Abakobwa baje imbere mu mitsindire y’ikizamini cya leta mu 2016

Yanditswe na Philbert Girinema
Kuya 9 Mutarama 2017 saa 11:21
Yasuwe : XX
0

Minisiteri y’uburezi yatangaje ko mu gutsinda ikizamini cya leta mu 2016, mu mashuri abanza abanyeshuri batsinze ku gipimo cyo hejuru, mu mashuri abanza ari 5.32%, mu gihe mu bakoze ikizamini gisoza icyiciro rusange ho abatsinze ku inota ryo hejuru ari 11%.

Gusa imibare yatangajwe yerekana ko muri rusange abakobwa aribo baza imbere mu mubare munini w’abatsinze, ariko ko iyo bigeze ku gutsindira ku inota ryo hejuru, abahungu baza imbere y’abakobwa.

Mu mashuri abanza, abanyeshuri 159 785 barimo abakobwa 55.1% n’abahugu 44.9% nibo batsinze ikizamini mu bakandida 187 139 bakoze. Gusa mu batsindiye ku inota ryo hejuru abahungu nibo benshi, kuko mu 9957 (5.32% by’abatsinze), bihariye 57.43% abakobwa bagasigara ari 42.57%.

Mu cyiciro rusange ho hatsinze 79 655 bagizwe n’abakobwa 52.14% n’abahungu 47.86%, mu bakandida 89 421 bakoze ikizamini. Nabwo mu batsindiye ku inota ryo hejuru abahungu baza imbere, kuko mu 9 597 (11% by’abatsinze), biharira 62.25% abakobwa bagasigara ari 37.75%.

Ubwo yatangazaga amanota y’ibizamini bya Leta kuri uyu wa Mbere, Umunyamabanga wa Leta Ushinzwe amashuri abanza n’ayisumbuye, Isaac Munyakazi, yagaragaje ko abakobwa bakomeje kugira umubare munini w’abatsinze ikizamini cya leta.

Umubare w’abana bakoze ibizamini bose mu 2015, abakobwa bari 55%, abahungu bari 46%. Abatsinze ku inota ryafatiweho mu cyiciro cya mbere baba 6482 bangana na 4.4%.

Ati « Turishimira ko umubare wazamutse, aho bigaragara ko abana batsinze mu cyiciro cya mbere ari 9 957 bangana na 5.32%. Mu by’ukuri ni ikintu twakwishimira tugereranyije umwaka washize n’uyu mwaka, noneho mu bindi byiciro ni ukuvuga ku cya 2 kugeza mu cya 4, ikigaragara ni uko mu gihe ubushize bari batsindiye ku inota rya 84.8%, uyu mwaka abatsinze nanone umubare wazamutse ugera kuri 85.4%. Abahungu muri bo bakaba bangana na 44.9%, abakobwa bakaba bangana na 55.1 ku ijana.”

Mu mashuri abanza, abanyeshuri bakoze ibizamini bya Leta mu 2016 bari 194 679.

Munyakazi yakomeje agira ati “Mu cyiciro rusange ho ikigaragara na bwo umubare w’abana batsinze warazamutse, aho abatsinze mu cyiciro cya mbere bavuye ku 10% mu mwaka ushize baba 11%, mu bindi byiciro bisigaye kuva ku cya kabiri kugeza ku cya kane, umwaka ushize bari batsinze kuri 87.24% ubungubu twakwishimira ko byazamutse bikagera kuri 89%. Abahungu bangana 47.8%, abakobwa nibo benshi batsinze kuri 52.14%.”

Aya manota uyu munsi ababyeyi n’abanyeshuri barashobora kuza kuyabona hakoreshejwe uburyo bubiri, burimo ubwa SMS aho bakoresha 489, bagashyiraho numero iranga umwana, cyangwa gusura urubuga rwa REB, umuntu akajya ahabugenewe, agashyiramo code y’umunyeshuri n’icyiciro yigagamo.

Munyakazi yakomeje agira ati “Mbere y’uko iki cyumweru kirangira abana bose turaba twabashyize mu myanya, mu mashuri biga bataha n’ibigo bigamo bacumbitse. Kuwa Mbere hakoreshejwe bwa buryo bukoreshwa mu kumenya amanota yabo, bazabona ibigo boherejwemo, bakazaba bafite icyumweru cyose cyo kwitegura no kubona ibisabwa.”

Biteganyijwe ko igihembwe cya mbere cy’umwaka w’amashuri wa 2017 kizatangira kuwa 23 Mutarama kikazarangira kuwa 31 Werurwe, kikazamara ibyumweru 10.

Igihembwe cya kabiri kizatangira kuwa 17 Mata 2017 kirangire kuwa 29 Nyakanga 2017 mu gihe kingana n’ibyumweru 15, naho icya gatatu gitangire kuwa 14 Kanama 2017 kirangire kuwa 18 Ugushyingo 2017, kikazamara ibyumweru 14.

Niba nta gihindutse, ibizamini bya leta ku bazasoza amashuri abanza mu 2017 bizaba hagati ya tariki 15-17 Ugushyingo 2017, naho ku basoza icyiciro rusange n’amashuri yisumbuye bikorwe hagati ya tariki 20 Ugushyingo n’iya 01 Ukuboza 2017.

Umunyamabanga wa Leta Ushinzwe amashuri abanza n’ayisumbuye, Isaac Munyakazi ashyikirizwa amanota n’Umuyobozi Mukuru mu kigo cy’Igihugu gishinzwe uburezi, REB, Gasana Janvier
Umunyamabanga wa Leta Ushinzwe amashuri abanza n’ayisumbuye, Isaac Munyakazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza