Abanyarwanda bose bafite ibikomere nubwo bitanganya uburemere-Ndayisaba Fidèle

Yanditswe na UMURERWA Emma Marie
Kuya 11 Mutarama 2017 saa 07:14
Yasuwe : XX
0

Umunyamabanga Nshingwabikorwa wa Komisiyo y’Ubumwe n’Ubwiyunge, Fidèle Ndayisaba asanga abanyarwanda bose bafite ibikomere batewe n’amateka banyuzemo n’ingaruka yagiye abagiraho.

Abiciwe ababo muri jenoside yakorewe abatutsi,abamaze imyaka ishyanga baravukijwe uburenganzira bwo kuba mu gihugu cyabo hamwe n’abagize uruhare muri Jenoside bose ngo bafite ibikomere batewe n’amateka.

Yabigarutseho kuri uyu wa 11 Mutarama 2017, ubwo hatangizwaga umushinga w’isanamitima uhuriweho n’imiryango isanzwe ikora ibikorwa by’isanamitima ubumwe n’ubwiyunge hamwe no kubaka amahoro arambye irimo KARUNA,IRDP, AEGIS TRUST na HROC(Healing and Rebuilding Our People), mu turere umunani, ukazamara imyaka ibiri.

Fidèle Ndayisaba yashimangiye ko buri munyarwanda adahuje n’undi igikomere, kabone n’abarotse jenoside ngo buri wese afite icye.

Yagize ati “Abanyarwanda b’ingeri zitandukanye bitewe n’ibihe by’amateka twanyuzemo n’ingaruka byatugizeho bafite ibikomere[...]mu Kinyarwanda igikomere kiromorwa ntabwo gisanwa.Turi mu rugendo rwo komora ibikomere by’abanyarwanda.”

Yakomeje avuga ko abanyarwanda bafite ibikomere batewe n’igihe kirekire cya politike y’ivangura.

Ati “Umunyarwanda wimwe uburenganzira bw’ibanze bwo kuba mu gihugu cye, agahinduka impunzi imyaka n’imyaka agacibwa ishyanga yanagerageza gutaha bakamwita umwanzi w’igihugu, uwo afite ibikomere yatewe n’amateka. Iyo tuvuga ibikomere ntabwo tuvuga kuri jenoside gusa. Jenoside ni kimwe mu byateye ibikomere kandi by’igihe kirekire.”

Ndayisaba yashimangiye ko Leta y’u Rwanda yahisemo kunyura mu rugendo rw’ubumwe n’ubwiyunge nyuma ya jenoside yakorewe Abatutsi nk’imwe mu nzira ya nyayo yo guhuza abanyarwanda.

Dr Eric Ndushabandi, Umuyobozi wa IRDP, yavuze ko iyi miryango igihe gufatanya mu komora ibikomere by’amateka mabi abanyarwanda bafite.

Yagize ati “Iyi miryango yiyemeje gukorera hamwe kugira ngo umusanzu wa buri wese mu bumwe n’ubwiyunge ugerwaho. Ibi bizegerwaho binyuze mu biganiro by’isanamitima, amahugurwa hari n’ubundi buryo bw’ikoranabuhanga buzakoreshwa.”

Mu bindi uyu mushinga uzibandaho harimo kuvura ihungabana abarokotse Jenoside n’abagize uruhare muri jenoside, kongera uruhare rw’urubyiruko mu guharanira imibanire myiza hagati y’abanyarwanda, gufasha abaturage bo mu nzego z’ibanze guha amakuru inzego z’ubuyobozi ku nzitizi izo ari zo zose zabangamira imibanire myiza.

Mu gihe cy’imyaka ibiri uyu mushinga uzamara ukorera mu Turere twa Karongi, Nyamasheke, Rubavu, Gisagara, Gakenke, Gicumbi, Kirehe na Bugesera, ukazanafasha abaturage kwihanganira kubana n’ububabare batewe na jenoside n’amateka yayibanjirije bagashobora guhangana n’ingaruka zayo bashyira imbaraga mu mibanire myiza, birinda amakimbirane ayo ari yo yose.

Eric Ndushabandi, Umuyobozi wa IRDP
Abayobozi n'abafatanyabikorwa mu miryango ikora ibijyanye no kubaka amahoro

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza