Abafungiwe icyaha cya Jenoside 20% bamaze gusaba imbabazi

Yanditswe na Twarabanye Venuste
Kuya 5 Ukwakira 2019 saa 12:30
Yasuwe :
0 0

Urwego rushinzwe imfungwa n’abagororwa (RCS) ruvuga ko hari abafungiye icyaha cya Jenoside bageze ku rwego rwiza rwo guhinduka, ku buryo bari gufasha bagenzi babo kumva ko bakwiye kwemera uruhare rwabo muri Jenoside bakanasaba imbabazi.

Imibare ya RCS yerekana ko abagejejwe imbere y’ubutabera kubera icyaha cya Jenoside, ari ibihumbi 120 barimo ababaye abere, abahamwe n’ibyaha bagafungwa bakaza kurangiza ibihano bagataha n’abarenga ibihumbi 27 bakiri muri gereza benda gusoza ibihano byabo.

Umuvugizi w’urwego rushinzwe imfungwa n’abagororwa, SSP Hillary Sengabo, yabwiye IGIHE, ko ikigereranyo cy’abamaze gusaba imbabazi ari 20%.

Ati “Urumva hari abazisabye banarangije ibihano banatashye abo rero ubungubu dufite bazisaba baza umunsi ku munsi, ni igikorwa gihora gikomeza uyu munsi ashobora kwicara akandika akavuga ngo ndumva byanjemo gusaba imbabazi”.

“Ubwo rero ni ukuvuga ngo ubungubu abamaze kuzisaba nibo bamaze kugera ku kigereranyo cya 20% bahora baza. Aho bikomoka ni uko dutanga inyigisho zo kugorora no gusana imitima yabo dufatanyije n’inzego zitandukanye z’isanamitima, bagenda baboneka.”

Avuga ko inzira ikiri ndende kandi na bo batatuza gukomeza kwigisha no kwegera abagororwa. Hagenda kandi habonekamo abahinduka bagabahindura abandi.

Ati “Nk’ubu dufite abantu baba bamaze kugera ku rwego rwiza rwo guhinduka, baba barafunzwe bemera n’icyaha cyabo banagisabira imbabazi abo bigisha bagenzi babo ni na bo usanga bahindura abandi kuko aba amubwira ati ‘nimwemere uruhare rwacu’ kuko twabigizemo uruhare.”

Umuyobozi w’umuryango wigisha abari muri gereza ubumwe n’ubwiyunge (Prison fellowship) Bishop Rucyahana John, yabwiye IGIHE ko igikenewe ubu ari ukugera muri gereza zose nubwo bo nk’umuryango udaharanira inyungu batabishobora kubera ubushobozi.

Ati “Icyakorwa ni uko abagororwa benshi bakwegerwa kuko, twebwe muri Prison Fellowship, twegera abo tubashije kugezaho amaguru n’amaboko. Kugira rero ngo imibare yiyongere ni uko tuba tugomba kugera ku bagororwa bose, noneho tukagera no mu magereza yose kugira ngo dushobore kubikora ku bantu benshi kandi mu gihe kigufi, ariko ibyo bishaka amikoro tudafite.”

Rucyahana ashimangira ko ubumwe n’ubwiyunge buri gutera imbere mu Rwanda, ariko ko kubuharanira ari uguhozaho kuko ari bwo iterambere ry’u Rwanda rigomba gushingiraho.

Ati “Iyo ureba u Rwanda aho rugeze naho ruvuye, icyizere ni cyinshi cyane kirahari, ariko ntabwo tugomba kurenza ukuguru ku kundi, ngo hari icyizere noneho ngo twicare, tugomba gukora n’ibyo tutarakora tukabikora, nibyo tuzakomeza gukora k’ubumwe bw’Abanyarwanda. Iterambere rizaba rishingiye ku bumwe bwacu, kandi ubumwe bwacu ni ikintu tuzahora turwanirira iteka ryose kuko abashaka kubusenya barahari.”

SSP Hilary Sengabo yavuze ko ubu abasaba imbabazi bagenda biyongera, kandi ko hari icyizere kuri ubwo bwiyongere kuko hari abasoje ibihano bakomeje kwandikira urwo rwego bifuza gusaba imbabazi abo bahemukiye.

Komisiyo y’ubumwe n’ubwiyunge iherutse gutangaza ko hari indi ntambwe igiye guterwa yo gushyiraho amahuriro y’ubumwe n’ubwiyunge ku rwego rw’umudugudu, byitezwe ko izafasha mu nyigisho z’ubumwe n’ubwiyunge, kurangiza imanza z’imitungo yangijwe muri Jenoside zitararangizwa mu buryo bwunga no kugaragaza ahajugunywe imibiri ngo ishyingurwe mu cyubahiro.

Ayo mahuriro agiye gushyirwaho mu gihe hari umubare munini w’abafungiye icyaha cya Jenoside ugiye gusoza ibihano.

Umunyamuryango wa AVEGA akaba n’umurinzi w’Igihango, Murebwayire Josephine, akangurira abarokotse kwitabira ayo matsinda kugira ngo bakurikirane ibizayaberamo kuko azabagirira umumaro.

Ati “Muri iyi minsi igihugu cyateguye gahunda yo gukora ihuriro ry’ubumwe n’ubwiyunge, ku rwego rw’umudugudu bihereye mu masibo ni ukuvuga rero hari mu masibo yacu mu midugudi yacu bariya bantu bazaza bajye mu midugudu, iyo sibo ndagusba kuyijyamo no kuganira n’abayirimo, nimwemere kujya muri izo nzego kugira ngo mukurikirane ibizahabera byose.”

Igipimo ku bumwe n’ubwiyunge kigaragaza ko Abanyarwanda bateye intambwe ku bumwe n’ubwiyunge ku kigero cya 92.5%. Biteganyijwe ko iki gipimo cyagera kuri 96% mu 2024.

Abagera kuri 20% bahamijwe Jenoside basabye imbabazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza