Abanyeshuri bahishuriwe ibanga ryo kutabunza imitima bashakisha akazi nyuma y’amasomo

Yanditswe na Evariste Nsengimana
Kuya 11 Gashyantare 2018 saa 07:40
Yasuwe :
0 0

Bimaze kugaragara ko umubare munini w’abanyeshuri barangije amashuri bagorwa no kubona akazi, bakabunza imitima bibaza aho bagasaba, nyamara ngo umuti urambye w’iki kibazo ni ukwitoza kwihangira umurimo hakiri kare.
Mu 2017, Ikigo cy’Igihugu cy’Ibarurishamibare, cyatangaje ko mu bushakashatsi bushya bugaragaza uko imirimo ihagaze mu gihugu, umubare w’abadafite akazi wari kuri 16.7 %, ubariyemo n’abahingira amaramuko, ubushomeri mu rubyiruko bwari kuri 21 %. Ubwo itsinda ry’abakozi ba (...)

Mu 2017, Ikigo cy’Igihugu cy’Ibarurishamibare, cyatangaje ko mu bushakashatsi bushya bugaragaza uko imirimo ihagaze mu gihugu, umubare w’abadafite akazi wari kuri 16.7 %, ubariyemo n’abahingira amaramuko, ubushomeri mu rubyiruko bwari kuri 21 %.

Ubwo itsinda ry’abakozi ba Minisiteri y’uburezi basuraga akarere ka Ngororero mu bukangurambaga bugamije guteza imbere ireme ry’uburezi, Umuyobozi Mukuru w’Ikigo cy’Igihugu gishinzwe guteza imbere amasomo y’ubumenyingiro (WDA), Gasana Jérôme, yasabye abanyeshuri gutegura uburyo bwo gukorera amafaranga bakiri ku ntebe y’ishuri, ku buryo bazarangiza ntibabunze imitima bashakisha akazi ahubwo na bo bakaba bagatanga.

Yabigarutseho nyuma yo gusura ibigo bitandukanye byiganjemo ibyigisha amasomo y’ubumenyingiro, agasanga abanyeshuri bafite amakoperative bashinze cyangwa ibimina byo kwitegenyiriza babarizwamo ari mbarwa.

Gasana yababajije abanyeshuri ba Apejerwa Nyange, Kivumu TSS, Gatumba TSS n’ayandi niba biga neza isomo rya ‘Entrepreneurship’, ribategura neza uburyo bakwihangira umurimo, bamugaragariza ko baryiga ariko abanenga ko nta na hamwe bashinze ikigo cyangwa Koperative.

Yagize ati “Ni ukuvuga ngo ya ‘Entrepreneurship’ muri kwiga ntabwo muri kujyana n’igihugu. Ubundi umuntu wiga amasomo y’ubumenyingiro ikintu cya mbere kimuranga ni uko aba afite ifaranga. Nk’ubu hano (muri Apejerwa Nyange) nta wakagombye kumbwira ngo mu rugo babishyurira amafaranga y’ishuri. Bayakwishyurira gute kandi uzi kuvura amatungo?Uzi guhinga kijyambere? Ushobora kwizigamira, icyo bita ikimina. Ubu wasanga mudafite n’agasanduku bashyiramo igiceri.”

Aganira n’abanyeshuri ba Kivumu TSS, Gasana yagize ati “Mwagiye mwumva ibibazo byinshi biri mu rubyiruko, ibibazo byinshi tuvuga ngo nta reme ry’uburezi ariko sinzi niba namwe ariko mubyemera cyangwa mubyumva, ireme ubundi rivunga ngo ubundi uzi neza icyo wize mu ishuri ku buryo ushobora kugishyira mu ngiro urangije kwiga.”

“Ariko hari n’ibindi bibazo bidukomereye nk’igihugu mwagakwiye kuba mudufasha gukemura. Hari ibyo tujya twumva umuntu arangiza kwiga ikigo cyaramufashije, yaramaze imyaka itatu yiga, yagera ku isoko ry’umurimo ugasanga yabaye umushomeri, kubera iki? Ntabwo watojwe neza kugira ngo ubashe kwihangira akazi igihe uzaba urangije amashuri yawe.”

Yakomeje ababwira ko gushinga koperative bidasaba ubushobozi buhambaye ko bashobora gutangira ari babiri abandi bakagenda biyongeraho gahoro gahoro, bakazagera igihe cyo kurangiza kwiga yarakomeye bityo ntibabunze imitima bashakisha ubaha akazi.

Ubu bukangurambaga ni ubw’ibyumweru bibiri, buri gukorwa mu bigo by’amashuri bisaga 600 byo mu turere twose tw’igihugu, bufite insanganyamatsiko igira iti “imyigire myiza n’indangagaciro, ni ishingiro ry’uburezi bufite ireme.”

Minisiteri y’Uburezi ivuga ko ibidindiza ireme ry’uburezi bidakwiye gushakirwa mu bushobozi gusa kuko hari ibindi abayobozi b’ibigo, ababyeyi, abanyeshuri n’inzego z’ibanze bakwikorera birimo nko gukumira abana bata ishuri, gufasha abana gukoresha ibikoresho bahabwa, gusana inyubako, gukumira ibiyobyabwenge n’ibindi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza