‘Abapadiri bahunze ntibazagira amahoro badatashye ngo bunge umuryango’

Yanditswe na Philbert Girinema
Kuya 9 Mutarama 2017 saa 07:25
Yasuwe :
0 0

Abakirisitu Gatolika 166 bo muri Paruwasi ya Nyamata, bakomorewe amasakaramentu arimo ukarisitiya na Batisimu ku bana babo ndetse n’ugushyingirwa nyuma yo kwicuza no gusaba imbabazi abo bakoreye ibyaha muri Jenoside yakorewe Abatutsi.

Ibi byakurikiwe n’inyigisho z’isanamitima baherewe mu matsinda kuva ku itariki ya 1 Nyakanga 2016.

Mu gitambo cya misa aba bakirisitu babohorewemo, Padiri Mukuru wa Paruwasi ya Nyamata, Emmanuel Nsengiyumva, yavuze ko umubare w’abakirisitu bicuza bakanasaba imbabazi ukiri muto ugereranyije n’uburemere bw’ibyaha bya Jenoside mu Karere ka Bugesera.

Yavuze ko abagize uruhare muri Jenoside bangana na 252 aribo bari batangiye aya masomo y’isanamitima ariko ko 86 batigeze bayarangiza kuko batujuje ibyasabwaga ngo bakomorerwe amasakaramentu.

Abakisitiru gatolika bashimye iyi gahunda y’isanamitima ndetse basaba ko yagezwa no mu yandi maparuwasi. Bavuze ko ari uburyo bwiza bwo kwimakaza ubumwe n’ubwiyunge.

Umunyamabanga Nshingwabikorwa wa Komisiyo y’Igihugu y’Ubumwe n’Ubwiyunge (NURC), Fidèle Ndayisaba, yasabye amadini kwimakaza ihame ry’ubumwe n’ubwiyunge binyuze mu kubwizanya ukuri nka kimwe mu bigira uruhare mu kubaka igihugu.

Padiri Ubald Rugirangoga watangije iyi gahunda y’isanamitima mu 2008, yavuze ko mu 1994, abihayimana bananiwe inshingano zabo zo kuyobora abakirisitu kugira ngo bitandukanye n’umugambi w’ubwicanyi.

Yavuze ko hari abapadiri bamwe bahunze igihugu ubu bakaba baba mu mahanga gusa ko batazigera bagira amahoro mu gihe cyose badatahutse ngo nabo bagire uruhare muri gahunda nk’izi zo kunga umuryango nyarwanda.

Nyamata ibaye paruwasi ya gatatu ikorewemo iyi gahunda y’isamitima aho abagize uruhare muri Jenoside bagakatirwa n’inkiko ndetse bakarangiza ibihano byabo, bicuza bakanasaba imbabazi nyuma y’aho byari byarakozwe muri Paruwasi ya Musha na Ntendezi muri Diyosezi ya Cyangugu mu Ntara y’Uburengerazuba.

Nyuma yo gusaba imbabazi, aba bakirisitu bakomorewe amasakaramentu
Abakomorewe abana babo bahawe amasakaramentu
Umuyobozi w'Akarere ka Bugesera, Emmanuel Nsanzumuhire, ubwo yahaga abakirisitu impanuro
Umunyamabanga Nshingwabikorwa wa Komisiyo y’Igihugu y’Ubumwe n’Ubwiyunge (NURC), Fidèle Ndayisaba, yasabye amadini kwimakaza ihame ry’ubumwe n’ubwiyunge
Padiri Ubald Rugirangoga watangije iyi gahunda y'isanamitima atera amazi y'umugisha abakirisitu bari bamaze gusaba imbabazi

Amafoto: TNT


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza