Kwamamaza

Abahize abandi mu kubungabunga ubuziranenge bw’amata bagororewe

Yanditswe kuya 4-11-2016 saa 20:56' na Philbert Hagengimana


Amakusanyirizo y’amata yahize andi mu kubungabunga ubuziranenge bw’amata yagororewe kimwe n’amakoperative ayatunganya akayabyaza ibindi biribwa.

Ibyo bigaragaza intambwe igezweho kuva mu myaka icumi ishize ubwo urugamba rwari uwo kwigisha aborozi gukama mu buryo bunoze.

Gukama ni bimwe mu biranga umuco nyarwanda kuko n’ubworozi atari bushya. Icyakora uko abakamyi babigenzaga mu myaka yo hambere, bitandukanye n’uko bimeze ubu, kuko kera wasangaga henshi batita ku buziranenge bw’amata, ariko ubu hamwe n’iterambere bikaba ari ngombwa ko byitabwaho.

Ni muri urwo rwego muri Gashyantare uyu mwaka hasohotse Iteka rya Minisitiri rigenga uburyo bwo kubika, gukusanya, gutwara no gucuruza amata, iri rikagena amabiwiriza yo kubungabunga ubuziranenge bwayo kuva ku mukamyi kugeza ku muntu uzayanywa cyangwa uzarya ibiyakomotsemo.

Abahize abandi mu kubahiriza ibiteganywa n’iryo teka rya Minisitiri, ni bo bahurijwe i Kigali, bagororerwa imbere ya bagenzi babo, banahabwa impanuro zirimo kwirinda kuzambarira ubucocero aho bambariye inkindi.

Nk’uko byasobanuwe n’Umuyobozi ushinzwe Ubugenzuzi n’ibyangombwa muri Minisiteri y’Ubuhinzi n’Ubworozi, Uwumukiza Beatrice, ingororano y’ayo makusanyirizo ndetse n’ibigo bito n’ibiciriritse bitunganya ibikomoka ku mata byegukanye, yemeza ko ibicuruzwa byabo bishobora guhatana n’ibindi ku isoko ry’imbere mu gihugu.

Ati “Ni intambwe ikomeye duteye, buri wese uri hano abifitemo uruhare kugirango umuntu unywa amata, ayanywe yizewe kandi n’ukora ubucuruzi bwayo abyungukiremo. Buri wese hari icyo yakoze kugira ngo tube tugeze aho ubuziranenge bw’amata bugomba kwitabwaho kugira ngo dukomeze tubungabunge ubuzima bw’abantu, baba abanyarwanda ndetse n’abandi bayanywaho dore ko amata y’u Rwanda asigaye acuruzwa mu bihugu duturanye.”

Iyi gahunda yo kugenzura no gutanga ibyemezo ku bahize abandi kubungabunga ubuziranenge bw’amata yagezweho ku bufatanye bwa Minagri n’Ikigega cy’Abanyamerika USAID biciye mu mushinga wayo RDCPII, icyo kigega kikaba cyarashoyemo amafaranga agera kuri miliyoni 15 z’Amadolari n’ubwo atari ko yose yashowe mu buziranenge bw’amata.

Hagenzuwe amakusanyirizo y’amata agera kuri 73, ibyemezo by’ubudakemwa mu buziranenge bikaba byabonywe n’amakusanyirizo 20 gusa arangajwe imbere na Koperative Ihuza Aborozi ba Kijyambere Bafatanyije (IAKIB) yo mu Karere ka Gicumbi.

Ibigo bito n’ibiciriritse bitunganya ibikomoka ku mata byo hagenzuwe 24, ibyemezo bikaba byahawe ibigo 7 gusa.

Icyakora ngo hakurikijwe ko ari ubwa mbere iryo genzura ribaye, abujuje ubudakemwa mu kubungabunga ubuziranenge bw’amata bari ku kigero cyo hasi ariko ngo ni icyo kwishimira, ku buryo binatanga icyizere cy’ibyiza kurushaho ejo hazaza nk’uko byemezwa na Dr Rutagwenda Theogene , Umuyobozi ushinzwe Ubworozi muri MINAGRI.

Yagize ati “Aba twahaye ibyemezo koko twasanze babikwiye kuko hari ibyagendeweho, dufite amakusanyirizo arenga 100 mu gihugu, ariko ubonye ko ari bakeya. Hari abakora neza, hari abakora biringaniye hakaba n’abadakora neza. Icyo kwishimira ni uko umubare w’abakora neza ari munini kandi bakaba bagiye gutera ishyari ryiza abakora neza biringaniye n’abadakora neza.”

Mbere yo kugenzurwa no guhabwa amanota yabahesheje ibyemezo abandi bakabibura, habanje kubaho guhugura abafite aho bahurira n’umukamo, bahabwa ibikoresho byo kwifashisha mu kubungabunga ubuziranenge bw’amata.

Mu igenzura ryatanze amanota harebwaga isuku kuva ku nka mu rwuri, isuku y’umukamyi n’uburyo akama, inyubako y’ikusanyirizo ry’amata, ingano y’udukoko tw’imyanda turi mu mata n’ibindi.

Dr Rutagwenda, Umuyobozi ushinzwe ubworozi muri Minagri
IAKIB ni yo yaje ku mwanya wa mbere mu manota mu igenzura ryo kubungabunga ubuziranenge bw'amata
Mu bigo bito n'ibiciriritse, icyo muri Rutsiro ni cyo cyaje ku mwanya wa mbere
Umuyobozi w'Ihuriro ry'aborozi n'abakora ibifite aho bihuriye n'amata

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved