Abajyanama b’ubuzima bagiye kongererwa ubushobozi bigere ku ndwara zo mu matwi

Yanditswe na Evariste Nsengimana
Kuya 19 Kanama 2018 saa 04:46
Yasuwe :
0 0

Mu mezi abiri, abajyanama b’ubuzima bazaba batangiye guhabwa amahugurwa abafasha gusuzuma no kwita ku barwaye indwara z’amatwi n’abatumva.

Minisitiri w’Ubuzima Dr. Diane Gashumba yatangaje ko Umuryango w’Abanyamerika ‘Starkey Hearing Foundation’ uzagira uruhare mu guhugura abajyanama b’ubuzima.

Ati “Turateganya ko batanga n’amahugurwa ku bajyanama b’ubuzima kugira ngo bimanuke bigere mu midugudu kuko ntabwo ari ikintu kiruhije cyane.”

“Tugize amahirwe bagahabwa aya mahugurwa, twakwizera ko abanyarwanda bose bagifite iki kibazo bagera kuri ubu buvuzi bitabagoye.”

Dr Gashumba yavuze ko ikibazo cyo kutumva gihangayikishije u Rwanda n’Isi muri rusange ku buryo hakenewe ingamba zihamye.

Ibarura riheruka gukorwa mu 2012, ryerekanye ko mu banyarwanda 466,453 bafite ubumuga bangana na 5% by’abaturage bose, 8% byabo bari bafite ibibazo byo kutumva kandi 68% babutewe n’indwara barwaye.

Ku Isi, Ishami ry’Umuryango w’Abibumbye ryita ku buzima, rigaragaza ko muri uyu mwaka, mu bantu miliyoni 466 bafite ibibazo byo kutumva, abana bangana na miliyoni 33.

Ikindi ni uko 90% by’abatumva bose bari mu bihugu bikiri mu nzira y’amajyambere.

Umuyobozi wa Starkey Hearing Foundation, Bill Austin, kuri uyu wa Gatanu ubwo uyu muryango wasuzumaga abafite ubu burwayi, yavuze ko intego ari ugufasha abakeneye gufashwa bose.

Ati “Twifuza ko abajyanama b’ubuzima baba bari hafi y’abaturage, bakabasha kwitegereza abaturage barwaye mu matwi, bagahabwa n’ubumenyi bwabafasha kwita ku baharwaye.”

Ubusanzwe gahunda zo kuvura indwara zo mu matwi mu Rwanda, zatangirwaga ku mavuriro yisumbuye nko mu bitaro by’Intara n’iby’Uturere.

Kutumva n’indwara zo mu matwi, zituruka ku burwayi buba bwaravuwe nabi nka mugiga, umuhaha, gufata imiti myinshi, kujomba mu matwi ibintu bibonetse byose n’ibindi ariko hari n’ubwo umuntu abivukana.

Mu Rwanda habarurwa abajyanama b’ubuzima 45, 516.

Minisitiri w'Ubuzima Dr. Diane Gashumba ari kuganiriza umwana wasuzumwe indwara zo mu matwi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza