Kwamamaza

Abakobwa babyariye iwabo basabye bagenzi babo kwigobotora ubuhendabana bw’abagabo

Yanditswe kuya 11-10-2016 saa 17:01' na Emma Marie Umurerwa


Gutukwa, gukubitwa, no guta ishuri bakiri bato ni bimwe mu bibazo abakobwa bari hagati y’imyaka 15 na 21 bo mu Mirenge ya Ndatemwa, Kiziguro na Murambi ho mu Karere ka Gatsibo bavuga ko bakunze guhura nabyo bakimara guterwa inda.

Ibi babitangaje kuri uyu wa 11 Ukwakira mu birori byo kwizihiza Umunsi Mpuzamahanga w’Umukobwa byabereye mu Murenge wa Kiziguro.

Umwe muri aba bakobwa witwa Cyuzuzo Devota yatangaje ko yatewe inda akiri muto kubera gushukwa n’abagabo, ndetse agira bagenzi be inama yo kudashiturwa .

Yagize ati "Natewe inda ntaragira imyaka 15 kuko ubu nibwo nyujuje kandi narabyaye, nkaba nsaba abatarahura n’ibyo nahuye na byo kwirinda ubuhendabana bw’abagabo."

Umuyobozi w’Akarere ka Gatsibo, Gasana Richard yavuze ko abagabo n’abasore bashukisha abana ubuhendabana bakwiye kwisubiraho.

Yagize ati "Gutera umwana w’umukobwa inda cyangwa indwara zandurira mu mibonano mpuzabitsina bihanwa n’amategeko. Nta mibare mfite y’abakobwa batewe inda n’abazibyaye ariko abafashwe bamaze kubihanirwa n’amategeko."

Yakomeje asaba ababyeyi kudateshuka ku nshingano zabo zo kurera by’umwihariko abana b’abakobwa kuko aribo bahura n’ibishuko byinshi.

Mu butumwa bwagarutsweho mu ndirimbo no mu mivugo bwibandaga cyane ku mbogamizi abakobwa bahura na zo zirimo gucuruzwa, gufatwa ku ngufu, guta ishuri bakajya gukora akazi ko mu rugo, guterwa inda zitateganyijwe n’ibindi.

Umunsi Mpuzamahanga w’Abakobwa watangiye kwizihizwa ku rwego rw’Isi kuya 11 Ukwakira 2012.

Ishami ry’Umuryango w’Abibumbye ryita ku burenganzira bw’abagore ritangaza ko Isi ituweho n’abakobwa miliyari imwe na miliyoni 100.

Muri Afurika yo munsi y’Ubutayu bwa Sahara, niho hagaragara ubwinshi bw’abakobwa bashyingirwa batarageza ku myaka y’ubukure ku Isi. Nibura abakobwa bane mu 10 bashyingirwa mbere y’imyaka 18, mu gihe umwe mu bakobwa umunani ashyingirwa atarageza ku myaka 15.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved