Abanyarwanda baturiye Uganda basanga yarahombeye mu bushotoranyi yatangije ku Rwanda

Yanditswe na HABIMANA James
Kuya 1 Kamena 2019 saa 09:55
Yasuwe :
0 0

Kuva muri Werurwe uyu mwaka Guverinoma y’u Rwanda yasabye abaturage bayo guhagarika kujya muri Uganda, kubera impungenge z’umutekano wabo, ni nyuma y’ubuhamya bw’abarenga 800 bari bamaze iminsi birukanwa ku butaka bw’icyo gihugu ndetse bakagaragaza ihohoterwa n’iyicarubozo bakorewe.

Icyo gihe Minisitiri w’Ububanyi n’Amahanga w’u Rwanda, Dr Richard Sezibera, yabwiye IGIHE ko bafashe umwanzuro wo gusaba abanyarwanda kutajya muri Uganda kubera umutekano wabo. Ni ku nshuro ya mbere mu buryo bweruye ubuyobozi bw’u Rwanda bwari buburiye abaturage bubasaba guhagarika ingendo bagirira muri Uganda.

Ibi byose byaje nyuma y’imyaka ibiri umubano w’ibihugu byombi utifashe neza, aho u Rwanda rutishimiye uburyo abanyarwanda muri Uganda bafungwa, bagatotezwa nta mpamvu igaragara, bamwe bakabwirwa ko bazira kuba intasi mu gihe ari abaturage bagiye gushaka ubuzima.

Ni ibirego byiyongereye ku makuru u Rwanda rwagaragaje ko hari ibikorwa byinshi birimo kubera muri Uganda bigamije guhungabanya umutekano warwo binyuze mu mitwe ya RNC iyoborwa na Kayumba Nyamwasa ndetse na FDLR, amakuru Uganda yo yahakanye.

Nk’ibihugu bituranye kandi bihuriye mu muryango wa Afurika y’u Burasirazuba, birumvikana ko ubuhahirane hagati y’abaturage cyane cyane abaturiye imipaka bwakorwaga mbere kandi neza, ariko nyuma y’iki kibazo nta wabura kuvuga ko bwahagaze burundu.

Ubucuruzi bwari buhagaze gute mbere?

Tariki 15 Werurwe Minisitiri w’Imari n’Igenamigambi, Dr Uzziel Ndagijimana, yavuze ko mu gihe umubano hagati y’u Rwanda na Uganda utifashe neza, abaturage badakwiye guhangayika kuko hagize igihugu kibangamirwa mu bukungu, Uganda yo yohereza mu Rwanda ibicuruzwa byinshi ari yo yahura n’igihombo kinini.

Dr Ndagijimana yavuze ko mu bucuruzi hagati y’ibihugu byombi, u Rwanda rwiteguye ko ibicuruzwa byavagayo bishobora gushakirwa ahandi.

Yagize ati “Nta gishya gihari ku bijyanye n’ubucuruzi hagati y’u Rwanda n’u Burundi, hagati y’u Rwanda na Uganda ho ni bishya, ariko umwaka ushize, ibyo twavanaga muri Uganda bikubye inshuro nyinshi ibyo twoherezayo. Ibyo twakuragayo byari bifite agaciro ka miliyoni $242 twe twoherezayo gusa miliyoni $27.”

“Urumva rero haramutse hagize igituma ubwo bucuruzi bugabanyuka, igihombo cyinshi kiba kuri wa wundi wacuruzaga hanze, kiva ku utakaje isoko. Igihombo cyaba kuri Uganda kurusha u Rwanda. Kubera ko kuri twe, Uganda ni isoko rito twoherezagaho ibintu bike, bo batugurishaho byinshi inshuro nyinshi.”

Ikinyamakuru IGIHE cyegereye abaturage mu Karere ka Gicumbi, aka ni akarere gahana imbibi na Uganda ndetse kakaba kanabarizwamo umupaka wa Gatuna uhuza ibihugu byombi.

Iyo muganiriye n’aba baturage bakubwira ko ibyo bajyaga kuvana muri Uganda byarimo Kawunga n’umuceri ariko ko ubu bahisemo kubivana mu Rwanda, bityo bakaba basanga iki gihugu cyarahombye ikintu kinini harimo amafaranga abanyarwanda babashyiraga.

Umutoniwase Germaine utuye mu Murenge wa Byumba, Akarere ka Gicumbi, yagize ati “Nyuma yo kuva muri Uganda ubu kawunga tuyivana hano mu Rwanda, nta kintu tubuze turimo gukora umuhanda tukabona amafaranga. Ubundi kera iyo twajyaga Uganda hari ubwo twasangaga habayeyo akavuyo kandi muzi ko ho kadashira, ku buryo bashoboraga no kuba bagufata ku ngufu ntihagire ugutabara.”

Yakomeje agira ati “Hari abanyarwanda bamwe wasangaga barigize abanebwe, abo nibo akenshi birirwaga bajya Uganda kunywa kanyanga, uyu munsi nibo usanga bakubwira ngo barahombye kuba batakijya muri iki gihugu, ariko icyo nakubwira ni uko nabo basigaye bakora kandi ubona ko bashishikaye bivanyemo ubwo bunebwe.”

Mukama Aphrodis utuye mu Murenge wa Kaniga uhana imbibi na Uganda, we yabwiye IGIHE ati “Mbere twajyaga guhaha Kawunga muri Uganda ariko ubu barakazanye karatwegereye. Njye sinemera ko Abanya-Uganda bari batunze u Rwanda kuko n’ubundi wasangaga abanyarwanda aribo bajyayo bagacuruzayo none abenshi baraje ubu bakorera mu Rwanda, twajyagayo n’ubundi aribo tugiye guhahira.”

Ati “Ibintu byinshi twakuraga Uganda ubu turimo kubikura mu Rwanda, njya nibuka ko hari ubwo umunyarwanda yajyaga Uganda ku munsi w’isoko yasanga ritameze neza polisi igatangira guhutaza abanyarwanda, cyangwa wagira ibyago bakugonga ugasanga Polisi iravuze ngo iki ni ikinyarwanda nimukice.”

Naho Ndatimana Asuman utuye Umurenge wa Kaniga mu karere ka Gicumbi, we yavuze ko “Icyo Abanyarwanda twakuraga Uganda ni kawunga n’umuceri ariko aho leta idukanguriye kwigira, amafaranga twashoraga muri Uganda ubu turayakoresha iwacu, ubu twabonye hano isoko ku buryo ibyo twakuragayo byose tubigura hano.”

Uganda yahuye n’ibihombo igerageza kwiyumanganya

Nubwo Uganda iterura ngo ivuge ibihombo irimo kuvana ku bibazo ubwayo irimo guteza ku Rwanda, bamwe mu bayobozi muri iki gihugu bo bagaragaje ko bahombye isoko rikomeye.

Tariki 20 Werurwe uyu mwaka, mu kinyamakuru The Observer cyo muri Uganda, depite Wilfred Niwagaba uhagarariye agace ka Ndorwa yagize ati “Ni twe Abanya-Uganda twajyanaga ibirirwa mu Rwanda kandi tugacuruzanya. Twabonaga bimwe mu biribwa birimo ibishyimbo n’ibindi bivuye mu Rwanda. Buri mwaka agace ka Kabale konyine kabonaga amashilingi angana na miliyari 4 tuyavanye mu Rwanda murumva ko ari igihombo gikomeye.”

Dr Isaac Shinyekwa, umushakashatsi akaba n’umwarimu mu by’ubukungu muri Kaminuza ya Makerere, we yavuze ko u Rwanda ari kimwe mu bihugu aho Uganda yajyanaga ibicuruzwa byayo, bityo ko isoko ryayo rishobora guhomba.

Si ukuba gusa Uganda yarahombye isoko ry’u Rwanda, kuko iki gihugu cyakoreshaga inzira zo mu Rwanda kugira ngo kigere ku isoko ryo mu Burundi cyane ko gucisha ibicuruzwa muri Repubulika Iharanira Demokarasi ya Congo, atari inzira yo kwizera kubera imitwe yitwaje intwaro irangwa muri iki gihugu harimo n’uwa ADF urwanya Museveni.

Museveni yakanguriye abacuruzi kwishora muri magendu

Tariki 17 Gicurasi uyu mwaka, Perezida wa Uganda, Yoweri Kaguta Museveni, yareruye ahamagarira abacuruzi n’abaturage gukora magendu, mu gihe igihugu cye gikomeje gutsimbarara ku kinyoma cy’uko u Rwanda rwafunze umupaka.

Ni mu ijambo yagejeje ku itsinda ry’abasirikare b’abanyamahanga, ubwo yahamagariraga abacuruzi b’abanya-Uganda n’abandi bacuruzi kuyoboka inzira y’ibyaha.

Yagize ati “Nubwo umupaka wafunzwe, ubucuruzi buzakomeza, buzananyura mu nzira ya magendu. Ntushobora guhagarika ubucuruzi unyuze ku buyobozi bw’umupaka, abantu bahitamo magendu”.

Isesengura ry’ijambo rya Museveni ryuzuyemo ibyo bamwe bise ‘ibinyoma byo kwiheba’, birimo no guhamagarira abanya-Uganda kujya mu byaha.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza