Kwamamaza

Bugesera: Imyaka itatu irirenze abakoze ku nyubako y’Akarere batishyurwa

Yanditswe kuya 16-11-2016 saa 12:07' na Bukuru J.C


Bamwe mu baturage bakoze imirimo yo kubaka Ibiro by’Akarere ka Bugesera n’abakagurishije ibikoresho by’ubwubatsi, baravuga ko imyaka ibaye itatu batishyurwa amafaranga bakoreye n’ay’ibyo batanze.

Aba baturage bari hagati ya 25 na 30, bavuga ko ufitemo amafaranga make ari ibihumbi 300 naho uwa menshi ngo ni miliyoni 20 z’amanyarwanda.

Bamwe mu baganiriye na TV1, bavuze ko baheze mu gihirahiro, dore ko rwiyemezarmirimo wabakoresheje yasheshe amasezerano n’Akarere ka Bugesera atabishyuye, isoko rigahabwa undi.

Hari abapfuye batishyuwe amafaranga bakoreye

Uretse ibibazo by’ubukene, kutishyura amafaranga y’ubwisungane mu kwivuza, inzara no kutabona ubushobozi bwo kwishyurira abana babo amafaranga y’ishuri, aba baturage bemeza ko ngo hari abapfuye batishyuwe amafaranga yabo bakoreye kuri iyi nyubako y’akarere.

Umwe yagize ati “Umugabo wakingaga izi nzugi ejobundi nibwo twavuye kumushyingura yishwe n’umutima.”

Bavuga ko ubuyobozi bw’Akarere bwagiye bubizeza ko buzabishyura, none amaso akaba yaraheze mu kirere, ku buryo ubu noneho ngo bababwira ngo barege rwiyemezamirimo wabakoresheje.

Akarere ka Bugesera ntigateganya kwishyura aba baturage

Mu gihe aba baturage bavuga ko bagomba kwishyurwa n’Akarere ka Bugesera, Umunyamabanga Nshingwabikorwa wako, Hakizimana Elie, avuga ko nta mafararanga biteguye guha aba baturage, ahubwo ko icyo bazabamarira ari ukubafasha mu gihe bazaba bareze rwiyemezamirimo wabambuye.

Yagize ati “Ibyo abaturage bakubwiye nibyo kandi nk’Akarere biranaduhangayikishije, rwiyemezamirimo yananiwe imirimo habaho kubarana no gutandukana[…]ikintu dushobora kubafasha cyangwa tujya tubagiramo inama, ni uko dushobora kubafasha gukurikirana uriya rwiyemezamirimo mu bijyanye no kubafasha kuburana.”

Rwiyemezamirimo aritana ba mwana n’Akarere

Ibitangazwa n’Akarere ka Bugesera bihabanye n’ibyo uwo rwiyemezamirimo Nemeyabahizi Jean Baptiste a vuga, kuko yemeza ko ubwo basesaga amasezerano, akarere kari kiyemeje kwishyura abaturage ndetse ngo biri no mu masezerano kashyizeho umukono.

Yagize ati “Ubundi Akarere ka Bugesera twagiranye amasezerano ko ari bo bazahemba abo bakozi, sinzi impamvu batabahemba. Dufitanye amasezerano, aho basinye ndahafite[…]bashakatse babishyura aho kugira ngo bakomeze barindagize abaturage.”

Aba baturage bakomeje gushyira mu majwi Akarere ka Bugesera bavuga ko kabambuye, bibaza ukuntu kasheshe amazeserano na rwiyemezamirimo wa mbere imirimo igakomeza batishyuwe. Ikindi kandi ngo ntibumva ukuntu Akarere mbere kabanje kujya kabasezeranya ko kagiye gushaka ingengo y’imari bazishyurwamo none ubu ngo kakaba kabihinduye kavuga ko bagomba kurega rwiyemezamirimo.

Inyubako y’ibiro by’Akarere ka Bugesera yatangiye kubakwa mu mwaka wa 2012, igombaga kuzura mu gihe cy’umwaka umwe itwaye amafaranga y’u Rwanda miliyari imwe na miliyoni 50.

Icyo gihe yari mu mihigo y’umwaka wa 2012-2013 Akarere ka Bugesera kari kihaye mu rwego rwo gukemura ibibazo by’imitangire ya serivise iterwa n’ubuto bw’inyubako gakoreramo.

Abagize uruhare mu iyubakwa ry'ibiro by'Akarere ka Bugesera bavuga ko bamaze imyaka itatu batishyurwa
Hakizimana avuga ko rwiyemezamirimo wakoresheje aba baturage ari we uzabishyura, we akabihakana

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved