Abakobwa bahize abahungu mu bizamini bisoza amashuri yisumbuye

Yanditswe na Ishimwe Israel
Kuya 16 Gashyantare 2017 saa 04:21
Yasuwe : XX
1

Minisiteri y’Uburezi yatangaje amanota y’abanyeshuri basoje amashuri yisumbuye mu mwaka wa 2016, aho mu batsinze neza mu masomo y’ubumenyi rusange, umubare munini ari uw’abakobwa.

Amanota yatangajwe kuri uyu wa Kane tariki ya 16 Gashyantare 2017 ni ay’abanyeshuri bakoze ibizamini bisoza umwaka wa gatandatu mu masomo y’Ubumenyi rusange no mu myuga n’ubumenyingiro ndetse n’inderabarezi.

Mu mwaka ushize mu bize ibijyanye n’amasomo rusange, abiyandikishije ni 41,609 muri bo hakoze 41,240 bangana na 99.1%. Muri bo abagera ku 36 916 bangana 89.5% batsinze neza. Muri uyu mubare w’abatsinze, abahungu bangana na 47.5% naho abakobwa ni 52.5%.

Mu nderabarezi, abanyeshuri bari biyandikishije ku gukora ibizamini bisoza amashuri yisumbuye bari 2787, abakoze ni 2782; muri bo abatsinze neza bangana na 2773 bari ku kigero cya 99.6%.

Minisiteri y’Uburezi itangaza ko umubare w’abatsinda ugenda wiyongera uko imyaka ikurikirana kuko mu 2013, iyi mibare yanganaga na 88,1%, mu 2014 yari 87,5 %, mu 2015 ingana na 99,02%, mu gihe mu mwaka ushize bageraga kuri 99,82%.

Ku rundi ruhande umubare w’abanyeshuri basanzwe batsinze ibizamini neza ugenda wiyongera kuko ugereranyije umwaka wa 2015 na 2016, iyi mibare yazamutseho 4,3%.

Mu myuga n’ubumenyi ngiro hari hiyandikishije abanyeshuri 24086 hakora 24074; muri aba barimo abanyeshuri basanzwe 23 667 (98.26%), n’abakandida bigenga 416 (1,74%). Muri aba bose, abakobwa bagera ku 10724 (44,53%) n’abahungu 13361(55,47%). Abatsinze neza ikizamini cya leta bemerewe guhabwa impamyabumenyi ni 21283 bangana na 88,41%. Muri aba 90% ni abahungu naho 86% ni abakobwa.

Umubare w’abakoze bakanatsinda ibizamini bijyanye na TVET wazamutseho 9% ugereranyije na 2015 kuko wavuye ku 21,305.

MINEDUC yahamije ko iterambere mu bijyanye n’imyuga rigenda rishinga imizi

Umunyamabanga wa Leta ushinzwe amashuri abanza n’ayisumbuye muri Minisiteri y’Uburezi, Isaac Munyakazi yagize ati “ Mu rugamba rwa Leta y’u Rwanda rwo kugeza kuri 60% abanyeshuri bajya muri TVET. Icya mbere twishimira ni uko uyu mubare wiyongereye, izi mpinduka zituma abana bava mu masomo ajyanye n’ubumenyi rusange bakajya mu myuga ni urugamba tugomba kurwana twese.Imyumvire igahera ku babyeyi bafasha abana kubereka aho bagomba kujya, tukumva ko aricyo cyerekezo cy’igihugu ku buryo ugiye mu mwuga atabifata nk’ibintu bitamufitiye akamaro."

Yakomeje agira ati "Kera umwana yajyaga mu bwubatsi, mu bubaji, akumva ko hajyamo ababuze ibyo bakora. Ubu ngubu yakabaye ari imyumvire itandukanye, abantu benshi bagashishikarizwa guhitamo n’amashuri y’imyuga kugira ngo binyuze muri politiki yashyizweho turusheho kuzamura uyu mubare.”

Umunyamabanga wa Leta Ushinzwe Amashuri y’Imyuga n’Ubumenyingiro, Rwamukwaya Olivier yatangaje gahunda ya Leta iteganya ko mu barangije icyiciro rusange, abagera kuri 60% bakwiye gukomeza mu masomo y’ubumenyi ngiro, abandi basigaye bakiga ay’ubumenyi rusange.

Mu mwaka wa 2015, imibare igaragaza ko u Rwanda rwari ruhagaze ku kigereranyo cya 55% ndetse bizeye ko iyi mibare iziyongera binyuze mu gushyiraho amashuri menshi y’imyuga, n’abarimu babifitiye ubushobozi.

Umunyeshuri ushaka kureba amanota ashobora kunyura ku rubuga rwa WDA n’urwa REB, www. reb.rw cyangwa akohereza ubutumwa bugufi yanditse ahagenewe kwandikwa ubutumwa S6 ugakurikizaho Code y’umunyeshuri ukohereza kuri 489.

Abanyeshuri bahaniwe gukopera ariko bashaka kongera kuburana bazatanga ibirego byabo nyuma y’iminsi 30 kuva ku itariki amanota yatangarijweho.

Uhereye ibumoso: Umuyobozi Mukuru wa REB, Gasana Janvier; Umunyamabanga wa Leta ushinzwe amashuri abanza n’ayisumbuye, Isaac Munyakazi n'Umunyamabanga wa Leta Ushinzwe Amashuri y’Imyuga n’Ubumenyingiro, Rwamukwaya Olivier mu gikorwa cyo gutangaza amanota
Mu gushyira ahagaragara amanota y'abasoje amashuri yisumbuye, hagarutswe ku iterambere ry'imyuga n'ubumenyi ngiro
Umunyamabanga wa Leta ushinzwe amashuri abanza n’ayisumbuye, Isaac Munyakazi atangaza ko amasomo y'imyuga n'ubumenyi ngiro agenda atera imbere
Umunyamabanga wa Leta Ushinzwe Amashuri y’Imyuga n’Ubumenyingiro, Rwamukwaya Olivier
Umuyobozi Mukuru Wungirije ushinzwe ibizamini muri REB, Dr Muvunyi Emmanuel, na Gasana Janvier uyobora REB
Umuyobozi wungirije w' Ikigo cy'Igihugu cy'Imyuga n'Ubumenyingiro, WDA, ushinzwe amahugurwa, Irenée Nsengiyumva
Umuyobozi muri Kaminuza y'u Rwanda, Ishami ry'Uburezi, Prof Niyomugabo Cyprien mu muhango wo gutangaza amanota ku mugaragaro
Abanyamakuru batandukanye mu cyumba cya Minisiteri y'Uburezi ubwo hatangazwaga amanota y'abarangije amashuri yisumbuye mu 2016

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza