Abanyakenya 11 barigira ku Rwanda inzira yarwo mu kurerera abana mu miryango

Yanditswe na Tombola Felicie
Kuya 19 Gicurasi 2017 saa 07:56
Yasuwe :
0 0

Komisiyo y’Igihugu y’abana yagaragarije itsinda ry’Abanyakenya 11 uburyo Leta y’u Rwanda yashyizeho mu gufasha abana kudatoroka imiryango yabo ndetse inabasangiza n’impamvu zo kuvana abana mu bigo by’imfubyi bakarererwa mu muryango.

Ni mu ruzinduko rw’iminsi ibiri abakora mu kigo kirengera imibereho myiza y’abana muri Kenya barimo kugirira mu Rwanda kugira ngo bige uburyo rwabashije kugabanya abana mu bigo by’imfubyi ahubwo hakimakazwa gahunda yo kubarerera mu muryango.

Bagaragarijwe ko kuva muri 2012 kugeza muri Werurwe 2017, abana 2691 babonye imiryango ibakira binyuze gusubizwa mu miryango bakomokamo cyangwa se kubona imiryango ifite umutima wo kwakira abana batabyaye.

Nubwo bimeze bityo ariko ngo urugendo ruracyari rurerure kuko hari abandi bana basaga igihumbi batari babona imiryango ibakira .

Umuyobozi w’ikigo gishinzwe imibereho myiza y’abana muri Kenya, Irene Murethi, yatangaje ko baje kwigira ku Rwanda uburyo rukoresha ngo abana bagumane n’ababyeyi mu miryango ndetse n’abari mu bigo by’imfubyi bagashakirwa imiryango.

Ati “Turashaka kureba uburyo u Rwanda rukoresha ngo abana bagumane n’ababyeyi mu miryango nta kubatoroka, turashaka kandi kumenya uburyo u Rwanda rwabashije kuvana abana mu bigo by’imfubyi bakajya kurererwa mu miryango.”

Abajijwe niba mu gihugu cyabo ikibazo cy’abana batandukana n’imiryango yabo giteye inkeke, yavuze ko iki kibazo atari iki igihugu kimwe gusa ko ari Afurika yose.

Ku ruhande rwa Komisiyo y’Igihugu ishinzwe abana , Umunyamabaganga Nshingwabikorwa wayo , Dr Uwera Kanyamanza Claudine , yavuze ko barimo kubagaragariza uburyo Leta ishyigikiye ko abana bose barerewa mu miryango kugira ngo n’ubafasha abafashirize aho babarizwa.

Ati “Dufite aho twavuye n’aho twageze , dufite uburyo bukomatanyije bwo kwita ku mwana, bwemejwe n’inama y’Abaminisitiri muri 2012. Mu 2013 hahise hatangira gahunda ya Tubarere mu Muryango, ihabwa abakozi kugira ngo ishyirwe mu bikorwa, nibyo twagerageje kubabwira […] by’umwihariko tubereka ubwo buryo bwo kurerera umwana mu muryango uko bukora.”

Yakomeje avuga ko kugira ngo gahunda yo kurera abana mu muryango ishyirwemo imbaraga ari uko basanze nka 70% by’abana bari mu bigo by’imfubyi bafite ababyeyi cyagwa abavandimwe, bityo iyo miryango igashishikarizwa kubitaho ntibarerwe nk’imfubyi kandi bafite aho bakomoka

Ikindi abari muri urwo ruzinduko bagaragarijwe ni gahunda y’Inshuti z’umuryango aho igizwe n’abantu babiri ku rwego rw’umudugudu b’inyangamugayo bafasha kumenya amakuru y’abana baba abiga, abakoreshwa imirimo yo mu ngo n’ibindi byahungabanya uburenganzira bw’abana bakabigeza ku nzego bigacyemurwa vuba.

Ku kijyanye no kuvana abana mu bigo by’imfubyi, Dr Kanyamanza yasabye abo banyakenya ko mbere yo kuvana abana mu bigo bakarerewa mu miryango baba bagomba kureba ugiye kwakira umwana, niba koko amukunze, niba ari ukumukoresha imirimo cyangwa se niba ari inyungu ze aharanira kurenza inyungu z’umwana.

Itsinda ryaturutse muri Kenya rizahuzwa n’abakorerabushake b’inshuti z’Umuryango kugira ngo bagaragaze ko ibyo bakora n’ahandi bishobora gukunda.

Umunyamabaganga Nshingwabikorwa wa Komisiyo y'Igihugu ishinzwe abana , Dr Uwera Kanyamanza Claudine
Umuyobozi w’ikigo gishinzwe imibereho myiza y’abana muri Kenya, Irene Murethi, atanga ibitekerezo kuri gahunda yabonye mu Rwanda
Abafite abana mu nshingano zabo basobanurira bagenzi babo bo muri Kenya gahunda za leta y'u Rwanda mu kurerera mu miryango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244