Abafana ba Arsenal bibutse Abatutsi bazize Jenoside, banaremera abayirokotse babiri bacuruzaga agataro

Yanditswe na Manzi Rema Jules
Kuya 26 Gicurasi 2018 saa 05:46
Yasuwe :
0 0

Abafana b’ikipe ya Arsenal bo mu Rwanda bibutse Abatutsi bazize Jenoside mu 1994 kuri uyu wa Gatandatu tariki 26 Gucurasi 2018 banaremera abagore babiri bayirokotse bari babayeho mu buzima bubi batunzwe no gucuruza agataro.

Arsenal ni imwe mu makipe afite abafana benshi mu Rwanda mu zo mu Bwongereza by’umwihariko mu cyumweru gishize ikaba yaranagiranye amasezerano y’imyaka itatu yo kwamamaza ubukerarugendo biciye muri gahunda ya ‘Visit Rwanda’.

Abakunzi bayo ku rwego rw’igihugu buri mwaka bagira ibikorwa bitandukanye bakora byo gufasha abatishoboye uyu mwaka bakaba baremeye abarokotse Jenoside babiri bari basanzwe bacuruza udutaro, umwe bamushingira butiki undi bamugurira ibikoresho byo mu rugo kugira ngo abe heza.

Mukasa Jean Marie uyobora abafana ba Arsenal mu Rwanda aganira n’itangazamakuru yavuze ko uretse guhuzwa n’iyi kipe, itsinda ryabo rishyira imbere igihugu n’abagituye ari nayo mpamvu bagira ibikorwa bategura, uyu mwaka bakaba barahisemo gufasha abarokotse Jenoside.

Ati “Ibi ni ibikorwa tugomba gukora nk’Abanyarwanda byo kwishakamo ibisubizo kuko nk’ubu ababyeyi dukuye ku gataro bavuye mu cyiciro kimwe bagiye mu kindi. Ndakangurira n’abandi gukora ibikorwa bifitiye akamaro igihugu ntibibe gufana ikipe runaka gusa ahubwo uko kwishyira hamwe gutange umusaruro no ku Banyarwanda.”

Munganyinka Marie Grace wafashijwe gutangira butiki icuruza ibintu nkenerwa mu buzima bwa buri munsi, yavuze ko atabona amagambo ashimiramo abagize uwo mutima kuko ubuzima yari abayemo nawe atari abwishimiye ariko ubu buhindutse.

Yagize ati “Ubundi narinsanzwe mbayeho kubera gucuruza agataro rimwe na rimwe bakamfata, ibyo ncuruza bakabijyana ariko ubu mbonye ahantu ngiye gukorera heza, amafaranga nzajya mbona nzajya nongeranya nanjye ntere imbere. Ndashimira cyane Imana yakoresheje abafana ba Arsenal, izabampere umugisha.”

Uretse kugurira uyu mubyeyi bimwe mu byo agomba guheraho acuruza, banamwishyuriye inzu azakoreramo amezi atatu banamugurira firigo azajya akoresha akonjesha ibinyobwa azaba acuruza.

Mugenzi we witwa Uwimana yafashijwe agurirwa ibikoresho byo mu rugo, ubuyobozi bw’abafana ba Arsenal bukaba bwarakoranye n’ubwa Ibuka mu murenge harebwa icyo buri umwe muri aba babyeyi akeneye cyihutirwa.

Bimwe mu bicuruzwa abafana ba Arsenal basize muri butiki ya Munganyinka
Abafana ba Arsenal bari bitabiriye iki gikorwa ari benshi
Mukasa Jean Marie uyobora abafana ba Arsenal ku rwego rw'igihugu, yasabye n'abandi kubyaza umusaruro ubumwe bafitanye bagakora ibikorwa byungukira igihugu
Munganyinka Marie Grace (wambaye ubururu) yafashijwe gutangiza butiki naho Uwimana (ibumoso) afashwa kubona ibikoresho byo mu rugo
Nyuma y'umuganda abafana bakoze urugendo rwo kwibuka Abatutsi bazize Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza