Abanyarwanda barenga ibihumbi 300 barwaye diyabete, hakivuza ibihumbi 70

Yanditswe na Evariste Nsengimana
Kuya 14 Ugushyingo 2017 saa 06:43
Yasuwe :
0 0

Minisititeri y’Ubuzima yatangaje ko ikibazo gikomeye cy’Abanyarwanda benshi babarirwa mu bihumbi magana barwaye diyabete ariko bakaba bativuza.

Ibarura riheruka gukorwa na Minisiteri y’ubuzima mu 2013 ryagaragaje ko 3% by’abanyarwanda barwaye diyabete; Ni ukuvuga abari hagati y’ibihumbi 300 na 400, gusa imibare yagiye ikusanywa ku bigo nderabuzima birenga 500 mu gihugu, igaragaza ko hivuza abatarenga ibihumbi 70.

Kuri uyu wa Kabiri, ubwo u Rwanda rwizihirizaga umunsi mpuzamahanga wahariwe kurwanya diyabete wabereye mu Karere ka Gakenke, Umuyobozi w’ishyirahamwe ry’abarwaye iyi ndwara mu gihugu, Gishoma Crispin, yavuze ko abivuza ari mbarwa.

Diyabete ni imwe mu ndwara zidakira, iterwa ahanini n’igabanuka ry’umusemburo wa Insiline mu maraso ushinzwe kugena ingano y’isukari mu mubiri, aho uyirwaye agaragazwa ahanini no gucika intege, kugira inyota, umwuma, kwihagarika bidasanzwe kandi inkari nyinshi n’ibindi.

Ubushakashatsi bwa OMS mu 015 bwagaragaje ko ku Isi abantu barenga miliyoni 405 barwaye diyabete, biyongereyeho miliyoni zisaga 20 ugereranije n’uwawubanjirije; abagera kuri miliyoni 300 bafite ibyago byo kuzayirwara; mu bantu babiri bayirwaye, umwe niwe ubizi; mu bayirwaye bose, abagore ni miliyoni 200 naho ababarirwa muri miliyoni eshanu bishwe nayo.

Asobanura impamvu y’ubu bwiyongere, Gishoma yagize, ati “Ubwiyongere buterwa n’uburyo abantu babaho. Kera abantu bagendaga ibirometero byinshi bajya ku kazi; ikindi kandi harimo uburyo barya, uburyo batekaga ibiryo byarahindutse. Buri ruhande mu mijyi haba hari aho bacururiza ibiryo bya FastFood. Aka karere nako kari mu kugaragajwe n’ubushakashatsi ko hari abanywa inzoga benshi ariko hari n’indi mpamvu itaremezwa neza ko diyabete ishobora guterwa n’imirire mibi.”

Zimwe mu ngaruka zo kurwara diyabete harimo gucika bimwe mu bice by’umubiri, uburemba, kurwara umutima, ubuhumyi, kuva amaraso ntakame mu gihe uyirwaye yakomeretse n’ibindi bishobora gutuma umuntu abaho nabi.

Abahanga mu by’ubuzima bagira inama abantu kwisuzumisha hakiri kare, gukora siporo ngororamubiri, kunywa inzoga n’itabi bike n’ibindi mu rwego rwo kuzirinda.

Umuyobozi muri Minisiteri y’ubuzima ushinzwe ubuvuzi, Dr. Jean-Baptiste Mazarati, yavuze ko diyabete imaze kwica Abanyarwanda barenga 500 kuva mu 2013.

Yagize ati “Indwara ya Diabete ihangayitse Isi nk’uko ihangayitse u Rwanda [...] Ariko iyo turebye nk’abapfuye mu Rwanda bishwe na diyabete baragera kuri 545. Twareba nko mu bitaro bibiri bigize Gakenke, abari bayirwaye umwaka ushize bagera ku 180. Niyo mpamvu tubashishikariza ngo mubimenye, mwisuzumishe hakiri kare kugira ngo mumenye ko nubwo yica bucece ari indwara yazadukoraho.”

Abanyarwanda bivuza ari uko barwaye

Abaturage baganiriye na IGIHE bavuze ko bajya kwisuzumisha ari uko barwaye.

Uwitwa Karimutumye Philippe wari waje kwisuzumisha yagize ati “Naje numva mbabara ikintu kimbaga mu rubavu, kikageza na hano mu ijosi. Ntabwo napfa kuza kwivuza ntababara.”

Mukeshimana Jean d’Arc, Umuyobozi w’Ikigo nderabuzima cya Cyabingo cyizihirijweho uyu munsi mpuzamahanga, yagaragaje ko mu 2015 cyapimye abantu 153; uyu mwaka hamaze gupimirwa 536. Muri abo barindwi basanze barwaye diyabete; 29 bafite ikibazo cy’umuvuduko w’amaraso naho abasanganywe indwara y’ubuhumekero ni batanu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza