Nyabihu:Abatujwe i Bikingi baracyazitiwe no kwimwa ibyangombwa by’ubutaka

Yanditswe na Umurerwa Emma Marie
Kuya 5 Mutarama 2017 saa 12:57
Yasuwe : XX
0

Abagize imiryango 360 bamaze imyaka isaga ibiri batujwe mu Mudugudu wa Bikingi, Akagari ka Kijote, mu Murenge wa Bigogwe ho mu Karere ka Nyabihu bavuga ko bugarijwe n’ibibazo birimo kutagira mituweli, imirima yo guhinga ndetse n’ibyangombwa by’ubutaka bubakiweho.

Uyu mudugudu utuwemo n’abaturage biganjemo Abanyarwanda birukanwe muri Tanzaniya, abatahutse bava muri Repubulika Iharanira Demokarasi ya Congo, hamwe n’abatishoboye bahoze batuye mu manegeka.

Mu bibazo aba baturage bavuga ko bibazitira kugera ku iterambere rirambye birimo kuba barahawe inzu zitabanditseho, bituma batazitangaho ingwate ngo babone inguzanyo, kutagira imirima yo guhinga, ubwisungane mu kwivuza n’ibindi.

Umwe yagize ati " Abenshi muri twe badushyize mu cyiciro cya gatatu cy’ubudehe ku buryo iyo hagize utungurwa n’indwara tumujyana mu masengesho cyangwa tukamushakira imiti ya Kinyarwanda."

Undi muturage yatangaje ko babangamirwa no kuba mu nzu nta byangombwa byazo.

Ati “Inzu ubamo utayifitiye icyangombwa wayita iyawe ushingiye kuki? Croix Rouge yatubwiye ko inzu ari izacu ariko ubuyobozi bwatwimye ibyangombwa by’ubutaka.”

Mugenzi we yunzemo ati “Iyo baduha ibyangombwa by’ubutaka twari kuba twariteje imbere nk’abandi, twari kujya tubitangaho ingwate muri Sacco bakaduha inguzanyo.”

Abadafite imirima yo guhinga bagorwa no kubona ifunguro

Uretse umurima ungana n’imbuga abatujwe muri uyu mudugudu bafite, nta bundi butaka bwo guhinga bamwe bagira by’umwihariko abirukanwe muri Tanzania, ariko kandi n’abahoze batuye mu manegeka ngo aho basize ubutaka bwabo ni kure cyane ku buryo bagorwa no kujya kubuhinga.

Umwe ati “Uko utureba dutunzwe no guca inshuro, ibirayi tubonye tubirisha amababi y’ibisura dusoroma mu ishyamba. Ubuyobozi bwigeze kutwizeza ko tuzahabwa amasambu yo guhinga ariko amaso yaheze mu kirere."

Undi ati “Kugira ngo ngere aho aho isambu yanjye ari nkora urugendo rw’amasaha atari munsi y’icumi, kujyayo buri munsi birananira.”

Umuyobozi w’Akarere ka Nyabihu, Uwanzwenuwe Théoneste, yatangarije IGIHE ko ibyo abaturage bavuga bizwi, ariko nta mirima yo kubaha yaboneka.

Yagize ati “Batugaragarije ko bafite ikibazo cy’ubutaka bwo guhinga, ariko ikibazo cy’ubutaka bwa Leta murabizi ko nta n’ubuhari. Leta ntiyabona ubutaka bwo guha abaturage bose batabufite ariko hari Komisiyo ibishinzwe mu Karere, bazareba ko hari icyakorwa.”

Akomeza avuga ko kuba badafite ibyangombwa by’ubutaka bidakuraho ko inzu babamo atari izabo.

Ati “Hari serivisi ishinzwe ubutaka ku murenge bakwiye kuyegera ikabafasha, ariko natwe tuzoherezayo itsinda rijye kureba ikibazo cy’ibyangombwa by’ubutaka uko giteye.”

Ku kibazo cy’abajya gusura bene wabo bagaruka basanga inzu zahawe abandi, Uwanzwenuwe avuga ko ibyo atari ukuri.

Ati “Ibyo ntabwo aribyo, umuntu afite uburyo asohoka mu mudugudu. Hari abantu bagiye bagasiga bagurishije inzu cyangwa bagasiga bazikodesheje abandi, icyo gihe rero iyo bigaragaye hafatwa icyemezo kuko biba biboneka ko inzu atakiyikeneye.”

Umuyobozi ushinzwe igenamigambi muri Croix Rouge Rwanda, Ndimbati Pierre Claver, ari nayo yagize uruhare mu kubaka izi nzu mu kibanza yahawe n’Akarere ka Nyabihu, avuga ko ari iz’abaturage, ariko imicungire yazo bayeguriye Leta.

Abatuye mu Mudugudu wa Bikingi muri Nyabihu baracyabangamiwe no kutagira mitiweli ndetse n'ibyangombwa by'ubutaka
Uyu Mudugudu wubatswe na Croix Rouge mu kibanza wahawe n'Akarere ka Nyabihu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza