Abakekwaho iterabwoba basabye kuburanira mu ruhame

Yanditswe na Cyprien Niyomwungeri
Kuya 16 Gashyantare 2017 saa 08:02
Yasuwe :
0 0

Urubanza rw’Abanyarwanda 48 bakekwaho iterabwoba rwasubitswe igihe kigera ku kwezi kubera ibibazo birimo kuba hari abadafite ababunganira mu mategeko.

Aberegwa biganjemo urubyiruko, ubushinjacyaha bubarega ibyaha by’iterabwoba, ubuhezanguni, ubugambanyi, gushishikariza abandi gukora iterabwoba no kurema umutwe w’abagizi ba nabi.

Umucamanza mu rugereko rwihariye ruburanisha ibyaha mpuzamahanga mu rukiko rukuru, yavuze ko ‘Urubanza ruzasubukurwa kuwa 15 Werurwe asaba ko buri wese mu bakekwaho icyaha azaba afite umwunganizi mu mategeko.’

The East African dukesha iyi nkuru ivuga ko urukiko rwasabye ihuriro ry’abavoka mu Rwanda guha abunganira mu mategeko abakekwaho ibyaha bazagaragaza ko nta bushobozi bafite bwo kubiyishyurira.

Kuri iyi ngingo hakaba hagaragajwe imbogamizi y’uko bamwe mu bakekwaho ibyaha badafite ababunganira mu mategeko kuko batarabona ibyemezo by’ibyiciro by’ubudehe barimo, hakaba n’abafungiye muri gereza ziri kure y’imiryango yabo bikaba bigoranye gushyikirizwa ibyo byemezo.

Hari kandi ibibazo birimo nk’abatarabashije gusoma amadosiye yabo kubera ibibazo by’ikoranabuhanga.

Abaregwa ndetse n’abunganizi ba bamwe, bongeye gusaba urukiko ko baburanira mu ruhame kugirango imiryango yabo n’abandi bose baje gukurikirana urubanza, babashe kwiyumvira ukuri bityo hatangwe ubutabera bukwiye.

Urukiko rukazafata umwanzuro kuri iki cyifuzo mu kwezi gutaha, nubwo ubushinjacyaha bwo bukomeje gusaba ko urubanza rwashyirwa mu muhezo nk’uko byagenze mu maburanisha yabanje, bushingiye ko kurushyira mu ruhame bishobora guhungabanya umutekano w’igihugu.

Kuva batabwa muri yombi, abakekwaho iterabwoba bakomeje guhishwa rubanda ndetse n’imanza zabo zibera mu muhezo.

Urukiko kandi ruzafata umwanzuro niba abana babiri bari muri urwo rubanza baburanishwa ukwabo kuko urukiko rukuru nta rugereko ruburanisha abana rufite. Umwunganizi w’umuhungu w’imyaka 17 na mushiki we w’imyaka 15 bari muri iyi dosiye, yibukije urukiko ko abo bakwiriye kuburanishwa bonyine mu cyumba cyahariwe abatagejeje ku myaka 18 kiri mu rukiko rwisumbuye.

Abakekwaho iterabwoba bafungiye muri gereza zitandukanye zirimo; Mpanga, Musanze na Kigali. Batawe muri yombi guhera muri Werurwe 2016.

Hejuru ku ifoto: Abaregwa ibyaha by’iterabwoba mu rukiko kuri uyu wa Kane tariki ya 15 Gashyantare 2017 / Ifoto: Cyril Ndegeya


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza