Abakobwa basoje amashuri yisumbuye bahawe ubumenyi buzabafasha guhindura aho batuye

Yanditswe na Ishimwe Israel
Kuya 12 Gicurasi 2019 saa 10:13
Yasuwe :
0 0

Abakobwa 21 basoje amashuri yisumbuye bahawe amahugurwa y’amezi atanu agamije kububakamo ubushobozi bwo kuvugira mu ruhame no guhanga imirimo izana impinduka muri sosiyete, bahawe umukoro wo kubyaza umusaruro ubumenyi bahawe.

Aya mahugurwa yateguwe ku bufatanye bw’Umushinga wa Resonate na Ambasade ya Leta Zunze Ubumwe za Amerika mu Rwanda. Yatangiye ku wa 11 Ukuboza 2018.

Resonate ifite gahunda zigamije gufasha abagore gutahura ubushobozi bifitemo mu miyoborere no gukoresha neza amahirwe bafite. Zirimo iyo kuzamura abagore mu miyoborere bigishwa gukora inkuru zijyanye n’imiyoborere zibafasha kwigirira icyizere, kuvugira mu ruhame no gufata ibyemezo; Iterambere ry’umwuga aho bafashwa kubona ubumenyi bakwifashisha mu kazi harimo nko gukemura ibibazo, kunoza ihererekanyamakuru n’ibindi.

Uyu mushinga unafite amahugurwa ajyanye n’ubuyobozi bugaragaza ibikorwa, yo gutoza urubyiruko imiyoborere no gutegura imishinga.

Binyuze mu mahugurwa, uyu mushinga wahuje imbaraga na Ambasade ya Amerika muri gahunda yo kubaka ubushobozi bw’abana b’abakobwa yiswe ‘Step up’.

Abakobwa bahuguwe ni abatoranyijwe mu basoje amashuri yisumbuye mu bigo by’amashuri mu gihugu hose, bahawe impamba y’ubumenyi buzabafasha kwiteza imbere.

Mu muhango wo kubashyikiriza impamyabushobozi wabereye ku Kacyiru ku wa 9 Gicurasi 2019, aba bakobwa bagaragaje ko bungukiye byinshi muri aya mahugurwa.

Abaganiriye na IGIHE bavuze ko bagiye gukoresha ubumenyi bahawe mu kuzana impinduka mu rungano rwabo no mu muryango mugari baturukamo.

Kagina Laura wasoje amashuri yisumbuye mu Ishami ry’Amateka, Ubukungu n’Ubuvanganzo muri Kigali Christian School, yavuze ko “Batwigishije guhanga imirimo, nzegera bagenzi banjye dufatanye kwiga imishinga yatuvana mu bukene.’’

Mugenzi we Uwera Desange wize mu Agahozo Youth Village yagaragaje ko ubumenyi yahawe abufata nk’impamba izamusindagiza.

Uyu mukobwa wize mu Ishami ry’Imibare, Ubukungu n’Ubumenyi bw’Isi (MEG) yagize ati “Ubumenyi navanye aha nzabusangiza inshuti nazo zibwubakireho. Hari ibyo twigishwaga mu magambo tukiri ku ishuri ariko mu mahugurwa twabishyize mu ngiro. Ibyo twigishijwe byanyubatsemo icyizere cy’ahazaza.’’

Mu gukurikirana abakobwa bahuguwe, nyuma y’amezi atandatu Resonate ireba ishyirwa mu bikorwa ry’imishinga bamuritse, impinduka yazanye mu buizima bwabo no muri sosiyete bakoreramo.

Umuyobozi ushinzwe Gahunda muri Resonate, Sibo Nancy, yavuze ko urubyiruko rw’abakobwa rusoje amashuri yisumbuye rwafashijwe gutahura imbaraga rwifitemo n’uko rwazibyaza umusaruro.

Yagize ati “Intego y’amahugurwa kwari ukubafasha kwiyongerera icyizere n’ubumenyi bwo kuvugira mu ruhame babara inkuru z’imiyoborere. Nyuma yo kumenya aho bafite imbaraga, bizatuma bazikoresha mu kubyaza umusaruro imishinga ikemura ibibazo batahuye muri sosiyete batuyemo.’’

Umuyobozi wa Resonate mu Rwanda, Norette Turimuci, yabwiye IGIHE ko abakobwa bahawe ubumenyi, banafashijwe gutegura imishinga yabo.

Yagize ati “Icya ngombwa ni ukuzirikana ko ubumenyi bahawe babukoresha mu buzima bwabo bwose. Aho bari mu miryango, mu gihe bazajya muri kaminuza, bafite ubumenyi buzabafasha.’’

Aya mahugurwa aje akurikira umushinga wagutse Resonate yamuritse muri Nzeri 2018 wo guha ubumenyi abafashamyumvire bazahugura abagore n’abakobwa kwiyubaka no kubakirwaho iterambere rirambye ry’igihugu

Resonate yatangijwe mu Rwanda mu 2013, yibanda ku kuzamura ijwi ry’umugore mu gihugu giha agaciro ihame ry’uburinganire n’ubwuzuzanye.

Kuva mu 2014, Resonate yakoranye n’abafatanyabikorwa barenga 65, inahugura mu by’imiyoborere abagore n’urubyiruko muri Afurika y’Uburasirazuba.

Mu bitabiriye amahugurwa yayo mu 2018, abagera kuri 60% babonye imyanya y’ubuyobozi, 36% batangije imishinga mu gihe 43% barimo ababonye imirimo mishya, abazamuwe mu ntera n’abakomeje amasomo.

Abakobwa basoje amashuri yisumbuye bavuye mu mahugurwa bagaragaje imirimo bashobora kwihangira
Umuyobozi ushinzwe Gahunda muri Resonate, Sibo Nancy, yavuze ko abakobwa bahuguwe bafashijwe kumenya uko babyaza umusaruro imbaraga bifitemo
Abakobwa 21 basoje amashuri yisumbuye bahawe impamba y’ubumenyi buzabafasha guhindura sosiyete
Uwera Desange (hagati) wize mu Agahozo Youth Village yishimiye ubumenyi yungukiye mu mahugurwa. Aha yashyikirizwaga impamyabushobozi n'abarimo Umuyobozi wa Resonate mu Rwanda, Norette Turimuci (ibumoso) n'uhagarariye Ambasade ya Leta Zunze Ubumwe za Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza