Kwamamaza

Abanya-Oman umunani bagiye kugenda ibilometero 20 000 n’imodoka baza mu Rwanda

Yanditswe kuya 28-10-2016 saa 09:04' na Rabbi Malo Umucunguzi


Itsinda ry’abantu umunani rigiye guturuka muri Oman mu rugendo rwahawe igisobanuro cyo kugaruka ku mateka abasekuruza babo banyuzemo baza mu bihugu bya Afurika, bakazaturuka mu Murwa Mukuru w’Ubwami bwa Oman, Muscat, bakazenguruka muri Afurika y’Iburasirazuba, bakazagenda ibilometero 20 000 bifashishije imodoka eshatu.

Uru rugendo ruzanyura mu bihugu icyenda, ruzatangira kuwa 16 Ugushyingo, aho iryo tsinda rizagenda ryitegereza ibyaro bitandukanye, hakarebwa abakeneye ubufasha kurusha abandi bakabushakirwa, cyane nk’abakeneye amazi meza.

Muri uru rugendo byitezwe ko ruzamara ibyumweru bitanu, aba bantu bazahaguruka muri Oman, banyure muri Leta Zunze Ubumwe z’Abarabu, bagende ibilometero 2400 n’imodoka bagana muri Saudi Arabia, ari naho bazafatira ubwato bubageza ku cyambu cya Suakin muri Sudani.

Umuyobozi w’iri tsinda, Sulaiman Ali al Ghafri, yabwiye Ikinyamakuru Muscat Daily cyo muri Oman ko uru rugendo ruzaba ari ikintu gikomeye bakoze mu buzima.

Ati “Ruzaba rutandukanye cyane n’urwo abasekuruza bacu bakoze ariko ntabwo ruzabura imbogamizi narwo. Duteganya kurutangirira i Muscat kuwa 16 Ugushyingo, tugende kilometero zisaga 2 400 n’imodoka tugana Jeddah muri Saudi Arabia, aho tuzafatira ubwato tugana ku cyambu cya Suakin muri Sudani.’’

“Tuzahava tugana mu Majyepfo muri Ethiopia n’imodoka, nyuma twambuke umupaka tugana muri Kenya, tuzakomereza muri Uganda, tugane mu Majyepfo mu Rwanda, twerekeze mu Burasirazuba muri Tanzania.’’

Nyuma yo kugera muri Tanzania, nibwo bazifashisha ubundi buryo bw’ingendo, ndetse bafate indi nzira basubira muri Oman.

Ghafri yakomeje agira ati “Muri urwo rugendo, tuzagenda tureba ibiturage bikeneye kwitabwabo, nk’abakeneye amazi meza yo kunywa, dushake uko dushobora kububakira imigezi. Mu rugendo rwacu turifuza kubaka nk’amavomo atatu, ubu turi gushaka abashobora gushyigikira icyo gikorwa.’’

Muri uru rugendo yavuze ko bazitwaza ibitabo, amakalamu n’amakanzu maremare, ku buryo bazajya bagira ikintu basigira abaturage ahantu hose banyuze, ariko ngo nihaboneka abaterankunga bizeye ko bazagira ibintu binyuranye bazagenda basigira abantu.

Umwe mu bari muri iri tsinda, Sultan Hamood Hassan al Naamani, yatangaje yakereye urugendo bagiye kugirira muri Afurika, rufite amateka ku nkomoko y’ibisekuru byabo.

Ati “Impamvu u Rwanda rufite igisobanuro gikomeye kuri njye ni uko nahavukiye nkanahakurira, kimwe na data. Ba sogokuruza bagiye mu Rwanda ahagana mu 1920, bakora urwo rugendo nubwo bo bifashishije indi nzira n’uburyo bw’urugendo.’’

“Bifashishaga ubwato bukoze mu biti bakava Muscat bakagera Zanzibar na Dar Es Salaam, ubundi bagafata inzira ibageza mu Rwanda aho bahise batura muri Rwamagana. Abandi bagiye mu bice bya Butare, Ruhengeri, Gitarama, Kibungo Byumba, Rutare na Gatsibo.’’

Yavuze ko Uganda na Kenya nabyo ari ibihugu bifite amateka kuri we, ari naho yigiye amashuri abanza, ahandi akahiga ayisumbuye, nyuma y’iminsi yamaze mu Rwanda, ndetse indi miryango ivukiye muri Tanzania, aho bazanyura hose bakazagenda bahasiga ikimenyetso kiranga Oman.

Iri tsinda rizaca mu bihugu bitandukanye kuva muri Oman kugeza Dar Es Salaam muri Tanzania

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved