Abanyeshuri 29 bize umuziki ku Nyundo bagiye ku isoko ry’umurimo

Yanditswe na Tombola Felicie
Kuya 18 Werurwe 2017 saa 08:51
Yasuwe :
0 0

Abanyeshuri 29 barangije amasomo y’umuziki mu ishuri ryo ku Nyundo, bize mu buryo bwa kinyamwuga ibijyanye na wo byose byatuma bawukora ku rwego mpuzamahanga.

Nubwo kuri bamwe bisa nk’inzozi ndetse bikaba bitumvikana uko babashije kwinjira mu ishuri ry’umuziki nyuma y’urucantege rwinshi rw’imiryango n’inshuti ariko byabaye basazwe n’ibyishimo kuko bamwe batangiye gusoroma imbuto zo kuba ari wo bahisemo.

Kuri uyu wa 17 Werurwe 2017, mu ishuri ryisumbuye ry’Ubugeni n’Umuziki rya Nyundo (Nyundo Schoool of Arts and Music) byari ibirori, ababyeyi n’abana bahawe impamyabushobozi nyuma yo gusoza amasomo yabo.

Abahawe impamyabushobozi ni abanyeshuri 29 barimo abakobwa batanu n’abahungu 24 basoje imyaka itatu y’amasomo aho bize gukoresha ibyuma bikoreshwa mu gucuranga, uko umuntu aririmba , uko yakwandika indirimbo, uko umuziki ukorwa hagamijwe ubucuruzi, kwihangira imirimo n’ibindi.

Abanyeshuri basoje amasomo batangaje ko nubwo kuza kwiga byari bigoye ariko batangiye kubibonamo inyungu nyinshi.

Nikeza Alice, umukobwa w’imyaka 25 ukomoka mu karere ka Rusizi yatangarije IGIHE ko kuba arangije amasomo y’umuziki ari igitangaza kuri we kuko uretse abamuciye intege ngo na we ubwe ntiyiyumvishaga uburyo bishoboka.

Ati “Muri 2014 nibwo narushanijwe mu kureba abanyempano mu muziki bagomba kuza kwiga hano mu ishuri ry’umuziki rya Nyundo, abantu banciye intege kuko bumva ko umukobwa wabigiyemo aba agiye kuba indaya cyangwa ikirara. Njyewe numvaga mbikunda ,nkomeza kubisaba ababyeyi banjye maze data arambwira ngo ‘genda utazagira ngo hari amahirwe nakwimye mu buzima.”

Akomeza avuga ko uretse ko yakundaga kuririmba ndetse akanihimbira indirimbo, ngo ntiyiyumvishaga uko ishuri agiyemo rizaba rimeze.

Ati “Kuko nta muntu nari narigeze numva avuga ko yabyize akaba ari ubwa mbere byari bigiye gutangira mu gihugu napfuye kuza, siniyumvishaga uko bizaba bimeze n’ibyo tuziga.Twarize ugasanga ufite n’izindi mpano utari uzi kandi natangiye kubibyaza amafaranga.Twakoze itsinda njyewe n’abandi bagenzi banjye batatu, ubu turatumirwa kandi umugoroba umwe dushobora gukorera ibihumbi 100 na ho mu bukwe bakaduha nk’ibihumbi 400.”

Umuyobozi w’Inteko Nyarwanda y’Ururimi n’Umuco, Dr Vuningoma James, yatangaje ko aba abanyeshuri baje neza kuko Leta yagiye ishyira mu bikorwa gahunda zo guteza imbere umuziki.

Ati “Mbere umuntu yirwanagaho ariko ubu hari ihuriro ry’abahanzi …Ayo rero ni amahirwe mufite kuko nk’ibirori bya Fesipad biba mu gutegura umuganura muzajya mubigiramo uruhare n’andi mahirwe yo guhagararira u Rwanda hanze y’igihugu.”

Avuga ko kuba Leta y’u Rwanda ishyigikiye ubukungu bushingiye ku bumenyi, abahanzi bakwiye gukora umuziki nk’ubucuruzi bubinjiriza bikabatunga.

Dr Vuningoma yakebuye abahanzi kugira ngo aho bari hose bage bibuka ko ari abanyarwanda kandi ako aho bari hose bagomba kurangwa n’indangagaciro z’abanyarwanda.

Muligande Jacques watangije ishuri ry’Umuziki rya Nyundo afashijwe na WDA yavuze ko iyo yumvise umunyarwanda wahimbye indirimbo ye, akayiririmba neza igacurangwa neza yishima cyane kandi bikamwongera imbaraga, nubwo mu gutangira byari bigoye.”

Yavuze ko bibaye byiza iri shuri ryagira n’andi mashami no mu tundi turere kuko abanyempano bahari kandi bashoboye.

Ishuri ry’umuziki rya Nyundo ririmo abanyeshuri 360 bamwe biga ibyo gushushanya, abandi iby’ubugeni ndetse n’abiga umuziki.

Abiga umuziki batangiye muri 2014, bamaze imyaka itatu biga; umwe ni we utarabashije kurangiza kuko batangiye ari 30.

Buri mwaka hatoranywa abanyeshuri 30 bo kujya kwigayo bikaba bizatuma u Rwanda rukomeza kugira abanyamwuga benshi mu muziki, ugatera imbere.

Bamwe mu basoje amasomo bareba uko abakiri ku ntebe y'ishuri babishimiye ku munsi wabo
Byari ibyishimo ku basoje amasomo bamwe babifata nk'inzozi
Bamwe mu barangije amasomo y'umuziki bavuze ko batangiye kubibyaza umusaruro
Muligande Jacques watangije ishuri ry'umuziki rya Nyundo ku bufatanye na WDA
Nikeza Alice yishimira ko ashoje amasomo ye mu muziki
Bamwe mu bigisha umuziki ku Nyundo bavuga uko byari bimeze
Gasana Jerome, Umuyobozi wa WDA na Dr Vuningoma James uyobora RALC
Gasana Jerome, Umuyobozi w'Ikigo gishinzwe guteza imbere imyuga n'ubumenyingiro, WDA
Umuyobozi w'Inteko Nyarwanda y'Ururimi n'Umuco, Dr Vuningoma James
Ishimwe Clement utunganya umuziki na we yari yitabiriye ibi birori
Umuririmbyi Senderi na we ntiyahatanzwe

tombola@igihe.com
Amafoto:Tombola Felicie


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza