Abanyeshuri babaye aba mbere mu irushanwa ryo kwandika inkuru z’ikoranabuhanga bashimiwe

Yanditswe na Thamimu Hakizimana
Kuya 7 Gicurasi 2019 saa 10:10
Yasuwe :
0 0

Abanyeshuri 10 babaye aba mbere mu irushanwa rya 2018 ryo kwandika inkuru zitandukanye z’ikoranabuhanga, ryateguwe n’Umuryango wa Afurika y’Iburasirazuba (EAC), kuri uyu wa Kabiri bashyikirijwe ibihembo n’Ikigo cy’Igihugu cy’Uburezi (REB).

Abanyeshuri 166 bo mu cyiciro rusange cy’amashuri yisumbuye, nibo bitabiriye iri rushanwa ryatangiye muri Kanama 2018. Ryahereye ku rwego rw’Imirenge n’urw’Uturere riza gusorezwa ku rwego rw’Igihugu.

Abanyeshuri batanu ba mbere mu Rwanda, bahembwe ku rwego rwa EAC, ndetse uwabaye uwa mbere agira n’amahirwe yo guhatana na bagenzi be bo mu bihugu bigize uyu muryango.

Furaha Kezia Beiza wigaga muri FAWE Girls School, ni we wabaye uwa mbere ahagararira u Rwanda mu cyiciro cya nyuma cy’iri rushanwa cyabereye mu Mujyi wa Arusha muri Tanzania.

Furaha Kezia Beiza wabaye uwa mbere mu Rwanda kandi yahawe amadolari y’Amerika 300, Cyusa Shyaka Pascal wiga muri Petit Seminaire yo ku Rwesero, ahabwa amadolari 250, Ishimwe Pacifique amadolari 200, Mutsinzi Emmanuel wo mu Byimana ahembwa amadolari 150 ndetse Dushime Laissa wiga muri Gashora Girls Academy ahabwa amadolari 100.

Gusa n’abandi banyeshuri batanu bakurikiye aba nabo bahawe impamyabushobozi z’uko bitwaye neza.

Furaha Kezia Beiza yabwiye IGIHE ko byamushimishije cyane ndetse byamwongereye umuhate wo kwiga.

Ati “Ndabyishimiye kandi ntibivuze ko nzarekera aho ahubwo binteye imbaraga zo gutuma niha gahunda yo gushishikariza n’abandi gukora cyane kandi nanjye ubwanjye ngiye gushyira imbaraga mu myigire yanjye kugira ngo no mu yandi marushanwa nzitware neza.”

Yongeyeho ko yifuza ko isomo ry’Igiswahii n’Igifaransa mu Rwanda, yashyirwamo imbaraga nk’iry’Icyongereza kuko ari mu byatumye ategukana umwanya wa mbere ubwo yari Arusha ku rwego rwa EAC.

Cyusa Shyaka wabaye uwa Kabiri yemeza ko yahembwe bitewe n’inkuru yakoze igaragaza uko ikoranabuhanga rishobora guteza imbere abatuye Afurika y’Iburasirazuba.

Ati “Nagaragaje uko ikoranabuhanga ari ingirakamaro rinashobora guteza imbere rikanahindura imibereho y’abatuye muri ibi bihugu, ndahembwa, nabyishimiye kandi amafaranga nahembwe nzayabika nzayifashishe ninjya mu bundi buzima ndangije amashuri yisumbuye.”

Umuyobozi wa REB, Dr Ndayambaje Irenée, yemeza ko aya marushanwa afite intego ebyiri zirimo izo kureba ko abana bazi umuryango w’ibihugu by’iburasirazuba n’akamaro kawo.

Ati “Ni ingirakamaro kuko aba agamije kugira ngo abanyeshuri bamenye umuryango w’Ibihugu by’Iburasirazuba, n’impamvu uriho yewe n’inyungu tuba tuwufitemo nk’igihugu. Ikindi ni ukugira ngo bipime ubumenyi kuko akorwa mu Cyongereza no mu Gifaransa ndetse no mu Giswahili nk’indimi zikoreshwa muri aka karere.”

Yongeyeho ko aba ari n’umwanya mwiza wo kugira ngo bashyire abanyeshuri ku munzani barebe ko abo bigisha babasha guhangana ku isoko ry’umurimo n’abo mu bindi bihugu.

Muri iki gikorwa hanahemwe abarimu batanu bakosoye aba banyeshuri n’ibigo bitatu byabaye ibya mbere mu kwitabira iki gikorwa.

Ishuri rya FAWE Girl School niryo ryabaye irya mbere rihabwa ibikoresho bifite agaciro k’amadolari 1200, Petit Seminaire yo ku Rwesero yegukana umwanya wa Kabiri inahabwa ibikoresho by’agaciro k’amadolari 1000, mu gihe umwanya wa Gatatu wegukanywe na Saint Kizito ihabwa ibikoresho bifite agaciro k’amadolari y’Amerika 750.

Biteganyijwe ko aya marushanwa azajya aba buri mwaka.

Kezia Beiza wigaga muri FAWE Girls School wabaye uwa mbere ari guhembwa
Cyusa Shyaka Pascal wiga muri Petit Seminaire yo ku Rwesero yahembwe amadolari 250
Dushime Laissa wiga muri Gashora Girls Academy ahabwa amadolari 100
Bimwe mu bihembo ishuri rya FAWE ryahembwe bifite agaciro k'amadolari 1200
N'abandi baje mu 10 ba mbere bahawe impamyabushobozi
Umwe mu barimu bakosoye ahabwa impamyabushobozi
Bamwe mu banyeshuri bitabiriye iri rushanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza