Kwamamaza

Abadepite batewe inkeke n’ingengabitekerezo ya Jenoside basanze mu bigo by’amashuri

Yanditswe kuya 22-10-2016 saa 08:17' na Philbert Hagengimana


Ihuriro ry’abagize Inteko Ishinga Amategeko riharanira gukumira Jenoside no Kurwanya Ihakana n’Ipfobya rya Jenoside yakorewe Abatutsi (AGPF-Rwanda), rivuga ko ritewe inkeke no kuba hari abana bato bakibona mu ndorerwamo z’amoko, abandi ugasanga bafite ingengabitekerezo ya jenoside kandi yarabaye bataravuka.

Mu nama AGPF-RWANDA yagiranye n’inzego zifite mu nshingano kurwanya ingengabitekerezo ya Jenoside, zirimo iza leta ndetse n’imiryango itari iya Leta, Perezida w’iryo huriro, Depite Karenzi Theoneste yavuze ko baherutse gusura ibigo by’amashuri cyane cyane iby’uburezi bw’ibanze bw’imyaka 12, bakabaganiriza ku kurwanya jenoside n’ingengabitekerezo yayo.

Kuba hari abana bakiri bato bacyibona mu ndorerwamo y’amoko n’abandi bafite ingengabitekerezo ya Jenoside kandi baravutse nyuma y’iyakorewe abatutsi, byatumye abo badepite bagira ubwoba.

Depite Karenzi Theoneste yagize ati “Ibyo twabonye muri ariya mashuri byanteye impungenge.Twasanze hari abana bagifite amateka agoretse, ku buryo usanga ari nk’imiryango yabo ikibifite, mbese haracyari ibisigisigi muri sosiyete […] twarabibonye mu bana, ugasanga umwana arabaza ikibazo ku rwego rwe atari akwiye kubaza, ukabona yaragikuye ahandi. Nta handi rero ni za nyigisho bavuga zo ku ishyiga ababyeyi baganira n’abana.”

Depite Karenzi asobanura ko ihuriro ayoboye rije kongera imbaraga mu zisanzweho, kugira ngo n’ibitaragerwaho byihute mu kugerwaho, dore ko raporo ziheruka zagaragaje ko mu banyarwanda hakirimo ingengabitekerezo ya Jenoside iri ku rugero rwo hejuru.

Depite Karenzi yagize ati “Turi abavugizi b’abaturage […] Ikindi ni twe dushyiraho amategeko, rero ni ukureba niba ayo mategeko ariho aboneye kugira ngo turwanye ingengabitekerezo ya Jenoside.”

Ikindi kigenderewe, ngo ni ukubaka ubufatanye hagati y’Inteko Zishinga Amategeko ku Isi hose, kugira ngo abadafite ibyaha bya Jenoside n’ibyo kuyipfobya mu mategeko ahana mu bihugu byabo na bo bayashyireho.

Komisiyo y’Ubumwe n’Ubwiyunge itangaza ko ubumwe n’ubwiyunge bwateye imbere mu Rwanda, aho mu 2015 bwari ku gipimo cya 92.5% buvuye kuri 82,3% bwariho mu mwaka wa 2010.

Icyakora iyo komisiyo ivuga ko muri rusange, hari ibibazo by’amacakubiri n’ingengabitekerezo ya jenoside, ndetse ubushakashatsi bwagaragaje ko abantu 28,9% bemeje ko hari abashobora kongera gukora jenoside iramutse ibaye, gusa abo bakaba baragabanutse ugereranyije n’umwaka wa 2010 aho bari 39.9%.

Abafatanyabikorwa ba AGPF Rwanda barimo imiryango itari iya leta n'izindi nzego
Depite Karenzi Theoneste, Umuyobozi wa AGPF(iburyo)

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved