Abanyamuryango ba Rotaract Club ya SFB basibuye inzira z’abanyamaguru i Nyamirambo

Yanditswe na Evariste Nsengimana
Kuya 1 Ukwakira 2017 saa 05:37
Yasuwe :
0 0

Mu rwego rwo gukomeza guhangana n’ibibazo isi ifite no gutanga ubufasha mu bikorwa bitandukanye, abanyamuryango ba Rotaract Club ya SFB bakoze umuganda wo gusibura inzira y’abanyamaguru bongera gusiga amarangi mu bice by’umuhanda w’i Nyamirambo, ahazwi nko kuri 40 hafi na Sitasiyo ya Polisi.

Iki gikorwa cyahuriranye n’umuganda ngarukakwezi wabaye kuri uyu wa Gatandatu, tariki ya 30 Nzeri 2017, cyitabiriwe n’abagera kuri 45 barimo abaturutse muri Rotaract Club ya SFB, bafatanyije n’abo mu mujyi wa Kigali, Koleji y’Uburezi ya Kigali (yahoze yitwa KIE), Butare n’aba Interact yo mu ishuri ryisumbuye rya Kagarama.

Iki gikorwa kiri muri gahunda zihoraho Rotary Club y’u Rwanda ikora ziba zifitiye abaturage akamaro, zinagamije kuzamura imibereho yabo.

Umuyobozi Wungirije Guverineri w’Akarere mu Rwanda, ADG Masterjerb Paul Birungi wari unahagarariye Rotary Club ya Kigali Virunga muri iki gikorwa yatangaje ko uyu ari umwe mu mushinga ngarukamwaka aho Rotary na Rotaract clubs zo mu Rwanda zihuzwa n’intego imwe yo gufasha sosiyete.

Yagize ati “Dukora ikintu gifite ingaruka nziza ku muryango. Hari ibikorwa byinshi tumaze gukora. Igikorwa cyo gusibura umuhanda twagikoze mu rwego rwo kongera umutekano wo mu muhanda no gufasha abanyeshuri (bo mu Ishuri ribanza ryo ku Intwari i Nyamirambo) n’abana bawambuka kwirinda impanuka kuko izi nzira zari zaramaze gusibangana.”

Rotary Club ya Kigali Virunga ni yo yatangije ibikorwa byo gukora inzira z’abanyamaguru (zebra crossing) mu Mujyi wa Kigali ahagana mu 2001; umushinga waje kwigishwa abakiri bato bibumbiye muri Rotaracts (ababarizwa muri za Kaminuza) na Interacts (abo mu mashuri yisumbuye).

Rotary Club Rwanda ishamikiye kuri Rotary International, Umuryango washinzwe mu 1905, ukaba ufite abanyamuryango barenga miliyoni 1,2 babarirwa mu ma Rotary Clubs 35, 000 mu bihugu n’uduce birenga 220 aho ifasha abatishoboye n’abafite ibibazo bikomeye.

Ishami ryayo mu Rwanda ribarizwa muri Rotary Club District 9150 igizwe n’ibihugu 10 birimo u Burundi, Cameroun, Congo, Gabon, Guinée Equatoriale, Repubulika Iharanira Demokarasi ya Congo, Repubulika ya Centrafrique, Tchad na Sao Tomé-et-Principe.

Muri uyu mwaka, Rotary International ifite intego yo kugaragaza itandukaniro mu guhindura isi nziza aho buri munyamuryango yasabwe gutera igiti.

Rotary Clubs zo mu Rwanda na zo ziteganya gukora umushinga mugari wo gutera ibiti, aho byibuze buri munyamuryango mu basaga 200 babarizwa muri Rotary Clubs, aba-Rotaracts 250 n’aba-Interacts basaga 300 mu gihugu hose, azatera bitatu mu gikorwa giteganyijwe bitarenze mu Ukwakira 2017.

Abanyamuryango bari bafite morali mu gikorwa cyo gusibura inzira y'abanyamaguru mu muhanda
Basibuye inzira z'abanyamaguru zari zarasibanganye
Iki gikorwa kigamije gufasha abakoresha umuhanda kwirinda impanuka za hato na hato
Basukura umuhanda mbere yo gusiga amarangi
Abanyamuryango ba Rotaract Club ya SFB basibuye inzira z’abanyamaguru i Nyamirambo
Umuyobozi wungirije Guverineri w’Akarere mu Rwanda, ADG Masterjerb Paul Birungi, ubarizwa muri Rotary Club ya Virunga/ Foto: IGIHE

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza