Abagore ku isonga rya ba kabuhariwe mu gucuruza inzoga zitemewe mu gihugu

Yanditswe na IGIHE
Kuya 16 Gashyantare 2017 saa 07:43
Yasuwe :
0 0

Polisi y’u Rwanda ikorera mu Karere ka Musanze na Gatsibo, kuwa Kabiri tariki ya 14 Gashyantare yafashe abantu batandatu barimo babiri bafatiwe muri Musanze binjizaga inzoga zitemewe mu Rwanda, n’abandi bane bafatiwe muri Gatsibo bafite udupfunyika tw’urumogi.

Abafatiwe muri Musanze ni umugore w’imyaka 23 wafatanywe amapaki 192 y’inzoga itemewe gucuruzwa mu Rwanda ya Blue Sky, n’undi w’imyaka 30, we akaba yari afite amaduzeni atatu ya Blue Sky.

Umuvugizi wa Polisi mu Ntara y’Amajyaruguru IP Innocent Gasasira, yavuze ko aba bagore bari hamwe n’abandi bagenzi mu modoka yavaga mu Karere ka Musanze yerekeza mu ka Rubavu.

Yavuze ati “Polisi y’u Rwanda ikorera mu Karere ka Musanze yari ifite amakuru ko aba bagore binjije izi nzoga zitemewe mu Rwanda muri iyi modoka berekeje muri Rubavu, nibwo bashyizeho bariyeri ihageze barayisaka bazisangamo, niko guhita bafatwa, ubu bakaba bafungiye kuri sitasiyo ya Polisi ya Busogo.”

IP Gasasira yakomeje avuga ati “Bimaze kugaragara ko abagore aribo benshi basigaye bishora mu bucuruzi bw’izi nzoga zitemewe.Turabasaba kubuvamo kuko ubucuruzi butemewe ubwo aribwo bwose iyo ufashwe urahomba kandi ugacibwa n’amande.”

Yasabye abantu bose gukora ubucuruzi bwemewe n’amategeko kuko ubukora nta ngaruka ahura nazo.

Mu Karere ka Gatsibo ho hafatiwe umugabo w’imyaka 41, undi wa 23, uwa 27 n’uwa 22, bakaba bafatanywe udupfunyika 304 tw’urumogi, ubu bakaba bafungiye kuri sitasiyo ya Polisi ya Kiramuruzi.

Umuvugizi wa Polisi mu ntara y’Uburasirazuba IP Emmanuel Kayigi, yavuze ko abaturage babahaye amakuru ko hari umwe mu baturage utuye mu kagari ka Rubona Umurenge wa Kiramuruzi ucuruza urumogi, kandi ko hari abantu bagiye kurugurayo, nibwo Polisi yagiyeyo ihasanga aba uko ari bane, bahasanga na turiya dupfunyika twarwo.

Yasabye abaturage gukora akazi kemewe aho kwangiza ubuzima bw’abantu bataretse n’ubwabo. Ati “Iyo ucuruza cyangwa ukanywa ibiyobyabwenge uhomba kabiri; urafungwa ikindi abantu bagufata nk’aho nta kamaro ufitiye umuryango nyarwanda.”

Yashimiye abaturage batanze amakuru ngo aba bagizi ba nabi bafatwe, asaba n’abandi kwihutira gutanga amakuru y’icyahungabanya umutekano kuko nta ngaruka zibamo.

Ingingo ya 594 yo mu gitabo cy’amategeko ahana ibyaha mu Rwanda ivuga ko umuntu ukoresha ibiyobyabwenge n’urusobe rw’imiti ikoreshwa nka byo bitemewe n’amategeko ahanishwa igifungo kiri hagati y’imyaka 3 kugera kuri 5 n’ihazabu y’amafaranga ibihumbi magana atanu kugera kuri miliyoni eshanu z’amafaranga y’u Rwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244