Abanyarwanda bagiye kongera koroherezwa kubona Visa yo kujya muri Afurika y’Epfo

Yanditswe na Jean Pierre Tuyisenge
Kuya 18 Gicurasi 2017 saa 02:00
Yasuwe :
0 0

Minisiteri y’Ububanyi n’Amahanga w’u Rwanda, Louise Mushikiwabo, yatangaje ko u Rwanda rufite icyizere ko Afurika y’Epfo igiye gukuraho imbogamizi zariho ku Banyarwanda basaba Visa bashaka kwinjira muri icyo gihugu.

Kuri uyu wa 18 Gicurasi 2017, ubwo Minisiteri y’Ububanyi n’Amahanga yagezaga kuri Komisiyo y’Ingengo y’Imari n’Umutungo by’Igihugu mu Nteko Ishinga Amategeko, imbanzirizamushinga y’ingengo y’imari ikeneye mu mwaka wa 2017/2018, Minisitiri yanavuze ku mubano w’u Rwanda n’Afurika y’Epfo.

Yagize ati “ Navuga ko tubanye neza ariko bimwe mu bikorwa twifuza cyane cyane ikintu cyo korohereza Abanyarwanda kubona Visa ntikitaratungana, uretse ko Afurika y’Epfo yatumenyesheje ko irimo gushaka uburyo bwo kugikemura tukaba twaranabonye mu itangazamakuru muri iki cyumweru ko Afurika y’Epfo ishaka korohereza Abanyafurika bose kuza mu gihugu; kuko uretse natwe twagiranye ibibazo bitewe no kuba yaracumbikiye abanzi b’igihugu bigatera agatotsi mu mibanire yacu, n’ibindi bihugu kwijira mu gihugu cyabo biragoye cyane kuko usanga ibihugu byinshi bisaba ko yafungura amarembo cyane ko ari igihugu gishaka kugaragara nk’igifite uruhare mu iterambere rya Afurika."

Yakomeje agira ati "Twishimiye kumva ko igihugu cya Afurika y’Epfo gifite ubushake bwo korohereza abacyinjiramo, ariko ku bindi dufite abashoramari benshi mu Rwanda baturuka muri icyo gihugu, indege yacu ijya muri Afurika y’Epfo buri munsi, imikoranire mu rwego rwa RwandAir ni myiza, ndetse n’abashoramari bo muri icyo gihugu bari mu Rwanda barabyishimiye, usanga bari mu bucukuzi n’ibikorwa remezo. Gusa ibindi bikorwa hagati y’ibihugu byacu byombi biragenda neza."

Minisitiri Mushikiwabo yavuze ko abayobozi bakuru b’ibihugu byombi bemeranyijwe gukuraho ikibatandukanya icyo ari cyo cyose. Ati "Hari ikimaze guhinduka ariko ku cya visa turacyabikoraho, kugira ngo turebe niba twe twemerera Abanyafurika y’Epfo bakaza mu Rwanda n’abaturage bacu bunguke kimwe na bo. Twabwiwe na Ambasade ya Afurika y’Epfo mu Rwanda ko igihugu kiri kureba uko yatangira korohereza Abanyarwanda. Twizeye ko bizashoboka gusa ntitwavuga ngo bizaba ryari kuko ntitwashyira igitutu ku gihugu, icyo dukora ni ukubasobanurira uko bihagaze, njye rero simbona impamvu bitakunda."

Mu mpera za Mata 2017, Ambasaderi wa Afurika y’Epfo mu Rwanda, George Nkosinati Twala, nawe yari yahamije ko hari intambwe ikomeye imaze guterwa mu biganiro hagati y’ibihugu byombi, ku buryo hari icyizere ko mu gihe cya vuba umubano wabyo wasubira ku murongo neza.

Minisiteri y’Ububanyi n’Amahanga w’u Rwanda, Louise Mushikiwabo, yatangaje ko u Rwanda rufite icyizere ko Afurika y’Epfo igiye gukuraho imbogamizi zariho ku Banyarwanda basaba Visa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza