Kwamamaza

Abana bafashwa na Imbuto Foundation basabwe kutihererana ibyo bigishijwe

Yanditswe kuya 29-11-2016 saa 08:39' na Jean Pierre Tuyisenge


Minisiteri y’Uburezi irasaba abana bafashwa n’Umuryango Imbuto foundation, gukora uko bashoboye iyo mbuto nziza bahawe bakayisangiza bagenzi babo kugira ngo irusheho kwerera buri mwana wese mu gihugu.

Ibi byatangajwe n’Umunyamabanga wa leta muri iyi Ministeri ushinzwe Amashuri abanza n’ayisumbuye, Isaac Munyakazi, ubwo yari mu Rwunge rw’amashuri rwa Butare (Groupe Scolaire Officiel de Butare) mu Karere ka Huye, kuri uyu wa 28 Ugushyingo 2016, atangiza ihuriro rya munani ry’abana bafashwa n’uyu muryango rigamije kubigisha amasomo atandukanye arimo kwihangira imirimo no kubibutsa indangagaciro ziranga umwana warezwe neza.

Muri iki gikorwa cyitabiriwe n’abana 458, Munyakazi yabibukije ko imbuto bahawe bakwiye kuyisangiza abandi bityo ikarushaho gukwira hose.

Yagize ati “Ubutumwa aba bana bahabwa bugaragaza ko abayobozi bifuriza umwana w’Umunyarwanda icyiza. Aba rero baba bari hano ni byiza ko babifata kandi ntibabyihererane ahubwo bakajya no kubisangiza abandi aho baba batuye kugira ngo iyi mbuto nziza izerere buri wese.”

Munyakazi yaboneyeho gusaba aba bana kurangwa n’ikinyabupfura, avuga ko ubumenyi budaherekejwe n’uburere bwiza ntacyo bwatanga.

Ati “ Ni nabyo twabwiye n’aba ngaba ko buri gihe mu byo bagomba gukurikirana mu myigire yabo, mu gutsinda, bagomba guherekezwa n’ikinyabupfura. Ni cyo kizatuma bajya ku isoko ry’umurimo ugasanga barangwa n’ibyo igihugu kibifuzaho, cyane ko n’iyo umunyeshuri yatsinda ariko adafite ikinyabupfura usanga ibyo igihugu cyamushoyeho biba byarapfuye ubusa.”

Iyi mvugo yo gusangiza abandi imbuto aba banyeshuri bahawe, yanashimangiwe n’Umuyobozi Mukuru w’agateganyo w’Umuryango Imbuto Foundation, Sandrine Umutoni, wavuze ko abo bana bafite izina ry’Imbuto bagomba kubera abandi urugero.

Yagize ati “Mu mitekerereze yacu nka Imbuto foundation nkuko umuyobozi wacu Nyakubahwa Jeannette Kagame yabisobanuye, mu bikorwa byacu tugira ni uko utera urubuto uteganya kuzabona ikimera cyiza kizava muri rwa rubuto, gihagaze neza, gifite ibitekerezo byiza, ishobora no kwigisha n’abandi ibyiza bizavamo.”

Umunyeshuri witwa Twiringiyimana Jean Marie Vianney witabiriye ayo mahugurwa, yatangarije IGIHE ko mu myaka ine amaze afashwa na Imbuto Foundation amaze gukuramo byinshi bishobora kuzagirira umumaro umuryango Nyarwanda.

Ati “ Nk’ubu bagiye baduha ibiganiro byo gukora imishinga no kuyihagararaho kugira ngo izabashe gutanga akazi ku bantu benshi batandukanye. Iyo tuvuye muri ibi biganiro turagenda tukaganira n’abandi bana mu tunama tw’abana dukunze kuba duhari, tukagira ibyo tubasangiza kugira ngo ya myumvire bifitemo ibashe guhinduka.”

Umuyobozi Mukuru w’agateganyo wa Imbuto Foundation yatangaje ko kuva gahunda yo gufasha abana mu mashuri yisumbuye yatangira mu myaka isaga icumi ishize, bamaze gufasha abarenga ibihumbi bitandatu.

Aba banyeshuri bavuga ko iyo bavuye muri iri huriro bataha bagasangiza bagenzi babo ibyo bize bikabafasha guhindura imyumvire
Isaac Munyakazi yasabye uru rubyiruko gusangiza bagenzi babo ibyo bigishwa kugira ngo bibagirire akamaro
Lt Joseph Abakunda umwe mu ngabo zirwanira mu kirere aganiriza uru rubyiruko ku kamaro ko kurangwa n'ikinyabupfura
Umuyobozi w'agateganyo wa Imbuto Foundation avuga ko baharanira gufasha umwana gukurana ibitekerezo byiza byafasha n'abandi
Abayobozi mu nzego zinyuranye bari bitabiriye iri huriro bahaye impanuro uru rubyiruko

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved