Mporanyi Theobald yavuze ko ‘urebye Inteko rusange yabaye bemeza uyu mwanzuro, bari bake, na bake barimo ntabwo babyemeye.’

Ati ‘‘Hari n’umudepite umwe wahagurutse afata ijambo avuga ku kibazo cya Ingabire, anavuga ko yaje mu Rwanda ahura n’umushinjacyaha wari ufite urubanza, asanga nta na hamwe urubanza rutubahirijwe, ku buryo yabwiye bene wabo ati ibi ntabwo aribyo.’’

‘‘Nk’ahantu bavuze ngo mu Rwanda baniga itangazamakuru, bafunga abanyamakuru, byatumye njya gusoma, nsanga mu Rwanda dufite abanyamakuru barenga 500. Nta numwe muri bo muri uyu mwaka wigeze afungwa. Nsanga dufite ibinyamakuru 40 byandika kuri internet, dufite amaradiyo 30, tumaze kugira televiziyo 10. Wababujije uburenganzira, ikindi umuntu yaba ashaka cyaba ari ikihe ?’’

Inteko Ishinga Amategeko y’u Rwanda yahise itora umwanzuro uvuga ko ‘‘yamaganye umwanzuro w’inteko ya EU ku Rwanda inasaba iyo nteko kwisubiraho kuko imyanzuro yayo idashingiye ku kuri.’’

Abadepite bamaganye imyanzuro b'abagize Inteko Ishinga Amategeko ya EU

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza