Abadepite batoye itegeko rishyiraho Urukiko rw’ubujurire mu Rwanda

Yanditswe na Mathias Hitimana
Kuya 16 Gashyantare 2017 saa 09:38
Yasuwe :
0 0

Inteko Ishinga Amategeko y’u Rwanda yatoye ishyirwaho ry’urukiko ruzatura umutwaro w’ibirarane by’imanza Urukiko rw’ikirenga rumaranye igihe.

Inteko rusange y’Abadepite yateranye kuri uyu wa Kane, tariki ya 16 Gashyantare 2017, yatoye itegeko ngenga rishyiraho Urukiko rw’Ubujurire mu Rwanda.

Umushinga w’Itegeko Ngenga rishyiraho Urukiko rw’ubujurire wasohotse mu byemezo by’Inama y’Abaminisitiri yateranye kuwa 12 Ukwakira 2016, ushyikirizwa Abadepite.

Inteko Ishinga Amategeko yasuzumye uwo mushinga, wemezwa kuwa 6 Gashyantare 2017, ariko woherezw kunonosorerwa muri komisiyo . Uvuyemo kuri uyu wa Kane uhita wemerwa.

GUverinoma iwugeza imbere mu Nteko Ishinga Amategeko, yasobanuye ko inshingano z’urwo rukiko rwatekerejwe nyuma yo kubona ko ibirarane biri mu Rukiko rw’ikirenga, ruhurirwamo n’imanza nyinshi.

Urukiko rw’ubujurire rukaba ruzaba hagati y’Urukiko Rukuru wa repubulika n’Urukiko rw’Ikirenga, imanza zajuririrwaga ziva mu Rukiko Rukuru rwa Repubulika, iziva mu Rukiko Rukuru rwa Gisirikare n’iziva mu Rukiko Rukuru rw’bucuruzi zikajya zihita zijya mu rw’ubujurire.

Ikibazo cy’imanza zitinda kuburanishwa mu Rukiko rw’Ikirenga cyanatinzweho na Perezida w’Urukiko rw’Ikirenga ubwo hatangizwa umwaka w’ubucamanza wa 2016/2017 mu Kwakira 2016.

Perezida w’Urukiko rw’Ikirenga, Prof Sam Rugege, yagaragarije Perezida wa Repuburika Paul Kagame ko mu kwihutisha imanza harimo imbogamizi z’imanza z’ibirarane bigatera gutinda kuburanisha imanza nshya zinjira.

Prof Rugege yasobanuye ko nubwo hari intambwe yatewe mu kwihutisha imanza, urubanza rwinjiraga mu Rukiko rw’Ikirenga muuri 2011/2012 rwategerezaga imyaka itanu n’igice ngo ruburanishwe, naho muri 2015/2016 byari bigeze aho urubanza rwinjiye birusaba gutegereza umwaka n’igice.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza