Abanyamadini bagaragaje imbogamizi ku itegeko ribasaba kugaragaza inkomoko y’amafaranga bakoresha

Yanditswe na Emma-Marie Umurerwa
Kuya 31 Gicurasi 2019 saa 10:17
Yasuwe :
0 0

Itegeko rishya rigenga amadini n’amatorero mu Rwanda, ryasohotse umwaka ushize risaba kwerekana inkomoko y’umutungo wayo n’uburyo bawukoresha.

Gusobanura inkomoko y’umutungo n’imikoreshereze yawo kuri bamwe mu bayobozi b’amadini n’amatorero ngo si ibintu byoroshye dore ko benshi bakoresha inkunga z’abagiraneza abandi bagakoresha amaturo y’abakirisitu cyangwa abayoboke babo rimwe na rimwe aya mafaranga akaba atanyuzwa kuri konti

Ibi ni bimwe mu byagarutsweho mu nama yateguwe n’Urwego rw’Igihugu rw’Imiyoborere (RGB) yari yatumiwemo abahagariye imiryango ishingiye ku myemerere, abakozi bashinzwe imiyoborere myiza n’abakozi bashinzwe JADF baturutse mu turere twose, intara n’Umujyi wa Kigali, tariki ya 30 Gicurasi 2019.

Iyi nama yari igamije kuganira ku Itegeko ryo ku wa 31 Kanama 2018 rigenga imitunganyirize n’imikorere by’imiryango ishingiye ku myemerere.

Komiseri wungirije ushinzwe abasora mu kigo gishinzwe imisoro n’amahoro (RRA), Mukashyaka Drocella, aherutse kubwira IGIHE ko mu itegeko rishya harimo ingingo isaba amadini n’amatorero gutanga raporo zayo z’ibaruramari zigaragaza uko amafaranga yakoreshejwe umwaka wose.

Mukashyaka yagize ati “Icyo itegeko ribasaba ni ugutanga ibitabo byabo by’ibaruramari kugira ngo banereke Leta koko bati dore ibikorwa twateganyaga gukora, dore amafaranga yari ateganyijwe kandi dore uko twayakoresheje kandi yose twayakoresheje muri bya bikorwa yose.”

Umuyobozi wa Komisiyo y’igihugu ishinzwe ivugururwa ry’amategeko, Havugiyaremye Aimable, yasobanuye iyi ngingo y’iri tegeko irebana no kumenyekanisha inkomoko y’amafaranga bakoresha n’uburyo yakoreshejwe, avuga ko impamvu yagiyeho igamije ineza y’abanyarwanda.

Ati “Nk’imitwe y’iterabwoba ishobora koherereza amafaranga amatorero cyangwa amadini runaka, ibyo rero kugira ngo bigenzurwe bisaba ko ayo mafaranga anyuzwa ku ma banki […] abazajya bamara guhabwa ubuzimagatozi kimwe mu bintu RGB izajya ibasaba ni konti zabo.”

Umuyobozi Mukuru w’Agateganyo w’Urwego rw’Igihugu rw’imiyoborere, Dr Usta Kaitesi yavuze ko iyi ngingo yagiyeho kugira ngo hirindwe ko abanyamadini bajya bahabwa amafaranga agamije gukora ibikorwa bidafite aho bihuriye n’ivugabutumwa.

Ati “Iyo bibaye ngombwa rero RGB ishobora kugenda igasuzuma imikoreshereze y’amafaranga yabo hatirengagijwe n’ibiteganywa n’itegeko ry’imisoro kuko nabo nk’izindi nzego iyo bagize ibirenga ku byo bagomba kuba bakoresheje mu bikorwa byabo barabisorera.”

“Impamvu y’iri suzuma ni uko hari abantu bashobora kubona amafaranga mu buryo butemewe, hari n’abagirana amakimbirane ashingiye ku mitungo yabo.”

Padiri Emmanuel Nsengiyumva wo muri Kiliziya Gatolika Paruwase ya Nyamata, akaba n’Umuyobozi w’impuzamatorero mu Karere ka Bugesera, kimwe na bamwe mu bari bitabiriye iyi nama bagaragaje imbogamizi.

Ati “Ikibazo cyavutse jni uko kubera ko hari amafaranga aza aturutse hirya no hino agenewe ibikorwa byambukiranya umwaka umwe cyangwa ibiri, usanga bigorana kumenyekanisha ibikorwa mu mwaka umwe w’imisoro.”

“Ese ko nari mfite miliyoni eshanu zo gufasha abantu wenda mu myaka itanu none bakaba baje mu mwaka umwe bagasanga mfashishije miliyoni imwe za miliyoni enye zisigaye ko bagiye kuzica imisoro nkaho ari inyungu nungutse muri uwo mwaka? Aho niho hari ikibazo.”

Indi ngingo abanyamadini bagaragaje nk’imbogamizi ni ijyanye no kuba umuyobozi w’idini agomba kuba afite impamyabumenyi ya kaminuza mu ishami iryo ariryo ryose akagira n’impamyabumenyi mu masomo ajyanye na tewolojiya.

Bamwe bagaragaza ko mu matorero n’amadini yabo bafite amashuri yigisha tewolojiya bakabaza niba impamyabumenyi zitangwa nayo mashuri zemewe.

Dr Usta Kaitesi yababwiye ko Impamyabumenyi y’imyigire y’iyobokamana ari diplôme ya kaminuza nk’izindi kugira ngo yemerwe ari uko uba warayize muri kaminuza yemewe mu Rwanda cyangwa ahandi hemewe n’amategeko.

Padiri Emmanuel Nsengiyumva wo muri Kiliziya Gatolika Paruwase ya Nyamata
Umuyobozi wa Komisiyo y’igihugu ishinzwe ivugururwa ry’amategeko, Havugiyaremye Aimable
Umuyobozi Mukuru w’Agateganyo w’Urwego rw’Igihugu rw’imiyoborere, Dr Usta Kaitesi yavuze ko iyi ngingo yagiyeho kugira ngo hirindwe ko abanyamadini bajya bahabwa amafaranga agamije gukora ibikorwa bidafite aho bihuriye n’ivugabutumwa
Itegeko risaba abayobozi b'amadini n'amatorero kumenyekanisha inkomoko y'umutungo wabo
Abanyamadini bagaragaje imbogamizi mu ngingo zimwe na zimwe rigenga imitunganyirize n’imikorere by’imiryango ishingiye ku myemerere

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza