Kwamamaza

Abanyeshuri 45 ntibazakora ibizamini bya Leta bisoza umwaka wa 2016

Yanditswe kuya 26-10-2016 saa 19:11' na Cyprien Niyomwungeri


Minisiteri y’Uburezi yatangaje ko uyu mwaka umubare w’abanyeshuri biyandikishije gukora ibizamini bya Leta wazamutse ugereranyije no mu myaka ibiri ishize cyane mu mashuri abanza n’ay’icyiciro rusange, ariko hari abagera kuri 45 batazitabira ibyo bizamini kubera impamvu zitandukanye.

Mu kiganiro n’abanyamakuru cyo ku mugoroba wo kuri uyu wa 26 Ukwakira 2016, Minisiteri y’Uburezi yatangaje ko mu mashuri abanza umwaka ushize wa 2015 abanyeshuri bakoze ibizamini bya Leta bari 168 290 uyu mwaka bakaba ari 194 679. Biyongereyeho 26 389 bingana na 16%, abakobwa biyongereye kuri 13%, abahungu biyongera ku kigero cya 19%.

Umwaka ushize mu cyiciro rusange(Tronc-Commun) abakoze ibizamini bya Leta ni 83 676, bariyongereye uyu mwaka bagera ku 91 492. Biyongereyeho 5116 bangana na 6%, barimo abakobwa bangana na 10% naho abahungu ni 1%.

Ku rundi ruhande ariko mu cyiriro cya Kabiri (A’Level), umubare w’abazakora ibizamini bya Leta waragabanutse kuko umwaka washize bari 42 687, uyu mwaka ni 41 719 bagabanutseho 968 bangana na 2.3%, abahungu bagabanutseho 2.8% abakobwa bagabanukaho 1.5%.

Umunyamabanga wa Leta ushinzwe amashuri abanza n’ayisumbuye muri Minisiteri y’Uburezi, Isaac Munyakazi, yavuze ko mu banyeshuri bose biyandikishije gukora ibizamini hari abagera kuri 45 barimo 20 b’abakandida bigenga n’abandi 25 bo mu banyeshuri basanzwe.

Avuga ko isuzuma baherutse gukora ryo kureba niba abanyeshuri biyandikishije gukora ibizamini bose bahari, basanze hari abakandida bigenga batanze impapuro mpimbano zigaragaza ko barangije icyiciro rusange cy’amashuri yisumbuye.

Yagize ati “Mu bakandida bigenga bagera kuri 820 biyandikishije muri uyu mwaka, twasanze 20 bafite impapuro z’impimbano zigaragaza ko barangije icyiciro rusange, abo ntabwo bazakora kandi twabashyikirije Polisi barimo gukorwaho iperereza.”

Munyakazi akomeza avuga ko hari abandi banyeshuri 25 basanzwe batazakora ibizamini bya Leta kubera impamvu zirimo guta amashuri, uburwayi, abavuye mu gihugu n’imyitwarire mibi abanyeshuri bakunda kugaragaza akenshi barangije kuzuza amafishi yo kuzakora ibizamini bya Leta.

Ati “Abayobozi benshi batakambiye Minisiteri y’Uburezi ko abana bamara kuzuza amafishi bakihindura ibitangaza, bagata amashuri. Iyi myitwarire ntabwo tuzayihanganira,tugomba kumva ko ari umuco utadufashiriza abana.”

Abanyeshuri babujijwe gukora ibizamini bya leta kubera guta amashuri byakozwe habanje kumenya impamvu zabibateye, iki gikorwa kikaba cyaragizwemo uruhare n’inzego z’ibanze zegereye abo bana.

Igabanuka rya 2.3% mu cyiciro cya kabiri cy’ayisumbuye

Imibare ya Minisiteri y’uburezi, igaragaza ko mu cyiciro cya kabiri cy’amashuri yisumbuye (A’level), abanyeshuri bagabanutseho 2.3%. Munyakazi asobanura ko Politiki ya Leta igena amahitamo abanyeshuri bakora barangije icyiciro rusange aho bamwe berekeza mu bumenyingiro (WDA) n’amashuri nderabarezi (TTC).

Ibi ngo bituma abakora ibizamini bitegurwa n’ikigo cy’igihugu gishinzwe uburezi (REB) bagabanuka.

Minisiteri y’Uburezi ivuga ko muri rusange imyiteguro imeze neza kuko hateguwe abarimu bazahagarikira, umutekano wabyo, imyigishirize n’ibindi. Yasabye abazagira uruhare kurangwa n’ubunyamwuga bakirinda buri kimwe cyatera imigendekere mibi y’ibizamini.

Munyakazi yasabye abanyeshuri kugira umuhate wo kumva ko ari igihe kigeze ngo berekane ko bashoboye.

Yagize ati “Abanyeshuri barasabwa kumva ko igihe kigeze kugira ngo bereke ababatumye ko bashoboye, kumva ko ari ibihe bisanzwe ntibagire ubwoba, bakagaragaza ko bize neza. Bazakoreshe neza igihe be kumva ko bahatanira kurangiza mbere y’abandi ngo bahubuke.”

Kuwa 1 Ugushyingo kugeza kuwa 3 Ugushyingo abanyeshuri bo mu mashuri abanza bazakora ibizamini, kuwa 9-16 hakore abo mu cyiciro rusange n’abo mu cyiciro cya kabiri uretse ko bo bazasoza kuwa 18 Ugushyingo 2016 bitewe n’uko bazakora ibizamini 11.

Umunyamabanga wa Leta ushinzwe amashuri abanza n’ayisumbuye muri Minisiteri y’Uburezi, Isaac Munyakazi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved