Kwamamaza

Abakomoka i Rubavu biyemeje gukura akarere kabo mu isoni

Yanditswe kuya 20-11-2016 saa 20:04' na Mukwaya Olivier


Abakomoka mu Karere ka Rubavu, batuye i Kigali no mu yindi mijyi ndetse n’ababa hanze y’igihugu, biyemeje kugira uruhare mu kwesa imihigo y’umwaka 2016-2017 no kugira uruhare rukomeye mu guhiga iy’umwaka 2017-2018 mu rwego rwo kuzamura akarere kabo bagakura mu myanya y’inyuma kazamo.

Mu nama yabahuje n’ubuyobozi bw’aka karere ku wa 19 Ugushyingo 2016 mu Mujyi wa Kigali, abakomoka i Rubavu batahatuye kubera impamvu zitandukanye, bavuga ko bitumvikana uburyo akarere kabo gahora mu myanya ya nyuma mu kwesa imihigo kandi hari amahirwe menshi karusha utundi turere, biyemeza guhaguruka bakayigiramo uruhare.

Manishimwe Ramadhan yagize ati "Twimutse kubera impamvu zitadukanye, ubu hashyizweho ihuriro riduhuza; ni imbaraga nyinshi twungutse, tugiye gufashanya tuzamura iterambere ry’akarere muri byose. Byari bibabaje kubona akarere kacu gahora inyuma, natwe iyo tubyumvise biratubabaza.”

Akomeza yemeza ko we na bagenzi be bagiye gushyira imbaraga hamwe kugira ngo bazamure akarere kabo, bagakura ku myanya ya nyuma mu mihigo gakunda kugaragaramo. Biyemeje kuhashora imari ndetse banakangurira abatahazi kuyihashora mu rwego rwo guteza imbere abaturage baho n’igihugu muri rusange.

Guverineri wIntara y’Iburengerazuba, Munyantwari Alphonse, yavuze ko nta mpamvu yo guhatanira imyanya ya nyuma kandi imyiza ihari n’amahirwe yuzuye.

Ati "Mukwiye guhagarara nk’Inganji (izina ry’ubutore ry’akarere ka Rubavu), aho muri mugakora ibyiza biteza imbere igihugu n’akarere mwavutsemo mukakazirikana. Umusanzu wanyu urakenewe,uruhare rwanyu mu kugafasha kwesa imihigo rurakenewe; kuba mwihurije hamwe bizatuma akarere kazamuka.”

Yakomeje agira ati "Wahitamo imyanya y’inyuma iy’imbere ihari ? Nta mpamvu yo kurwanira imyanya ya nyuma mu mihigo kandi iy’imbere ihari. Akarere ntacyo kabuze, musabwe kugaragaza uruhare rwanyu mu kuzamura imihigo, gushora imari ndetse no kwereka abandi amahirwe ahari muharanira kuzamura akarere n’igihugu.”

Minisitiri w’Umuco na Siporo, Uwacu Julienne, na we ukomoka mu Karere ka Rubavu, yasabye guverineri kwita ku karere ashingiye ku mahirwe ahaboneka kuko abona byazamura n’utundi turere duturanye na Rubavu.

Yagize ati "Akarere ka Rubavu gafite byinshi byakubakirwaho kugira ngo gatere imbere n’amahirwe utasanga ahandi harimo ikiyaga cya Kivu twashoramo imari zitandukanye,ubutaka n’ibindi hakiyongeraho kuba bafite isoko ryagutse muri Repubulika Iharanira Demukarasi ya Congo. Aya mahirwe muyabyaze umusaruro, mwubatse ikipe y’abahakomoka ikwiye gukora iharanira kuzamura imihigo.”

Yakomeje agira ati " Dukwiye kurwanya ipfunwe ryo guhora inyuma mu mihigo tugira uruhare mu kuzamura akarere kacu; ubushize kegukanye umwanya wa 21;kuki gahora inyuma? Uruhare rwanyu rurakenewe mu kurwanira imyanya y’imbere.”

Mu bindi abitabiriye iyi nama biyemeje, harimo nko gutekereza ku mishinga itandukanye y’igihe kirekire yajya ikomeza guteza imbere abatuye akarere ka Rubavu binyuze mu kubaha imirimo n’ibindi.

Muri iyo mishinga harimo gutunganya icyambu ku buryo bugezweho, gushyira amato manini mu kiyaga cya Kivu, kubaka ibitaro bigezweho mu karere, gutekereza ku ruganda ruconga amabuye y’amakoro aboneka henshi mu karere ka Rubavu no kubaka ububiko bwajya bwifashishwa mu bucuruzi bwambukiranya imipaka n’ibindi.

Uretse Minisitiri w’Umuco na Siporo Uwacu Julienne wari witabiriye iyi nama nk’umwe mu bakomoka mu karere ka Rubavu bakora mu nzego nkuru z’igihugu, yanitabiriwe na Minisiti w’Uburinganire n’Iterambere ry’Umuryango, Nyirasafari Esperance, Abasenateri n’Abadepite batandukanye mu Nteko Ishinga Amategeko ndetse n’abikorera ku giti cyabo.

Abayobozi batandukanye mu nzego z'igihugu n'abikorera bakomoka i Rubavu bari bitabiriye iyi nama
Abanyarubavu batanze ibitekerezo byazamura akarere kabo
Guverineri w'Intara y'Iburengerazuba, Alphonse Munyantwari
Minisitiri Uwacu Julienne yasabye Abanyarubavu kugira uruhare mu iterambere ry'akarere bakomokamo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved